Vă đĭ sơnăm sơ̆, Hơnih tơm Chinh trĭ hlôi pơjing Tơdrong tơchơ̆t kơsô̆ 57 găh atŏk kơtang khoa hŏk, kmăi kmŏk, tơplih nao tơchăr păng  tơplih kơsô̆ teh đak. Lăp đơ̆ng rŏng ‘noh, tơ̆ Hop akŏm tơm hlôi pơgơ̆r Hop akom jơ̆p lơ̆m tĕh đak tơlĕch jang kiơ̆ Tơdrong tơchơ̆t kơsô̆ 57, Tổng Bí thư Tô Lâm hlôi iung pơma pơrô̆ jang gĭt kăl tơ̆ Hop akom păng Kơdră chĕp pơgơ̆r Kuô̆k hô̆i Trần Thanh Mẫn jei đei hla bơar chih tơbăt hơdăh găh tơdrong ou. Đảng khul Kuô̆k hô̆i pơjing Trong pơprŏ jang kơsô̆ 3260 vă jang kiơ̆ Tơdrong tơchơ̆t kơsô̆i 57. Tơ̆ ‘măng hop akŏm hăt hot mă 9, Kuô̆k hô̆i hlôi lăng hơlen, pơdrơ̆ng kiơ̆ Tơdrong tơchơ̆t kơsô̆ 193 găh mĭnh ƀar trong bơ̆ jang, trong tơgŭm djru gĭt kăl pơjing hơyak pran kơtang atŏk tơ iung khoa hŏk, kmăi kmŏk, tơplih ‘nao tơchăr păng tơplih kơsô̆ teh đak. ‘Nou jing tơdrong tơchơ̆t vă xek tơlang rim tơdrong ƀơ̆t măt, găh đunh đai gô hơmet ming rim khôi luơ̆t vă pơtrŭt kơtang lơ̆m tơdrong jang khoa hŏk, kmăi kmŏk.

Iung pơma tơ̆ Hop akom, Kơdră chĕp pơgơ̆r Kuô̆k hô̆i Trần Thanh Mẫn pơma hơdăh, Tơdrong tơchơ̆t 57 tơlĕch ăn iung jang truh sơnăm 2023, Việt Nam găh lơ̆m grup 3 teh đak dơ̆ng hơlou Đông Nam Á, grup 50 teh đak dơ̆ng hơlou lơ̆m apŭng plĕnh teh găh tơdrong kĕ pơjei păng kơsô̆ atŏk tơ iung Khul kơdră điên tư. Việt Nam hơmŏ iŏk đei grup 3 teh đak dơ̆ng hơlou Đông Nam Á găh bơ̆ jang chă tơchĕng hơlen păng atŏk tơ iung kmăi kmŏk hơgei, hơnih tơm atŏk tơ iung mĭnh ƀar tơdrong jang kăl, tơdrong jang kmăi kmŏk kơsô̆. Kơdră chĕp pơgơ̆r Kuô̆k hô̆i Trần Thanh Mẫn athei Khul kơdră chĕp pơgơ̆r Jơnum vei lăng kon kông, rim Hơnih bơ̆ jang kơ Kuô̆k hô̆i, Hơnih bơ̆ jang Kuô̆k hô̆i akŏm tơlĕch jang kiơ̆ ‘lơ̆ng rim tơdrong kăl nhen:“Atŏk tơ iung kmăi kmŏk, tơplih ‘nao tơchăr, tơplih kơsô̆ ‘noh tơm hloh, kăl hloh vă tơ iung pơjing Kuô̆k hô̆i chăl hle, tơpăt, jang hơgei, khoa hok păng jơnei. Kmăi kmŏk hơgei gô jing trong jang kăl hloh tơgŭm Kuô̆k hô̆i lăng hơlen, tơlĕch dôm trong jang trŏ hloh, trŏ lăp tơtom dôm tơdrong yan ou, pơm hơtŏk jang jơnei lơ̆m dăr lăng păng tơklep kơjăp ‘lơ̆ng hơ iă hloh hăm bơngai tăh hla păng Kon pơlei. Kuô̆k hô̆i kăl yŭk trong hơlou lơ̆m tơmơ̆t jên jang kmăi kmŏk kơsô̆, jang kiơ̆ khoa hŏk, kmăi kmŏk pơjing khul jang hơgei tơgŭm ăn tơplih kơsô teh đak. Jang kiơ̆ koăng, jơnei rim Tơdrong tơchơ̆t, trong jang hlôi tơlĕch ăn hăm Kuô̆k hô̆i; pơtho pơjing, pơtho tơbăt bơ̆ jang kơsô̆, tơgŭm ăn Bơngai tang măt Kuô̆k hô̆i păng kang ƀô̆, bơngai jang găh hơnih jang kơ Kuô̆k hô̆i bơ̆ jang hăm kmăi kmŏk gơ̆h hơgei jơnei kơtang lơ̆m tơdrong bơ̆ jang. Atŏk tơ iung kmăi kmŏk gơ̆h hơgei, tơmơ̆t jên jang tơ iung pơjing bơ̆ jang kiơ̆ kmăi kmŏk gơh hơgei hloh ... tơgŭm ăn bơ̆ jang Kuô̆k hô̆i”.

Kơdră chĕp pơgơ̆r Kuô̆k hô̆i pơkă, kăl atŏk kơtang hŏk pơhrăm dôm tơdrong jang jơnei păng pơtrŭt kơtang jang hơdoi chă tơchĕng hơlen păng pơtho pơhrăm jang kmăi kmŏk hăm rim teh đak gơ̆h hơgei lơ̆m tơdrong jang kmăi kmŏk gơh hơgei, kmăi kmŏk kơsô̆ lơ̆m bơ̆ jang nghĭ viê̆n, vă atŏk tơ iung rim trong jang trŏ lăp yan ou kơ Kuô̆k hô̆i Việt Nam.

Kơdră chĕp pơgơ̆r Kuô̆k hô̆i tơbăt, tơ̆ ‘măng hop akŏm mă 9, lơ̆m khei 5 kơnh, Kuô̆k hô̆i gô lăng hơlen ăn tơgop nơ̆r găh Khôi luơ̆t khoa hŏk, kmăi kmŏk păng tơplih ‘nao tơchăr; lăng hơlen pơdrơ̆ng kiơ̆ Khôi luơ̆t Kmăi kmŏk kơsô̆, vă hơmet pơ ‘lơ̆ng rim tơdrong tơhlăk tơhlĭn, găn ga, pơih trong ăn atŏk tơ iung khoa hŏk, kmăi kmŏk, tơplih ‘nao tơchăr, tơplih kơsô̆ teh đak.

Pơma dơnuh tơ̆ hop akom, Kơdră chĕp pơgơ̆r Hơnih tơm vei lăng Bơ̆ jang Khoa hok păng Kmăi kmŏk Nguyễn Mạnh Hùng akhan, lơ̆m Tơdrong tơchơ̆t 57, khoa hok kmăi kmŏk, tơplih ‘nao, tơchăr ‘noh jing tơdrong kăl hloh, jĭ jơ rơvơn vă Việt Nam đei jing teh đak atŏk tơ iung:“Hăm tơdrong atŏk tơ iung mŭk drăm kăl đei dôm trong tơlĕch jang ‘lơ̆ng hơgei păng Tơdrong tơchơ̆t 57 ‘noh mĭnh trong jang kăl hloh. Trong pơrô̆ jang ‘noh, đei pơđĭ pêng tơdrong ou ‘noh jơhngơ̆m pran tơm vă atŏk tơ iung teh đak. Vă hoei dơ̆ng đơ̆ng rŏng đe, vă kĕ atŏk kơtang, vă kĕ yak hloh jang sa iŏk đei jô̆ hơtŏ ‘noh ‘nou jing trong kăl hloh. Kơna bơ̆n nhen lĕ ‘măng iung jang kơtang hloh păng tôm tong hloh. Việt Nam hmă hmă iŏk đei jơnei păng atŏk tơ iung pran kơtang mưh đei iung jang kơtang jơ̆p jang lơ̆m kon pơlei păng tôm tong hloi”.

Hhop akŏm “Kuô̆k hô̆i kơsô̆ păng jang kiơ̆ kmăi kmŏk gơh hơgei lơ̆m tơplih kơsô̆ kơ Teh đak” hlôi sơkơ̆t hơdăh kơrŭn đĭ jơhngơ̆m kơ Kuô̆k hô̆i lơ̆m tơdrong yŭk trong hơlou lơ̆m tơplih kơsô̆, jang kiơ̆ khoa hŏk, kmăi kmŏk vă pơm hơtŏk iŏk đei jơnei tơdrong jang. Dôm trong jang tih tơlĕch ăn lơ̆m Tơdrong tơchơ̆t 57 păng rim tơdrong tơchơ̆t ƀơm truh ưh khan lăng truh tơdrong pơjing hơyak pran kơtang lơ̆m tơdrong jang khoa hŏk, kmăi kmŏk, tơplih ‘nao tơchăr păng tơplih kơsô̆ teh đak, mă oei pơjing đei hơyak kơjăp ‘lơ̆ng ăn mĭnh Kuô̆k hô̆i gơ̆h hơgei, tơpăt, bơ̆ jang ‘lơ̆ng hloh dơ̆ng.