‘Nou jĭ Hop akŏm Kơdră tang măt Kuô̆k hô̆i ‘măng mă 7 kơ jăl jang Kuô̆k hô̆i jăl 15, lơ̆m khei ‘năr pơđĭ khul chinh trĭ tŏk bŏk tĕnh koăng tơlĕch rim tơdrong jang hơmet ming khul kơdră. Găh tơdrong ‘nou, Kơdră chĕp pơgơ̆r Kuô̆k hô̆i Trần Thanh Mẫn tơbăt, jăl 1, rim hơnih tơm, hơnih bơ̆ jang hlôi hơmet ming kơtoei khul jang, jăl 2 iung jang hơmet ming Khôi luơ̆t tơm Teh đak, hơmet ming mĭnh ƀar khôi luô̆t păng hơmet ming 50% rim hơnih bơ̆ jang kơ dêh char. ‘Măng hop akŏm mă 9 gô pơgơ̆r lơ̆m vă jê̆ 2 khei, lơ̆m khei năr ou iŏk nơ̆r tơgop đơ̆ng kon pơlei găh hơmet ming Khôi luơ̆t tơm Teh đak. Mă kăl, đơ̆ng hơtuch khei 4 truh năr blŭng khei 5, Hơnih bơ̆ jang Kuô̆k hô̆i gô hop akom vă hơmet ming hơnih bơ̆ jang kơ tơring. Kơdră chĕp pơgơ̆r Kuô̆k hô̆i Trần Thanh Mẫn pơma hơdăh:“Dôm tơdrong jơnei lơ̆m pơjing khôi luơ̆t tơ̆ ‘Măng hop akŏm mă 7, mă 8 păng ‘măng Hop akŏm hăt hot mă 9 ou ki hlôi sơkơ̆t hơdăh tơdrong trŏ lăp đơ̆ng trong bơ̆ jang tơplih ‘nao lơ̆m pơjing khôi luơ̆t adoi nhen tơdrong kăl kơ rim ‘măng Hop akom Kơdră kơpal lơ̆m pơjing đei tơdrong ‘lơ̆ng kơ rim tơdrong vă pơjing khôi luơ̆t pơtruh ăn Kuô̆k hô̆i. Bơ̆n kăl tơlĕch iung jang kơtang hloh dơ̆ng trong tơplih ‘nao tơ iung pơjing khôi luơ̆t, vă tĕnh koăng ba trong bơ̆ jang đơ̆ng Đảng yak mơ̆t lơ̆m tơdrong hơrih sa. Rim Khôi luơ̆t kăl kơđeh, hơdăh, trŏ lăp, pơm hơtŏk kơtang bơ̆ jang tơnăp. Găh trong pơjing khôi luơ̆t, hơnih pơtruh ăn chiu pŭ truh tôch hăm rim tơdrong vă pơjing khôi luơ̆t dĭng truh mưh đei Kuô̆k hô̆i pơdrơ̆ng kiơ̆”.

Tơ̆ Hop akŏm, rim Kơdră tang măt Kuô̆k hô̆i hlôi pơma dơnuh găh trong vă pơjing Khôi luơ̆t Kmăi kmŏk kơsô̆. Bơngai tang măt Nguyễn Thị Thu Nguyệt, Khul bơngai tang măt Kuô̆k hô̆i dêh char Dak Lăk lăp đon hăm trong vă pơjing khôi luơ̆t, đei dôm trong ‘nao tơƀôh hơdăh lơ̆m rim tơdrong tơchơ̆t, pơtih gia nhen mŭk drăm kơsô̆, pơm tơlĕch tơmam drăm kmăi kmŏk kơsô̆, mơdro sa kmăi kmŏk kơsô̆, v.v. Tơgop nơ̆r hơdăh lơ̆m trong vă pơjing Khôi luơ̆t, Bơngai tang măt Nguyễn Thị Thu Nguyệt akhan, kiơ̆ tơdrong lơ̆m Apăng 10 hlôi tơlĕch ăn athei pơm sơđơ̆ng ‘lơ̆ng hơ iă ăn tơdrong jang kmăi kmŏk kơsô̆, mă lei păh tơchơ̆t găh sơđơ̆ng mạng păng vei lăng năng tông yưh liê̆u tim mă hơdăh, tim mă hơđăl găh tơdrong pơkăp ‘lơ̆ng kih thuơ̆t păng trong jang vei lăng:“Lơ̆m tơplih kơsô̆ roi năr roi kơtang ‘noh yưh liê̆u rim bơngai păng yưh liê̆u hơnih mơdro sa hlôi jing mŭk drăm gĭt kăl, adoi jing hơnih ngăl răm đơ̆ng ‘ngoăih tơdrŭt. Tơdrong dôm kih thuơ̆t ưh kơ hơdăh, tôm tong, trong hơlen ưh kơjăp gô pơm ăn truh đei tơdrong hiong răm dăh mă răm kơ đe tơdrŭt lơ̆m yưh liê̆u, kơ yuơ lơ loh ĭnh athei Khul pơm tơlĕch kăl đei dôm tơdrong tơchơ̆t hơdăh găh sơđơ̆ng mạng păng dôm tơdrong tơchơ̆t ou ‘moi kiơ̆ dôm tơdrong pơkăp ‘lơ̆ng apŭng plĕnh teh adoi nhen rim tơdrong pơkăp ‘lơ̆ng kơ yuơ Hơnih tơm Kŏng ang păng Hơnih tơm Khoa hŏk păng Kmăi kmŏk hlôi tơlĕch ăn hơdrol ou ki”.

Găh bơngai tang măt Phạm Trọng Nghĩa, Khul tang măt Kuô̆k hô̆i dêh char Lạng Sơn athei: “Lăng hơlen tơmơ̆t dơ̆ng tropng jang atŏk tơ iung kmăi kmŏk kơsô̆ vă sơđơ̆ng tơdrong pơm tơ-‘ngla teh đak lơ̆m mạng, sơđơ̆ng mạng, sơđơ̆ng yưh liê̆u, sơđơ̆ng dôm tơdrong kơtơ̆ng ang kơ hơnih jang păng rim bơngai. ‘Nou jĭ mĭnh lơ̆m 5 tơdrong trong pơrô̆ jang lơ̆m Tơdrong tơchơ̆t kơsô̆ 57. Mă ƀar, kăl tơmơ̆t dơ̆ng trong jang vă rim bơngai kon pơlei, mă kăl hăm kon pơlei kon kông oei tơ̆ tơring hơtăih yăih, tơnap tap đei sơng iŏk tơdrong atŏk tơ iung kơ tơdrong jang kmăi kmŏk kơsô̆ vă ưh kơ lê̆ bơngai bu hơchăng hŭt tơ̆ rŏng lơ̆m tơdrong atŏk tơ iung kmăi kmŏk kơsô̆ tơ̆ teh đak bơ̆n”.

Tơgoăt iŏk păng tơblang hơdăh dôm tơdrong mă rim bơngai tang măt pơma tơlĕch, Kơdră chĕp pơgơ̆r Hơnih tơm jang Khoa hŏk păng Kmăi kmŏk Nguyễn Mạnh Hùng sơkơ̆t hơdăh, Đảng păng Teh đak hlôi sơkơ̆t hơdăh tơdrong jang kmăi kmŏk kơsô̆ ‘noh jing trong jang kăl hloh, trŏ lăp hloh hăm tơdrong đei kơ Việt Nam, sơkơ̆t hơdăh vă atŏk tơ iung mŭk drăm kơsô̆ pơma atŭm lơ̆m chăl hle.

Iung pơma tơ̆ jơ pơtôch hop akŏm, Kơ iĕng Kơdră chĕp pơgơ̆r Kuô̆k hô̆i Trần Quang Phương tơgoăt iŏk, hôn bơnê tơdrong vang jang tôm, hơnăp jang kơtang đơ̆ng rim kơdră tang măt Kuôk hô̆i, rim hơnih bơ̆ jang ƀơm truh. Rim kơdră tang măt hlôi hơmet tôm tơdrong, rim nơ̆r tơgop ‘lơ̆ng hơ iă.