Tơdrong tĕch mơdro tơtông, pơm tơlĕch tơmam ya, tơmam thơ thoi oei hơnơ̆ng kơtang. Đơ̆ng năr 15/12/2025 truh năr 14/3/2026, pơđĭ lơ̆m Hơnih jang vei lăng tơdrong tĕch răt hăm teh đak đe hlôi ƀôh, rôp gơ̆t păng xek phak hloh 4.800 ‘măng đe tĕch tơtông, pơgơ̆m mơdro sa păng chơ glăi tơmam drăm găn hloh sơlam teh đak, tŏk hloh 1.000 ‘măng, hơtŏ 26% pơtêng hăm dôm khei ou sơnăm 2025. Lơ̆m teh đak khul kŏng ang păng hơnih bơ̆ jang jei hơnơ̆ng ƀôh, xek tơlang lơ ‘măng pơm tơlĕch, tĕch mơdro tơmam drăm ya, tơmam drăm ưh kơ ‘lơ̆ng.

          Găh ‘ngoăih hop akom Kuô̆k hô̆i rim bơngai tang măt hôn bơnê kơtang tơdrong iung jang kơtang đơ̆ng hơnih bơ̆ jang găh ou lơ̆m iung tơjră phă pơrăm tơmam drăm ya, tơmam drăm thơthoi, tơmam drăm ưh kơ ‘lơ̆ng. Kiơ̆ đơ̆ng Trung tướng Phạm Công Nguyên, Kơdră chĕp pơgơ̆r Hơnih jang kiơ̆ Khôi luơ̆t păng hơmet ming bơ̆ jang, tư phap găh Hơnih tơm Kŏng ang - bơngai tang măt khul Thanh Hóa: hăm trong chĕp pơgơ̆r đơ̆ng Đảng, rim hơnih bơ̆ jang hlôi atŏk kơtang bơ̆ jang tơjră tang găn tơmam drăm ya, tơmam drăm thơthoi, tơmam drăm ưh kơ ‘lơ̆ng jĭ mĭnh lơ̆m dôm trong tơlĕch kăl hloh lơ̆m jăl hrei ou vă sơđơ̆ng ăn atŏk tơ iung mŭk drăm hơ iă, kơ jăp ‘lơ̆ng păng sơđơ̆ng ăn jơhngơ̆m pran jăng grăng akou kơ kon pơlei.“Mưh bơ̆n iung tơjră kơtang găn dôm tơmam drăm ya, tơmam drăm thơthoi, mă blŭng bơ̆n vei lăng năng tông tơdrong đei iŏk yoa kơ bơngai răt yoa. Mă ƀar ‘noh pơjing tơdrong tĕch răt ‘lơ̆ng hơ iă păng hơtŏ hơnơ̆ng. Tơdăh tơmam drăm ya, tơmam drăm thơthoi oei đei tĕch mơdro lơ ‘noh hơnih tĕch răt kơ dôm hơnih pơm tơlĕch tơmam drăm tơpă đei ƀơm kơnê̆. Tơdrong mă ‘noh đei ƀơm kơnê̆ kơtang truh trong jang atŏk tơ iung kơ hơnih mơdro sa, jang sa iŏk đei păng đei ƀơm kơnê̆ kơtang truh tơdrong atok tơ iung mŭk drăm tŏk ƀar kơsô̆. Iung tơjră hăm tơmam drăm ya, tơmam drăm thơthoi, tơmam drăm ưh kơ ‘lơ̆ng jĭ mĭnh lơ̆m dôm tơdrong jang kăl hloh lơ̆m chăl hrei ou. Pơjing đei tơdrong pơjei dih băl hơtŏ hơnơ̆ng hăm rim hơnih mơdro sa mă oei jing trong jang tang găn jĭ jăn, vei lăng năng tông jơhngơm pran jăng grăng ‘lơ̆ng, pơm tơjur kon jên jang pơgang.”

         Kơdră chĕp pơgơ̆r Khul hơnih mơdro sa iĕ păh păh ai Việt Nam, bơngai tang măt Nguyễn Văn Thân khul pơlei tơm Hồ Chí Minh tơbăt tơmam drăm ya, tơmam drăm thơthoi, tơmam drăm ưh kơ ‘lơ̆ng pơm kơnê̆ kơtang truh tơmam drăm tơpă, ‘lơ̆ng, pơm kơnê̆ truh rim hơnih mơdro sa tơpă, pơm hiong răm truh tơdrong jang mŭk drăm. Vă sơđơ̆ng ăn tŏk mŭk drăm ƀar kơsô̆ păng vei lăng năng tông jơhngơ̆m pran jăng grăng akou kơ kon pơlei, bơ̆ jang tang găn tĕch mơdro tơtông, mơdro sa pơgơ̆m, pơm tơlĕch tơmam drăm ya, tơmam drăm ưh kơ ‘lơ̆ng kăl hơnơ̆ng iung jang kơtang:“Dôm bơngai pơm tơlĕch tơpă, kon jên tơmơ̆t jang lơ ‘noh kơjă tĕch hăp tŏk ƀiơ̆. Mă lei tơmam drăm ya, tơmam drăm thơthoi, ‘noh kon jên tơmơ̆t jang tŏ sĕt. Tim mă pơma truh dôm tơmam drăm ou hăp pơm kơnê̆ truh jơhngơ̆m jăn, tơdrong hơrih sa kơ kon bơngai. Tơdăh, oei đei hơnơ̆ng tơmam drăm ya, tơmam drăm thơthoi lei vă kĕ tŏk mŭk drăm đơ̆ng yơ? Pơđĭ lơ̆m tơpôl ‘noh hăp jĭ pơrăm kơtang hloh. Kơna tơdrong tang găn tơmam drăm ya, tơmam drăm thơthoi jĭ mĭnh tơdrong jang gĭt kăl hloh. Mă ƀar dơ̆ng noh akŏm lơ̆m khul mơdro sa, akom dăr lăng lơ̆m rim shop. Găh lơ̆m mạng ‘noh ‘moi kiơ̆ khul bơ̆ jang vei lăng mạng.”

Rŏ năng vă pơma, iung tơjră hăm tơmam drăm ya, tơmam drăm thơthoi, tơmam drăm ưh kơ ‘lơ̆ng ưh khan tơdrong pơkoel kăl hloh vă vei lăng năng tông tơdrong đei iŏk yoa hơ iă ăn bơngai răt yoa, mă oei jing tơdrong kăl hloh vă tơ iung pơjing tơdrong mơdro sa ‘lơ̆ng hơ iă, tơpăt, hơtŏ hơnơ̆ng. Mưh hơnih mơdro sa “ ‘lơ̆ng hơ iă”, hơnih mơdro sa ‘lơ̆ng đei dơ̆ng jơhngơ̆m hiôk ăn atŏk tơ iung, tơdrong lui yom kơ kon pơlei đei hơmet pơ ‘lơ̆ng, đơ̆ng noh pơjing đei hơyak pran kơjăp iăp kơtang ăn tŏk mŭk drăm kơjăp ‘lơ̆ng, lăng truh tŏk mŭk drăm ƀar kơsô̆ lơ̆m khei năr kơnh. Mă lei, vă iŏk đei jơnei tơdrong ou, 'ngoăih tơdrong iung jang kơtang đơ̆ng rim khul bơ̆ jang, kăl đei vang iung jang hơdoi đơ̆ng rim hơnih mơdro sa păng rim bơngai răt yoa lơ̆m tơdrong pơma ưh hăm tơmam drăm ya, tơmam drăm thơthoi, tơgop tơ iung pơjing tơdrong tĕch mơdro ‘lơ̆ng hơ iă păng atŏk tơ iung đunh đai tai sơnăm.