Hnam trưng Mầm non Sao Mai jĭ 1 lơ̆m kơsô̆ dôm hnam trưng hŏk đei Anih tơm vei lăng Khŭl lĭnh păng dôm anih mơdro sa khŭl lĭnh tơlĕch jang tơ̆ tơring sơlam. Hnam trưng đei lơ hơnih pơm lăp hăm ‘meh vă hŏk pơhrăm ăn kơ hloh 300 ‘nu hơioh mầm non tơ̆ 24 pơlei găh dôm xăh sơlam păih Pơmơ̆t Gia Lai.

Đại tá Khuất Bá Cao, Bí thư Đảng ủy, Phŏ Tư lệnh Binh đoàn 15, ăn tơbăt: tơdrong et hơtŏk Hnam trưng Mầm non Sao Mai tơgop pơm lăp hăm ‘meh vă pơtho pơhrăm đơ̆ng kon oh kang ƀô̆, khŭl lĭnh, bơngai jang păng kon pơlei, pơjing tơdrong ‘lơ̆ng ăn hơtŏk tơiung kơjăp kơ tơring sơlam. Binh đoàn 15 ‘meh vă tơring, hnam trưng gô hơdai hăm Binh đoàn hơtŏk kơjăp kơjă kăp gĭt đơ̆ng hnam trưng.