Năr 11/3/1945, ‘măng iung tơblăh Ba Tơ jơnei. Năr 12/3/1945, Khul Du kích Ba Tơ đei pơjing hăm nơ̆r pơkăp tôch gĭt kăl: “Plang pham lĕch sĕch huŏng kơ yuơ Teh đak”.  “Pla ŭnh Ba Tơ” hlôi lang să jơ̆p tơring Tŏk bŏk. Khul Du kích Vũ Hùng (tơ̆ Quảng Nam), Khul vei lăng pla ŭnh Diêu Trì (tơ̆ Bình Định), Khul Vei lăng kơdih Tuy Hòa (tơ̆ Phú Yên), Khul Vei lăng kơdih Kông nhân Hòn Khói (tơ̆ Khánh Hòa) păng Khul Vei lăng kơdih iung tơblăh mir pơgar să Ca-da tơ̆ Dak lăk ... đei tơ iung pơjing. 

Jĭ đơ̆ng khul ou, khul ƀô̆ đô̆i Quân khu 5 hlôi pơjing, lơ̆m tơdrong joăt joe nuih mơng pran kơtang, pran kơjăp iăp kơtang yak hơyoh tơ̆ hơnăo. Ƀô̆ đô̆i kon pơlei nuih mơng, Trung tướng Nguyễn Trung Thu, Kơ iĕng Kơdră so pơchoh trong ăn Khul ƀô̆ đô̆i Kon pơlei Việt Nam, Kơdră so chĕp pơgơ̆r Quân khu 5 hơdơ̆r dơ̆ng dôm sơnăm tơblăh vang tang găn Mi:“Kang ƀô̆ ƀô̆ đô̆i păng kon pơlei Quân khu 5 đei jơhngơ̆m đon nuih mơng ưh kơ hli kơ Mi, kơrŭn đĭ ai tơblăh Mi păng pơrăm kĕ Mi. Khul kơdră chĕp pơgơ̆r đảng Khu 5 păng Khul kơdră chĕp pơgơ̆r Quân khu 5 tơlĕch trong pơgơ̆r “Trong ver pơlôch Mi”. ‘Nou jing minh trong pơm jang gơh hơgei, trŏ hăm tơdrong hơrih dang ei. Tơ̆ yơ đei khŭl linh Mi tơ̆ ‘noh đei “Hơnih tơblah Mi”. Bơ̆n akŏm khŭl linh vă pơvei tơblah tơpăi hơnih ayăt oei jang”.

Đơ̆ng rŏng teh đak đei iŏk jơnei rơngei, khŭl linh Quân khu 5 atŭm hăm Đảng, hăm tôm kon pơlei akŏm hơmet tơdrong răm đơ̆ng tơblah tơblŭng pơm ăn, plôih [ôm min, muih choh hơmet teh, brư̆ brư̆ pơm jang sơđơ̆ng tơdrong hơrih ăn kon pơlei. Lơ̆m  tơchơ̆t jang ‘nao, pơm jang sơnong jang kơ khŭl linh iung tơblah, khŭl linh iung pơm jang, khŭl linh vei sơđơ̆ng tơpôl Quân khu 5 pơtoi jang đei jơnei lơ tơdrong jang lơ̆m pơjing khŭl linh cách mạng hơbĕch hơbal, gơh hơgei kiơ̆ trong jang ‘nao, jang kiơ̆ tơdrong juăt jue păng đon bơnôh ‘lơ̆ng kơ “Ƀô̆ đô̆i Ƀok Hô”, tơgop atŭm hăm ƀô̆ đô̆i păng kon pơlei lơ̆m teh đak tơ iung pơjing păng vei lăng Teh đak Việt Nam xã hội chủ nghĩa. Trung tướng Lê Ngọc Hải, Kơdră chĕp kơ̆l Quân khu 5 sơkơ̆t hơdăh.“Khul ƀô̆ đô̆i Quân khu 5 ling lang atok tơ iung kơtang tôm tơdrong, hlôi tơlĕch jang kiơ̆ kơtang dôm trong bơ̆ jang đơ̆ng Đảng, đơ̆ng Teh đak, Quân ủy Trung ương, Hơnih tơm Ƀô̆ đô̆i, iung jang kơtang băt hơdăh tơdrong, jang hơdoi hăm kơdră đảng, kơdră chĕp pơgơ̆r tơring pơgơ̆r tơlĕch jang kiơ̆ tơdrong vei lăng sơđơ̆ng dơ̆ng kơjăp lơ̆m quân khu oei. Trong jang đĭ đăng kon pơlei vang vei lăng teh đak hăm trong jang kon pơlei vang vei lăng sơđơ̆ng păng trong jang kon pơlei vang vei lăng tơring sơlam roi năr roi đei hơmet pơ ‘lơ̆ng kơjăp iăp kơtang. Tơdrong pơtho pơhrăm tơblăh, kơchăng iung tơblăh, pơjing tơdrong oei sa trŏ lăp, jang kiơ̆ tơnăp trong tơlĕch jang ‘lơ̆ng hơ iă.

Tơ̆ yơ kon pơlei tơnap tap, tơ̆ noh đei Ƀô̆ đô̆i. Kang ƀô̆, khŭl ƀô̆ đô̆i Quân khu 5 jĭ khŭl jang mă blŭng đei măt tơ̆ dôm tơring 'mi kial đak hơbông pơrăm, tơring hli hlơt. Mă teh hơlih tơ̆ dôm tơring groi kông Đà Nẵng, Quảng Ngãi dah mă đak hơbông jơ̆p jang tơ̆ dêh char Gia Lai, Đăk Lăk, Khánh Hòa, ƀô̆ đô̆i adoi năm truh păng măng năr chă tơgŭm dŏng sar bar. Lơ̆m 'mi kial đak hơbông, kang ƀô̆, khŭl ƀô̆ đô̆i yak hloh tơdrong hli hlơt vă chă tơgŭm dŏng kon pơlei, hơmet pơ ‘lơ̆ng đơ̆ng 'mi kial đak hơbông, pơrang jĭ pơrăm,  păng tenh kuăng sơđơ̆ng tơdrong hơrih. Kang ƀô̆ păng kon pơlei rim dêh char tơring Tŏk bŏk tơroi gah sơnong jang tơnăp păng đon bơnôh 'lơ̆ng đe Ƀô̆ đô̆i Quân khu 5 thoi ou:“ 'Nhŏng oh kang ƀô̆ khŭl linh akŏm jang tơgŭm ăn unh hnam. Inh ƀrŏk lơ̆m jơhngơ̆m đon, păng hmach bơnê kơ đe ma ƀô̆ đô̆i”.

Hloh 80 sơnăm kơ ou, nơ̆r pơkăp  “Plang pham lĕch sĕch huŏng kơ yuơ Teh đak” đơ̆ng khŭl Du kích Ba Tơ khei năr sơ̆ pơtoi jing tơhnit unh tơ̆k ba trong chong glung, khơ̆ng bơblông lơ̆m jơhngơ̆m đon đe kang ƀô̆ păng khŭl ƀô̆ đô̆i Quân khu 5./.