Lơ bơngai tang măt lăng ‘lơ̆ng jơhngơ̆m đon jang tơnăp, tơdrong hơbĕch hơbal păng kơ tang đơ̆ng Quốc hội, Khŭl kơdră teh đak lơ̆m tơdrong tơtom hơmet ming trong jang tơgŭm thuê̆ vă hơmet pơ ‘lơ̆ng pơmat tat ăn anih mơdro sa, hơdai hăm rong vei jên thu mong ăn teh đak, yak truh tơdrong hơgăt jang tŏk lơ.

Găh kơsô̆ iŏk yua pŭ thuê̆, dôm nơ̆r tơgop athei kăl kơ jô̆ hơlen mă hơđăl kiơ̆ lơ̆m tơdrong hơlen lăng ƀơm truh tôm tong, vei sơđơ̆ng trŏ lăp hăm yan âu păng hơtŏ băl đơ̆ng rim bơngai, anih mơdro sa, kŭm nhen pơm lăp hăm kơsô̆ tơ jur bơngai sa yua đơ̆ng bơngai jang đei sa jên khei. Bơngai tang măt Phan Đức Hiếu (Khŭl Hưng Yên) athei hơgăt kơsô̆ ưh kơ iŏk thuê̆ đơ̆ng tŏ sĕt tôch ai 1 ti hlak jên truh lơ tôch ai 3 ti hlak jên, hơdai hăm apĭnh Quốc hội tơchơ̆t rơđăh kơsô̆ âu vă tơ jur pŭ trăp jên pơhoach pơm kiơ̆ ăn pơđĭ anih mơdro sa păng anih jang vei lăng.