Gơmăng năr 6/4, hloh 1.500 ‘nu bơngai tang măt păng rơbou ‘nu kon pơlei dêh char Dak Lăk hlôi vang chă lăng ‘măng pơgơ̆r Joh ayŏ kơdŏ soang “Tơdrong hơri rơngei hiôk hian”, tơbăt 50 sơnăm Rơngei Tơring Pơbăh, Teh đak rơngei keh kong. Hăm tơdrong tơm tơbăt ăn jơnei Buôn Ma Thuột, jơnei blŭng a, pơjing hơyak pran kơtang ăn Jơnei tih tên Pơyan Puih mak 1975, vă jê̆ 250 ‘nu joh hơri, ƀô̆ đô̆i, kon pơlei vang joh hơri pơjing đei jơ ‘năr ‘lơ̆ng rŏ Chơt hơ iă Tây Nguyên rơngei păng yak hơyoh pơm rơngei Sài Gòn. Mŏ Nguyễn Thị Thúy Diễm, oei tơ̆ phương Tân An, pơlei tơm Buôn Ma Thuột tơbăt:“Pơgơ̆r ou tôch hơ iă. Pơ đĭ lơ̆m ŭnh hnam chhôk hơ iă năm lăng, ba ƀôh ‘lơ̆ng dêh păng lơ bơngai năm lăng, hơ iă dêh”.

‘Ngoăih lăng kiơ̆ hơyak kơ khul ƀô̆ đô̆i iung tơblăh pơm rơngei ‘moi kiơ̆ rim phim tai lĭu, rim bơngai tang măt păng tơmoi đei mơ̆ng nơ̆r pơma tơbăt đơ̆ng Trung tướng, Ƀô̆ đô̆i nuih mơng Đoàn Sinh Hưởng, Sơ̆ jang Đại đội trưởng Đại đội 9, Trung đoàn Gre nar 273, bơngai hlôi vơ̆r gre nar 980 tơblăh tơdrŭt lơ̆m kơđông 23 Việt Nam cộng hòa tơ̆ Buôn Ma Thuột, lơ̆m năr 10/3/1975.Gre nar 980, dang ei hlôi jing rup tơbăt ăn jơhngơ̆m pran joăt joe, lơ̆m hơnih man rup Jơnei Buôn Ma Thuột. Trung tướng Đoàn Sinh Hưởng tơbăt, ƀok hưch hanh hơmanh bơnê kơ yuơ 21 sơnăm iung tơblăh pơm rơngei teh đak, adoi hưch hanh hơmanh bơnê kơ yuơ dôm tơdrong iŏk đei jơnei lơ̆m pơđăm jĭt sơnăm ou ki:"Ba tôch hơ iă kơ yuơ đei vang iung tơblăh gĭt kăl ou atŭm hăm khul bôl boăl păng hlôi bơ̆ jang keh đang tơdrong jang. Đơ̆ng rŏng 50 sơnăm vih hơlơ̆k dơ̆ng tơ̆ ou ‘noh teh đak bơ̆n hlôi tơplih bơih păng mă kăl Buôn Ma Thuột dang ei pha bơih, ‘nou jĭ tơdrong hưch hanh hơmanh bơnê hloh". 

Tơ̆ Hnam trương Ƀô̆ đô̆i Quân khu 7 (quận 12, pơlei tơm Hồ Chí Minh) jei ‘nao pơgơ̆r ‘Măng Joh ayŏ kơdŏ soang kơkuh tơbăt 50 sơnăm Năr Rơngei tơring Pơbăh, teh đak rơngei keh kong hăm hơnăn “50 sơnăm - Pơyan puih teh đak”. Tơdrong pơgơ̆r ou hlôi tơƀôh hơdăh dôm tơdrong gĭt kăl dăr sơnăm kơ Năr Rơngei tơring Pơbăh, teh đak rơngei keh kong. Đơ̆ng noh sơkơ̆t hơdăh tơdrong chĕp pơgơ̆r trŏ lăp đơ̆ng Đảng păng Ƀok Hô; jơhngơ̆m pran kơtang păng nuih mơng đơ̆ng Ƀô̆ đô̆i bơ̆n păng Kon pơlei Việt Nam, khul tơgoăt tơgoăl hơdrĕch hơdrung. Adoi tơbăt hơdăh bôn bơnê tơdrong tơgop tih tên đơ̆ng rim khul hlôi iung tơblăh, plang ăn pham lĕch sĕch huŏng pơjing đei jơnei tih tên; pơm hơtŏk jơhngơ̆m đon ‘mêm kơ eng teh đak, hưch hanh hơmanh bơnê kơ kang ƀô̆, ƀô̆ đô̆i, Kon pơlei lơ̆m tơ iung pơjing păng vei lăng Teh đak, hơmet pơ ‘lơ̆ng teh đak, yak mơ̆t lơ̆m chăl atŏk tơ iung kơ hơdrĕch hơdrung. Ƀok Tô Văn Luận, bơngai jang tơgŭm pơtho tơblăh kơ Hơnih jang pơchoh trong bơ̆ jang Hnam trương Ƀô̆ đô̆i Quân khu 7 tơbăt: “Năr 30/4 jê̆ truh jing jơ ‘năr gĭt kăl hloh kơ Đảng, ƀô̆ đô̆i kŏng ang, kon pơlei. Kang ƀô̆ ƀô̆ đô̆i lơ̆m khul ƀô̆ đô̆i tŏk bŏk hưch hanh iung jang rim tơdrong pơgơ̆r vă tơbăt năr Jơnei. Hnam trương Ƀô̆ đô̆i Quân khu 7 jei pơgơ̆r lơ tơdrong jang, lơ̆m ou đei tơdrong pơm sơđơ̆ng khul vang năm pơm lêh tơbăt. Kơdih ba adoi nhen rim kang ƀô̆, ƀô̆ đô̆i păngh jơhnơr mơlôh ‘noh ‘moi kiơ̆ chă lăng rim phim tai lĭu adoi nhen đei hŏk pơhrăm, đĭ đăng rim bơngai jei hưch hanh hơmanh bơnê păng tôch bơnê kơ mĕ ƀă yă ƀok bơ̆n hlôi plang ăn pham lĕch sĕch huŏng kơ yuơ tơdrong rơngei ăn hơdrĕch hơdruing”.

Thượng úy Phạm Duy Hưng, Trung đội trưởng Đại đội Công binh Bộ Tư lệnh pơlei tơm HCM tơbăt:“Đơ đŭk lơ̆m jơhngơ̆m hloi mưh vă jê̆ truh năr lêh tih kơ kon pơlei lơ̆m teh đak pơma atŭm păng pơlei tơm HCM pơma hơdrô̆, tơbăt 50 sơnăm năr rơngei tơring pơbăh, Teh đak rơngei keh kong. Jĭ “ƀô̆ đô̆i Ƀok Hô” kơna ba ƀôh năr lêh ou lơ̆m teh đak jei trĕng lăng truh pơlei tơm, tơdrong jang ba sa roi tŏk loi dơ̆ng, adoi dăr lăng sơđơ̆ng ‘lơ̆ng hpơ iă ăn rim jơ pơgơ̆r pơm lêh adoi pơm sơđơ̆ng jơ ‘năr pơgơ̆r ‘lơ̆ng hơ iă hloh, ưh kơ lê̆ đei tơdrong ou to, ‘nou jing tơdrong jang tơm kơ ‘nhŏng oh ƀô̆ đô̆i kŏng ƀinh pơlei tơm”.

Kiơ̆ nơ̆r tơbăt đơ̆ng Trung tướng Đoàn Sinh Hưởng - Bơngai vơ̆r gre nar 980 tơblăh mơ̆t lơ̆m kơđông ayăt tơ̆ Buôn Ma Thuột, truh jơhngơ̆m đon hưch hanh hơmanh bơnê đơ̆ng kon pơlei păng ƀô̆i đô̆i chel hle hrei ou, rim tơdrong pơgơ̆r joh ayŏ kơdŏ soang hlôi jing gơng tơroh kloh klĕch ƀar păh chăl sơ̆ ki hăm hrei ou. Jơhngơ̆m đon Ƀô̆ đô̆i Ƀok Hô ling lang gei kơjăp lơ̆m ‘măng iung tơblăh nuih mơng pran kơtang mă oei lang să lơ̆m rim jơhngơ̆m đon ‘mêm kơ eng teh đak, dôm tơdrong jang ‘lơ̆ng rŏ kơ yuơ tơdrong atŏk tơ iung teh đak hrei ou.