Tơ̆ tơring Ia Krêl, dêh char Gia Lai, Binh đoàn 15 (Hơnih tơm Ƀô̆ đô̆i vei lăng sơlam teh đak) ‘nao pơgơ̆r et hơtŏk păng pơjao Hnam trương Mân non Sao Mai pôk ăn kô pơtho păng hŏk tro tơring Ia Krêl, dêh char Gia Lai. ‘Nou jĭ mĭnh lơ̆m dôm hơnih ming man hnam trương hŏk mă Hơnih tơm Ƀô̆ đô̆i vei lăng sơlam Teh đak păng rim hơnih jang mơdro sa tơmam drăm khul ƀô̆ đô̆i iung jang tơ̆ tơring sơlam teh đak. Tơ̆ dêh char Gia Lai, hơnih ming man đei pơjao ăn Binh đoàn 15 tơlĕch jang ming man lơ̆m 5 khei. Hơnih ming man ou đei rim hơnih: Hnam bơ̆ jang kơ ƀok thây kô pơtho să 231m²; 2 hơnih hŏk pơhrăm să 800m² đei 5 lăm hŏk tơm ‘noh đei: hnam gŏ, hơnih pơtho pơhrăm, cham pơm ngôi, gara… sơđơ̆ng ăn tơdrong hŏk pơhrăm ăn hloh 300 ‘nu hơ ioh mâm non kơ 24 pơlei găh rim tơring sơlam teh đak păh Pơmơ̆t Tây Gia Lai.

Đại tá Khuất Bá Cao, Bí thư Đảng ủy, Kơ iĕng Kơdră chĕp pơgơ̆r Binh đoàn 15, tơbăt: tơdrong et hơtŏk Hnam trương Mầm non Sao Mai tơgop sơđơ̆ng ăn tơdrong ‘meh vă pơtho pơhrăm ăn kôn mon kon hơ ‘lơ̆p kơ kang ƀô̆, bơngai jang păng kon pơlei, pơjing hơyak ăn atŏk tơ iung kơjăp ‘lơ̆ng kơ tơring sơlam teh đak. Binh đoàn 15 hơpơi ‘meh vă tơring, hnam trương gô iung yak hơdoi hăm Binh đoàn atŏk kơtang jang ‘lơ̆ng kơ hnam trương:“Lơ̆m khei năr kơnh, Binh đoàn 15 gô hơnơ̆ng iung jang hơdoi hăm kơdră tơring păng Đoàn Kinh tế - Quốc phòng 75 lơ̆m vei lăng iŏk yoa hơnih ming man ƀlep tơdrong, jơnei, kơjăp ‘lơ̆ng; tơgŭm djru ming hơmet tơdăh đei hư răm ou to; vang vei lăng năng tông cham hnam trương rơgoh ‘lơ̆ng, pơjing rơvơn vă rim đe kôn mon kon sou đei hŏk pơhrăm ‘lơ̆ng hơ iă hloh”.

Vang năm pơm lêh et hơtŏk, kră pơlei Rah Lan Vọng - pơlei Ngol Le, tơring Ia Krêl, dêh char Gia Lai chơt hơ iă tơbăt, Hnam trương Mầm non Sao Mai tơgŭm ăn vei lăng năng tông, rong ‘me, pơtho pơhrăm ăn đe hơ ioh tơring sơlam teh đak ‘lơ̆ng hơ iă hloh, vă kon pơlei sơđơ̆ng jơhngơ̆m jang sa, vei kơjăp sơđơ̆ng dơ̆ng kơjăp tơring:“Hnam trương gơglơng gơlang, ‘lơ̆ng liĕm, kôn kon kon sou nhôn đei hŏk pơhrăm ‘lơ̆ng hơ iă, truh tơ̆p truh troch, đơ̆ng rŏng ou kơnh tih vơ̆ djơ̆ ‘lơ̆ng bơ̆ jang pơvih pơvăn ăn teh đak. Nhôn tôch chhôk hơ iă păng lui kơjăp lơ̆m Đảng păng Teh đak”.

Tơ̆ tơring sơlam teh đak Đức Cơ, dêh char Gia Lau, Hnam trương Mầm non 18-4 (găh Công ty 72, Binh đoàn 15) tih tên hăm 18 hnam trương sơdrai tôch môch lơ̆m 5 tơring. Dang ei hnam trương đei hloh 1.000 ‘nu đe mon hŏk pơhrăm, lơ̆m ou 1/3 ‘noh kôn mon kon sou bơngai kon kông. Đĭ đăng đe mon jei hŏk pơhrăm oei sa kơtă tơ̆ kơ ‘năr dơ̆ng ngăl. Hơdrô̆ đe kôn mon kon sou bơngai kon kông năm hŏk đĕch ưh kơ ăn kon jên hŏk. ‘Ngoăih kơ noh, Công ty 72 oei tơgŭm ăn mĭnh ‘mu mon 8.000 hlak jên, kon jên sŏng sa lơ̆m năr. Công ty jei mơng gre chă chơ đe mon năm hŏk rim năr.

Tơ̆ tơring sơlam teh đak Mô Rai (dêh char Quảng Ngãi), Công ty 78 (Binh đoàn 15) jei tơmơ̆t jên jang ming man hnam trương mân non ‘lơ̆ng liĕm, đei tôm tơmam drăm pơ yoa ăn pơtho hŏk pơhrăm. Vă pơjing rơvơn ăn rim ŭnh hnam kŏng nhân, bơngai jang đei kon hơ ‘lơ̆p oei ‘lơ̆p năm răih iŏk kơjăr ksu, đĭ đăng 11 hnam trương kơ yuơ công ty tơ iung pơjing ming man jei pơgơ̆r năm chơ đe kôn mon đơ̆ng hrôih năm hŏk pơhrăm. Tơ̆ rim hnam trương, Khul kơdră chĕp pơgơ̆r hnam trương jei pơjao 2 ‘nu kô pơtho pơlơ̆h dih băl jang sơng iŏk đe mon năm hŏk pơhrăm.

 Đại tá Khuất Bá Cao, Bí thư Đảng ủy, Kơ iĕng Kơdră chĕp pơgơ̆r Binh đoàn 15 tơbăt: “Hăm trong jang akŏm khul jang tơ iung pơjing tơdrong hŏk pơhrăm ‘lơ̆ng hơ iă ăn đe mon năm hok pơhrăm, Binh đoàn 15 hlôi pơjing 9 hnam trương mân non, 2 hnam rong hơ ioh, hăm 130 hơnih hnam trương lơ̆m tơring sơlam teh đak Tây Nguyên. Jô̆ hơtŏ rim sơnăm rim hnam trương hŏk sơng tơmơ̆t, rong ‘me, vei lăng năng tông hloh 4.500 ‘nu đe mon, lơ̆m ou đei hloh 2/3 ‘noh kôn mon kon sou bơngai kon kông. Atŭm hăm tơdrong akŏm pơm hơtŏk ‘lơ̆ng pơtho pơhrăm, khul  kang ƀô̆ vei lăng, ƀok thây kô pơtho, bơngai jang tơ̆ rim hnam trương mân non kơ Binh đoàn 15 oei iung jang đĭ ai chă pơtho tơbăt, pơrô̆ hơvơn kôn mon kon sou bơngai kon kông năm hŏk pơhrăm. Tơdrong hơdrin, tơnăp, phăl hơlăng, hơnăp jang kơtang đơ̆ng kang ƀô̆ Binh đoàn 15 hlôi hơmet pơ ‘lơ̆ng tơdrong tơnap tap, tơhlăk tơhlĭn vă vei lăng năng tông ăn kôn mon kon sou kon pơlei rim hơdrung lơ̆m tơring sơlam teh đak ‘lơ̆ng hơ iă hloh.