Rim kơdră tang măt drơ̆ng nơ̆r hăm tơdrong kăl hloh hơmet ming, tơmơt dơ̆ng rim khôi luơ̆t vă pơm pơkeh khôi luơ̆t, trŏ lăp hăm tơdrong yan ou, mă kăl lơ̆m khei ‘năr atok kơtang tơplih kơsô̆, hơmet pơ ‘lơ̆ng trong bơ̆ jang păng tơ iung pơjing khul kơdră ƀar kâp.

Tơgop nơ̆r lơ̆m trong vă pơjing Khôi luơ̆t hơlen băt kơtơ̆ng ang, ƀok Bùi Thanh Toàn, Kơdră chĕp pơgơ̆r Hơnih vei lăng Khoa hŏk păng Kmăi kmŏk dêh char Dak Lăk akhan, kăl pơm hơdăh hloh dơ̆ng dôm tơdrong hơmet ming khôi luơ̆t, mă kăl găh hơnăn “hơnih bơ̆ jang teh đak” păng dôm bơngai gơh tơbăt ăn kơtơ̆ng ang. Tơdrong yan ou hrei ‘nou oei đei tơdrong pơjĭp hơnăp jang dăh mă veh ver ưh tơroi tơbăt kơtơ̆ng ang. Ƀok Bùi Thanh Toàn tơlĕch trong păng athei tơmơ̆t dơ̆ng tơdrong tơchơt hơdăh xek tơlang kơhret tơdrong pơm glăi, adoi nhen hơnăp jang kơ bơngai iŏk yoa kơtơ̆ng ang lăp đơ̆ng rŏng đei tơbăt ăn.“Tơchơ̆t tơlang pơm glăi ‘noh jĭ hlôi đei lơ̆m rim khôi luơ̆t, rim tơdrong tơchơ̆t anai. Mă lei kiơ̆ kơ ĭnh kăl pơm hơdăh hloh dơ̆ng lơ̆m khôi luơ̆t ou. Găh lơ̆m ou ‘noh lăp ƀôh hơnih pơtruh ăn kơtơ̆ng ang. Mưh lei bơngai tơbăt ăn kơtơ̆ng ang ‘noh lơ liơ? Pơtih gia ĭnh đei Hơnih jang A tơbăt ăn kơtơ̆ng ang, mălei đơ̆ng rŏng ‘noh ĭnh pơm glăi hăm kơtơ̆ng ang ‘noh lei xek tơlang ĭnh lơ liơ? Tơpă mơ̆n lơ̆m khôi luơ̆t ou ‘noh ưh kơ gơh vă tơchơ̆t hơdăh tơdrong xek tơlang, mă lei kăl đei nơ̆r pơma hơdăh ‘noh gô đei khôi luơ̆t anai xek tơlang ăn."

Jei găh tơdrong ou, mĭnh ƀar ‘nu bơngai tang măt athei kăl tơchơ̆t mă hơdăh hloh dơ̆ng rim tơdrong ưh kơ tơroi ăn rơhao kơtơ̆ng ang vă veh ver pơjĭp lơ̆m tơdrong akhan “tơdrong hrĕp teh đak”. Adoi, kăl tơbăt ăn kơtơ̆ng ang ‘moi kiơ̆ kmăi kmŏk kơsô̆ păng atŏk kơtang tơƀôh dih băl yưh lĭu ƀar păh rim hơnih bơ̆ jang. Dang ei oei đei tơdrong ‘gơ̆t” kơtơ̆ng ang ƀar păh rim hơnih jang, pơm ăn kon pơlei ưh kơ gan lăng ƀôh kơtơ̆ng ang.

Hăm Khôi luơ̆t Tơgŭm djru khôi luơ̆t, yă Lê Thị Thanh Thuỷ, Kơ iĕng Kơdră chĕp pơgơ̆r Hơnih jang Tư pháp Dak Lăk akhan, kăl pơih să khul vang băt păng pơm hơtŏk tơdrong jang pơvih pơvăn. Kơ yuơ lơ loh Khôi luơ̆t kăl tơmơ̆t dơ̆ng khul bơngai ‘lŏ kră hơdro po, dôm bơngai răm ŭnh hnam teh dong lơ̆m dôm bơngai kăl vă tơgŭm tơbăt ăn khôi luơ̆t tơtom hloh, adoi hơmet ming trong jang jên hu vă hơvơn đei lơ luơ̆t sư, bơngai joăt jang. “Tơdăh oei vei kơjăp kiơ̆ tơdrong tơchơt so lei tơnap mă hơvơn đei khul luơ̆t sư hơgei dăh mă dôm bơngai joăt jang khôi luơ̆t đei jơhngơ̆m đon ‘lơ̆ng vang iung jang lơ̆m tơgum tơbăt khôi luơ̆t, mă kăl ‘noh tơ̆ rim tơring tơnap tap, pơm kơnê̆ truh tơdrong jang ‘lơ̆ng pơvih pơvăn adoi nhen tơdrong gơh băt khôi luơ̆t kơ kon pơlei. Hơnih bơ̆ jang Tư pháp dêh char apĭnh athei tơ iung pơjing mĭnh tơdrong pơkăp găh kon jên hu sơđơ̆ng ăn bơ̆ jang tơgŭm tơbăt khôi luơ̆t, mă kăl tơ̆ tơring hơtăih yăih, tơring tơnap tap tơklep hăm trong tơgŭm trŏ lăp hăm dôm bơngai bơ̆ jang tơgŭm tơbăt khôi luơ̆t”.

Pơma pơtôch hop akŏm, yă Nguyễn Thị Thu Nguyệt, Kơ iĕng kơdră Khul kơdră tang măt Kuô̆k hô̆i dêh char Dak Lăk hôn bơnê kơtang hơnăp jang, nơ̆r tơgop trŏ lăp. Khul kơdră tang măt Kuô̆k hô̆i dêh char Dak Lăk gô chih akom tôm dôm nơ̆r tơgop vă chă tơchĕng hơlen, pơm pơkeh dôm tơdrong vang chă pơma dơnuh tơ̆ ‘măng hop akom Kuô̆k hô̆i ou, tơgop pơm hơtŏk đei ‘lơ̆ng rim trong vă pơjing khôi luơ̆t, sơđơ̆ng mưh pơjing tơlĕch jang kiơ̆ hrôih đei yak mơ̆t lơ̆m tơdrong oei sa yan ou, tơlĕch jang kiơ̆ ‘lơ̆ng hơ iă.