Pơtoi kơ 'măng năm pơm jang tơ̆ Gia Lai, pơgê năr 28/4, Đại tướng Nguyễn Trọng Nghĩa, jang lơ̆m Hơnih tơm Chĭnh trĭ, Ƀĭ thư Trung ương Đảng, Kơdră Hơnih tơm Chĭnh trĭ Khŭl linh Kon pơlei Việt Nam atŭm hăm khul kơpal pơm jang kơ Trung ương hlôi truh hơpong ngôi, ăn tơmam kơ dôm unh hnam mă teh đak tơchơ̆t tơgŭm, bơngai đei kŏng lơ̆m dêh char ƀơ̆t tơbăt 51 sơnăm Năr tơblah jơnei tơring pơbah, rơngei teh đak.

Tơ̆ jơ tơƀơ̆p, khul hlôi pơjao 300 tơpu tơmam ăn dôm unh hnam mă teh đak tơchơ̆t tơgŭm, unh hnam hin dơnuh, bơngai jang đei tơdrong hơrih tơnap tap. Đại tướng ră hơdah, tơgŭm ăn bơngai đei kŏng jĭ sơnong jang chĭnh trĭ hơnơ̆ng đei Đảng păng Teh đak pơm jang, tơƀôh tơdrong pơm kiơ̆ “Nhă đak ƀlŏk kơ tu”, “Xa plei ƀlŏk kơ bơngai pơtăm 'long” đơ̆ng kon pơlei bơ̆n. Atŭm hăm noh athei rim jăl pơgơ̆r tơring pơtoi jang tơnăp tơdrong jang ƀlŏk bơnê, tơgŭm lơ hloh ăn tơdrong hơrih kơ dôm unh hnam mă teh đak tơchơ̆t tơgŭm, tơgop hơtŏk đon lui đơ̆ng kon pơlei, hơtŏk tơdrong tơguăt tơguăl tôm kon pơlei.

Pơgê 28/4, Khul jang đơ̆ng Trung ương yoa ƀok Nguyễn Thanh Nghị, Kơdră jang lơ̆m Anih tơm Chinh trĭ, Bí thư Trung ương Đảng, Kơdră Anih tơlĕch trong jang gĭt kăl kơ Trung ương chĕp kơ̆l năm ngôi, hơpăh tơmam ăn dôm unh hnam đei kŏng, unh hnam tơnuh păng bơngai jang đei tơdrong arih xa pơmat tat tơ̆ xăh Quảng Phú, dêh char Đắk Lắk. Khul hơpăh 80 tơpu tơmam vă tơgŭm, pơlung dôm bơngai ưh pŭn ai tơ̆ tơring.

Tơ̆ jơ tơƀâp, ƀok Nguyễn Thanh Nghị jet gia pơma nuh găh tơdỏng arih xa, jơhngâm pran kơ đe mih ma duch nă, đei nơ̆r pơlung, pơtruh nơ̆r pơma đơ̆ng kơdră chĕp kơ̆l Đảng păng teh đak truh hăm rim unh hnam oei pơma tat. Ƀok hơpơi ‘mĕh rim unh hnam hơtŏk tơdrong mât 1 ƀơ̆r đon, adrin choh jang xa, dar deh pơm sơđơ̆ng tơdrong arih, roi đunh roi hiôk jơnap. Pơma hơdăh tơ̆ hơnăp kơnh, rim anih jang kơpal gô hơnơ̆ng tơlĕch jang đei yoa ‘lơ̆ng dôm tơdrong tơgŭm lơ̆m tơpôl, pơm ‘lơ̆ng vă rim bơngai đei xa yoa đơ̆ng tơdrong jang tŏk pran, ưh kơ đei hŭt hơchăng bu tơ̆ rŏng.