Ƀă lôch hơchăng, mĕ ưh khan lăp jing tơdrong ơh sơ ‘ngon đơ̆ng kơdih đe oh mă oei jing mơmat kơ unh hnam, bơngai lơ̆m unh ham hai. Oh Võ Thị Ngọc Ngân, hŏk tro Hnam trưng jăl 3 Bà Điển, pơlei tơm Hồ Chí Minh, tơroi:

"Đơ̆ng năr ƀă lôch, tơdrong arih sa kơ unh hnam tơƀơ̆p lơ mơmat tat hlŏh ƀơ̆t rim tơdrong pŭ trăp mŭk drăm tă kơ hơtŏk tơ̆ hơngiĕng mĕ inh ngăl. Mă đơ̆ng tơdrong jang tôch kơ gleh hrat păng iŏk yua ưh kơ sơđơ̆ng, mĕ oei ling lang hơdrin đĭ jơhngơ̆m vă mŏ oh nhôn đei hơnơ̆ng truh tơ̆ hnam trưng hŏk nhen đe bôl buăl”.

Jơ̆p lơ̆m teh đak dang ei đei dang 1,5 triê̆u hơioh đei tơdrong hơrih mơmat tat tôch kơdêh, lơ̆m noh đei dang 176 rơbâu hơioh mơti, hơioh đei hŭt hơchăng. Lơ tơdrong jang tơgŭm, tơdrong jang, hlôi đei tơlĕch jang kiơ̆ vă vei sơđơ̆ng ăn hơioh mơti, hơioh đei huŏng tơdrong hơtŏk tơiung păng mơ̆t oei hơdai ‘lơ̆ng hloh nhen: Tơchơ̆t apŭng plenh teh gah tơdrong pơm tơm kơ đe hơioh, Luơ̆t đe Hơioh, Tơdrong bơ̆jang kơ teh đak yua kơ hơioh jăl jang 2021-2030; Tơdrong jang tơgŭm khôi luơ̆t gah hơioh đei tơdrong hơrih sa mơmat tat dêh hloh...

Dang ei lơ̆m teh đak tŏk bŏk bơ̆jang kiơ̆ tơgŭm tơpôl rim khei ăn kơ 21.000 ‘nu hơ ioh mơti. Hơdai hăm ‘noh, Đảng păng Teh đak hlôi tơlĕch ăn tơdrong jang tơgŭm hơdrol, pơtrŭt dôm anih jang, rim bơngai, anih mơdro sa lơ̆m păng ngoaih kơ teh đak vang tơgŭm, tơgop jơhngơ̆m vei lăng ăn hơ ioh mơti pơma hơdrô̆, hơ ioh đei tơdrong hơrih sa mơmat tat dêh hhoh pơma atŭm.

Kiơ̆ đơ̆ng noh hlôi vei lăng tơdrong hơrih sa kơ đe hơioh mơti, hơioh đei hŭt hơchăng, pơm tơdrong hiôk hơtŏ băl, pơm lăp 'lơ̆ng ƀiơ̆ tơdrong gơ̆h iŏk yoa trŏ ƀlep, lăp hăm khôi luơ̆t, pơlung đe oh hơdrin hơtŏk tơdrong kĕ jang, yak tŏk mơ̆t oei hơdai hăm tơpôl. Ƀok Nguyễn Văn Lực, Kơdră chĕp kơ̆l Khul vei lăng tơgŭm bơngai jo jăn dêh char Lâm Đồng tơroi:

“Tơ̆ Lâm Đồng đei hloh 4.000 'nu hơioh mơti kăl kơ vei lăng. Rim khei nhôn tơgŭm ăn kơ 400 'nu mon,, mĭnh 'nu mon 1 triệu hlak jên, mĭnh sơnăm thoi noh 'noh 4 ti 800 triệu hlak jên. Păng hơnơ̆ng blŭng 1 sơnăm hŏk ‘noh nhôn pơgơ̆r krao hơvơn 'nhŏng oh bơngai jang lơ̆m khŭl vang tơgop, ưh kơ apĭnh tơgŭm, vă bơngơ̆t ăn kơ 20 'nu hơioh mơti yak mơ̆t hŏk đại học păng mĭnh 'nu mon đei tơgŭm ăn 200 triệu hlak jên vă vei sơđơ̆ng 4 sơnăm hŏk. Păng pơm thoi yơ vă đe mon sơđơ̆ng jơhngơ̆m yak mơ̆t lơ̆m tơdrong hơrih sa, yak tŏk, ưh khan lăp mơ̆t oei hơdai lơ̆m tơpôl mă đơ̆ng rŏng âu oei tơgop ăn tơpôl.”

Ƀok Ngô Sách Thực, Kơdră chĕp kơ̆l Khul vei lăng bơngai jơ jăn Việt Nam tơbăt: hăm tơdrong vang tơgŭm đơ̆ng rim khul jang, anih mơdro sa, bơngai đei jơhngơ̆m đon 'lơ̆ng păng tơpôl, lơ̆m 5 sơnăm âu ki, rim kơdră khul hlôi krao hơvơn đei hloh 637 ti hlak jên vă hơpăh ăn jên hŏk ƀŏng, gre tang vang, tơmam hŏk pơhrăm… vei lăng năng tông đe hơ ioh đei tơdrong hơrih sa mơmat tat:

“Khŭl vei lăng tơgŭm bơngai jo jăn Việt Nam hơnơ̆ng tơchĕng pơm thoi yơ vă tơdrong jang vei lăng hơioh mơti ưh khan lăp pơdơh ƀơ̆t tơgŭm găh tơmam drăm mă oei pơm tơdrong ‘lơ̆ng vă đe oh hơnơ̆ng hŏk pơhrăm, hơdrin yak tŏk lơ̆m tơdrong hơrih sa, ưh kơ hŭt bu tơ̆ rŏng”.

Đảng, Tĕh đak bơ̆n ling lang jang kiơ̆ đon tơchĕng hơtŏk tơiung iŏk kon bơngai 'nŏh tơm, 'nŏh tơ 'ngla, 'nŏh tơdrong hơgăt păng tơdrong ‘lơ̆ng đơ̆ng tơdrong hơtŏk tơiung. Yua thoi noh, vei lăng năng tông ăn hơiŏh mơti, hơiŏh đei hŭt hơchăng păng dôm bơngai đei tơdrong hơrih sa mơmat tat jing hơnăp jang đơ̆ng Teh đak hai, jing tơdrong jang đơ̆ng tơpôl tơpôl hai. ‘Nâu kŭm jing tơdrong joăt joe 'mêm mơnat đơ̆ng hơdrĕch hơdrung bơ̆n, vei lăng năng tông păng pơjing tơdrong hiôk vă hơioh mơti đei hŏk pơhrăm, hơtŏk tơiung tôm tơdrong, yak kơjăp jing kon pơlei đei yua ăn tơpôl.