Tơ̆ kơdơ chŭn Soi, thôn Nam Phước, tơring Nghĩa Giang, dêh char Quảng Ngãi dôm chŭn na tŏk bŏk lơ̆m jơ ‘năr yoă hlôi răm đak lơ̆p. Đei chŭn na lăp ƀôh pă hơdrô̆ hơ ie ƀa; đei chŭn na, pơđĭ chŭn na ƀa păk thap thônh. Kon pơlei măh jur lơ̆m đak chă kăt ƀa tăh tơ̆ thŏng nan chơ năm tơ̆ pơnơ̆. Ŭnh hnam yă Lê Thị Kiều, oei lơ̆m thôn Mỹ Tịnh, tơring Nghĩa Giang đei 4 sao chŭn, 1 sao đak lơ̆p kơtang lơ năr. Yă Kiều măh hơvơn khul yân kuan tơring vang tơgŭm kăt ƀa:“Đak jroh hoch hơnong ƀa klơ̆p ƀĕnh kơ chŭn na ƀa đak, ŭnh hnam nhôn năm hyum pơ đĭ hơnong lơ̆m chŭn na. Năr ou đak och păng đei tơring tơgŭm kơna mă kăt ƀa hloi. Pơgê ou tơring tơgŭm ăn 6 ‘nu bơngai vang năm kăt ƀa. Hăm dôm ‘nu kon drŏ nglo jur vang preh ƀa. Tơdăh ưh kơ đei tơgŭm djru lei rŏ năng vă hơchăng hŭt đĕch bơih".

Lơ chŭn na đak lơ̆p jrŭ, ƀa pơ-‘ngơ̆m lơ̆m đak đunh năr hlôi pơchăh măt. Kon pơlei tơgĕch mưh đak och dang yơ ‘noh năm kăt ƀa hloi. Tơ̆ chŭn na nơ̆r chă krao tơ ‘lông dih băl, atŭm hăm kmăi preh ƀa jĭ djơ djrông. Dôm năr ou ki, mŏ Nguyễn Thị Thu Hiền, Kơdră Khul bơ̆ jang Mặt trận thôn An Hội Bắc 2, tơring Nghĩa Giang, atŭm hăm khul lơ̆m pơlei tơgum djru kon pơlei thôn Nam Phước kech yoă ƀa:“Dôm đe pơmai drŏ kăn jur kăt ƀa, đơ̆ng noh yân kuân pơdŭ tŏk tơ̆ pơnơ̆. Năr brei, chŭn na păh to đak lơ̆p tôch kơtang, ƀa đĭ chăt ngăl bơih. Găh chŭn pơgê ou tŏk bŏk kăt ƀa jei răm đak lơ̆p. Kơsơ̆ brei, chŭn ou đak lơ̆p tôch kơ jrŭ, ưh kơ gơh vă jur kăt ƀa ôh. Pŭn ai pă đei ‘mi bơih kơna pơgê ou đak och. Ŭnh hnam tơchơ̆t kăt, đei đăi dôm yơ pôm păi”.

Tơ̆ tơring Nghĩa Giang đei 19 ha ƀa đak lơ̆p. Hơnih vei lăng kon pơlei tơring chă pơrô̆ pơvơn khul yân kuân, rim khul drŏ kăn păng khul kơtă rim pơlei jur tơ̆ chŭn na tơgŭm kon pơlei. Ƀok Cao Thanh Tuyên, Kơ iĕng Kơdră chĕp pơgơ̆r Hơnih vei lăng kon pơlei tơring Nghĩa Giang, dêh char Quảng Ngãi tơbăt:“Ƀơ̆t măt, tơring hơvơn khul iung jang kĕch yoă, sơđơ̆ng trŏ lăp lơ̆m ‘năr hơlăng. Mă ƀar dơ̆ng ‘noh tơring iung jang hơdoi hăm rim hơnih bơ̆ jang ƀơm truh, tơchĕng lăng gô hơmet jơ ‘năr rim pơyan jang vă veh ver khei ‘năr đei ‘mi hrôih nhen hrei ou. Pơtih gia, sơnăm đơ̆ng rŏng nhôn gô proh hơmet jơ ‘năr rei ƀa, proh hơmet jơ ‘năr pơtruh đak ăn kon pơlei hrôih hloh dang ei dang 10 năr. Tơdăh jơ ‘năr rei pơtăm hrôih hloh minh giĕng lei truh dang ei hlôi kĕch yoă đang bơih”.

Dôm khei năr ou ki, lơ tơring lơ̆m dêh char Quảng Ngãi đei ƀôh ‘mi tih, pơm ăn hloh 63ha ƀa păng ‘nhot sa đei ƀơm răm. Lơ̆m ou, hloh 48ha ƀa tơ̆ rim tơring An Phú, Nghĩa Giang păng Đình Cương răm đak lơ̆p. ‘Ngoăih kơ ‘noh, dang 15ha ‘nhot sa tơ̆ tơring An Phú hư răm kơ yuơ ‘mi tih. Khul kơdră chĕp pơgơ̆r păng rim khul jang tơring tŏk bŏk tơgum djru kon pơlei yoă preh ƀa vă pơm dă ƀiơ̆ hiong răm kơtang.