Jang kiơ̆ trong jang đơ̆ng Anih tơm Chĭnh trĭ găh man hnam trưng hŏk ăn rim xăh sơlam, lơ̆m sơnăm ‘nâu, Đắk Lắk gô tơlĕch jang 3 tơdrong jang pơm hnam trưng hŏk teh đak rong ‘me hăm akŏp jên tơmơ̆t jang hloh 390 ti hlak jên. Dôm hnam trưng âu đei man tơ̆ 3 xăh sơlam Ia Lốp, Ia Rvê păng Buôn Đôn păng đei tơlĕch jang man ‘năr 2/11 truh.

Bí thư Đảng dêh char Lương Nguyễn Minh Triết akhan, Ia Lốp jĭ 1 lơ̆m 7 xăh ưh kơ tơmơ̆t hơdai kơ dêh char, đei tơring sơlam kơna đei tơdrong hiôk hai, tơjră hăm lơ long nol hai yua đơ̆ng tơring xă, kon pơlei oei sa hơtăih băl, kơsô̆ ŭnh hnam dơnuh hin păng vă jê̆ dơnuh hin oei lơ. Bí thư Đảng dêh char athei tơring lăng ƀôh rơđăh tơmam ‘lơ̆ng, hơmet pơ ‘lơ̆ng hơnih ưh kơ kĕ tơrăn, tơplih ‘nao đon tơchĕng vă hơtŏk tơiung kơjăp lơ̆m jăl jang ‘nao.