Kon Rẫy jĭ apŭng mă blŭng kơ dêh char Kon Tum truh dang ei hlôi pơgơ̆r tơlĕch jang, man ‘nao păng pơm hơmet ming pơđĭ 155 tŏ hnam pơgia, hnam hiah hiok ăn kơ dôm ŭnh hnam kon pơlei. Lơ̆m noh kơsô̆ kăl kơ man ‘nao ‘noh jĭ 102 tŏ hnam păng pơm hơmet ming ‘noh jĭ 53 tŏ hnam. Ƀok Nguyễn Văn Thuỷ, Phŏ Kơdră Anih vei lăng kon pơlei apŭng Kon Rẫy, ăn tơbăt, dang ei đĭ đei 1 puăt kơsô̆ hnam kăl kơ man ‘nao, pơm hơmet ming đei pơm đang păng pơjao ăn ŭnh hnam oei.

Apŭng hơdrin jang đang tơdrong sut hnam pơgia, hnam hiah hiok lơ̆m hơtuch khei 4/2025. Kŭm hăm apŭng Kon Rẫy, tơ̆ dêh char Kon Tum đei apŭng Đăk Hà kŭm lăp oei pă 9 tŏ hnam păng apŭng Sa Thầy oei 34 tŏ hnam ‘noh jang đang. Hăm dôm apŭng hơtăih hơtŏ, mơmat tat kơ dêh char đei lơ hnam pơgia, hnam hiah hiok kăl kơ man ‘nao, pơm hơmet ming, nhen: apŭng Đăk Glei 646 tŏ hnam, Kon Plông 572 tŏ hnam, Tu Mơ Rông 423 tŏ hnam, truh khei ‘năr âu kơsô̆ tơlĕch jang, jang đang ‘nao ‘nao păng pơm hơmet ming kŭm đĭ đei hloh 1 puăt bơih.