Kiơ̆ tơroi, khei năr ou ki, Anih tơm Kŏng an hlôi hơvơn anih jang 'mêm bơnat tơgŭm dêh char Kon Tum 84 tih hlj vă man 'nao 1.400 tŏ hnam ăn unh hnam hin dơnuh, tơjê̆ hin dơnuh hăm rim tŏ hnam đei kơjă 60 triu hlj. Yơ̆ng ou ki, atŭm hăm tơdrong pơtơm pơm 500 tŏ hnam, Anih tơm Kŏng an pơjao 2 tŏ hnam 'nao keh đang vă pơih să ming man.

Trung tươ̆ng Phạm Thế Tùng, Thư̆ trưởng Anih tơm Kŏng an sơkơ̆t hơdah khei năr truh Đảng uu Kŏng an Trung ương, Anih tơm Kŏng an gô jang atŭm kơjăp hăm anih jang kơpal kơ dôm dêh char Tây Nguyên pơtoi hơvơn tơdrong tơgŭm đơ̆ng dôm anih jang 'mêm bơnat vă tơlĕch sut lê̆ hnam pơgia, hnam hyah hyok lơ̆m tơring Tây Nguyên. Tơ̆ lêh pơtơm jang, tang măt ăn dôm anih jang tơgŭm jĭ minh ƀar anih jang mŭk drăm păng anih mong jên jang tĕch pơdro, hlôi asong jên tơgŭm dêh char Kon Tum sut lê̆ hnam pơgia, hnam hyah hyok.