Kiơ̆ trong jang, lơ̆m sơnăm 2025, dêh char Dak Nông gô ming man 540 pơbung hnam ‘nao pôk ăn rim ŭnh hnam dơnuh, vă jê̆ dơnuh, kon kông păng ŭnh hnam đei iŏk yua ăn teh đak. Mĭnh tŏ hnam man ‘nao đei tơgŭm ăn 60 triu hlak jên. Akŏp kon jên jang hloh 32 ti hlak jên. Đơ̆ng blŭng khei 3 ou, rim tơring tơ̆ dêh char Dak Nông hlôi iung jang ming man đei hloh 30 tŏ hnam tơgŭm ăn ŭnh hnam tơnap tap găh hnam oei. Dêh char Dak Nông hơdrin truh khei 9 kơnh gô jang keh đang xut xa 540 hnam pơgia, hnam hnăt hnot.