Hơnih tơm Vei lăng khul linh dêh char Khánh Hòa hlôi sơng hloh 80 kơtơ̆ng ang tơrĕk truh dôm tơring nhôm đei pơsat linh lôch tang. Lơ̆m noh đei 7 kơtơ̆ng ang gah pơsat linh lôch tang ƀŭ atŭm, hơmŏ hơdrol đei hloh 200 kơ̆l kơting. Đơ̆ng chă hơlen hơdah, mă blŭng hlôi sir akŏm đei 6 hơnih pơsat pơtruh tơ̆ pơsat ƀŭ lơ̆m dêh char. Atŭm hăm chơ chă, sir kôch, Khánh Hòa oei hơtŏk tenh tơdrong pơkăp hơnăn măt ăn linh lôch tang kiơ̆ trong pơkăp ADN.

Truh dang ei, dêh char hlôi akŏm đei pơhlom 2.700 sĕch pham kơ hloh 3.000 'nhŏng oh linh lôch tang chih măt, đei jê̆ 90% tơdrong tơlĕch jang păng hloh 550 sĕch pham pơtêng hăm pơkăp jang. Jê̆ 80 'nu bơngai 'lŏ sơnăm, jơhngơ̆m pă đei grăng đei tơgŭm năm iŏk sĕch pham tơ̆ hnam. Kiơ̆ hơlen lăng, Khánh Hòa dang ei đei hloh 12.000 tơdrong tơroi gah linh lôch tang, lơ̆m noh đei jê̆ 4.900 'nu tam mă băt hơdah pơsat tơ̆ yơ. Yuơ noh, rim tơdrong bơ̆ng pang, rim kon pơlei hlôi băt gah kơdrăn tơblah, hlôi bơ̆ng pang hơnih ƀŭ linh lôch tang mă blŭng, adoi gơh pơtruh nơ̆r kăp gĭt lơ̆m tơdrong dăr lăng chơ chă.