Dêh char Lâm Đồng lăp đơ̆ng rŏng hơgrop đei 5 tơring sơlam teh đak ‘noh đei Quảng Trực, Tuy Đức, Thuận Hạnh, Thuận An păng Dak Wil,  tơtil hăm teh đak Campuchia. Pêng hnam trương teh đak rong ‘me jăl mĭnh jăl ƀar đei ming man tơ̆ rim tơring Dak Wil, Thuận Hạnh păng Tuy Đức hăm akŏp kon jên tơmơ̆t jang dang 675 ti hlak jên. Trong ming man kơ loăi pơkăp ‘lơ̆ng mă III, hăm rim hnam kơjung đơ̆ng 1 truh 3 tăl. Khei ‘năr ming man đơ̆ng khei 3/2026 truh khei 8/2027. Mưh keh đang et hơtŏk, rim hnam trương gô sơng hơvơn dang 4.150 ‘nu hŏk tro đơ̆ng jăl Kơđeh truh jăl ƀar ‘noh kôn mon kon hơ ‘lơ̆p bơngai kon kông mơ̆t hŏk.

Tơ̆ tơring Dak Wil, ƀok Hồ Văn Mười, Kơdră chĕp pơgơ̆r Hơnih vei lăng kon pơlei dêh char Lâm Đồng athei tơngla tơmơ̆t jên jang, bơnghai iŏk ming man sơđơ̆ng iung jang ming man; rim hơnih bơ̆ jang proh hơmet khul ƀok thây kô pơtho, adoi tơring pơm hla bơar chih hơnăn mă tôm đe hŏk tro mơ̆t hŏk. Ƀok Hồ Văn Mười pơma hơdăh.“Athei tơngla tơmơ̆t jên jang, rim bơngai iŏk jang kăl iung jang hơdoi kơjăp, vă pơm lơ liơ tơlĕch jang ming man tĕnh koăng ƀlep trong tơlĕch ăn păng kơjăp ‘lơ̆ng ‘noh jing tơdrong kăl hloh. Hăm Hơnih vei lăng Hnam trương pơtho pơhrăm, bơ̆n kăl hơlen mă ‘lơ̆ng sơđơ̆ng đei tôm ƀok thây kô pơtho; dôm tơdrong tơmam drăm pơtho pơhrăm mă ‘lơ̆ng hơ iă; dăh mă tơdrong pơtho pơhrăm jơhngơ̆m đon, tơplŏng kơdou mă hơ iă. Pơm lơ liơ ‘nou jĭ hơnih pơtho pơhrăm trŏ lăp hăm tơdrong tơchơ̆t ‘lơ̆ng.”

Ƀok Hồ Văn Mười, Kơdră jang lơ̆m Trung ương Đảng, Kơdră chĕp pơgơ̆r Hơnih vei lăng kon pơlei dêh char iung pơma pơrô̆ jang tơ̆ hnam trương sơlam teh đak Dak Wil, dêh char Lâm Đồng.

Dak Wil đei hơgrop đơ̆ng ƀar tơring Ea Pô hăm Dak Wil (găh apŭng Cư̆ Jut, dêh char Dak Nông so). Tơdrong Đảng, Teh đak lăng ba tơmơ̆t jên jang ming man hnam trương hŏk pơhrăm gô tơgŭm ăn pơm hơtŏk tơdrong hlôh vao kơ kon pơlei, tơgop lơ̆m atŏk tơ iung mŭk drăm-tơpôl. Mă kăl, hăm rim đe oh hŏk tro, hnam trương teh đak rong ‘me jing tơdrong hơpơi ‘meh vă, hơnih rim đe oh oei sa, hŏk pơhrăm păng atŏk tơ iung tôm tong. Oh Nguyễn Trần Gia Linh, hŏk tro lăm 5, jĭ 1 lơ̆m 10 ‘nu hŏk tro hŏk hơgei kơ tơring Dak Wil, hlôi đei sơng iŏk kon jên hŏk pơhrăm lơ̆m jơ ‘năr pơgơ̆r ming man Hnam trương teh đak rong ‘me tơ̆ tơring Dak Wil, dêh char Lâm Đồng, pơma tơbăt jơhngơ̆m đon:“Năr ou năm tơ̆ ou ĭnh tôch chơt hơ iă sơng iŏk đei tơmam hơpăh păng kon jên hŏk pơhrăm. Sơnăm kơnh mơ̆t hŏk lăm 6, ĭnh gô hơdrin hŏk pơhrăm hloh dơ̆ng lơ̆m hnam trương ‘lơ̆ng liĕm, đei tôm tơmam drăm. Hnam trương đei tôm hơnih sŏng sa, hnam tep, hŏk pơhrăm, tơpă jĭ hơnih ‘lơ̆ng hơ iă hloh hăm nhôn. Ba gô hơdrin hŏk pơhrăm mă nŏng vă đei jing kô pơtho, hoei lao đon mĕ ƀă, rim đe mih ma kơdră chĕp pơgơ̆r Đảng, Teh đak hlôi lăng ba”.

Tơ̆ tơring Ea Bung, dêh char Dak Lăk hlôi pơm lêh iung jang ming man Hnam trương teh đak rong ‘me Jăl Mĭnh - Jăl Ƀar tơring Ea Bung. Hơnih ming man đei kon jên tơmơ̆t jang dang 250 ti hlak jên đơ̆ng kon jên Trung ương păng tơring, ming man lơ̆m hơgăt teh 6ha tơ̆ thôn 1. Mưh keh đang, hnam trương gô sơđơ̆ng ăn tơdrong ‘meh vă hŏk pơhrăm ăn hloh 1.300 ‘nu hŏk tro ‘noh kôn mon kon hơ ‘lơ̆p bơngai kon kông tơring sơlam teh đak. Ƀok Phạm Thủy Tiên, Kơdră chĕp pơgơ̆r Jơnŭm vei lăng kon pơlei tơring Ea Bŭng tơbăt, tơring Ea Bŭng đei pơjing ‘moi kiơ̆ hơgrop ƀar tơring Ea Bŭng hăm Ia Tờ Mốt, groi teh să, măt bơngai kon pơlei kơtoei, tơdrong chă yak năm hŏk pơhrăm kơ hŏk tro, mă kăl lơ̆m pơyan ‘mi oei tôch mơmat tat. Tơdrong tơmơ̆t jên ming man hnam trương teh đak rong ‘me đei hơmŏ pơjing hơyak tơplih kơtang lơ̆m atŏk kơtang jang ‘lơ̆ng lơ̆m pơtho pơhrăm ăn tơring sơlam teh đak.“Trong bơ̆ jang đơ̆ng Đảng păng Teh đak tơmơ̆t jên jang ăn tơring Ea Bŭng găh hnam trương ou kon pơlei jĭ tôch chhôk hơ iă. Đei hnam trương ou ‘noh mă blŭng kôn mon kon sou đei hŏk pơhrăm sơđơ̆ng păng hơnih hŏk sơđơ̆ng păng tơdrong chă yơ yak vei lăng năng tông đe oh ‘lơ̆ng hơ iă hloh dơ̆ng. Nhôn lui akhan, kôn mon kon sou oei tơ̆ tơring sơlam teh đak ou khei năr kơnh gô đei vei lăng năng tông, pơtho pơhrăm ‘lơ̆ng hơ iă hloh dơ̆ng vă lăng truh hơnô̆ hơnăp kơnh tơring sơlam Teh đak gô đei sơđơ̆ng kơjăp iăp kơtang hloh dơ̆ng.”

Quảng Ngãi ‘noh mĭnh lơ̆m 17 dêh char sơlam teh đak tơ groi teh lơ̆m teh đak hrơ̆p mĭnh ‘măng pơgơ̆r pơm lêh iung jang ming man hnam trương hŏk. 5 tơdrong vă jang Hnam trương teh đak rong ‘me Jăl kơđeh-Jăl ƀar đei iung jang ming man lơ̆m pơgê ou tơ̆ rim tơring: Bờ Y, Ia Tơi, Ia Đal, Đak Long păng Đak Plô, dêh char Quảng Ngãi, akŏp kon jên ming man hloh 1.116 ti hlak jên. Mĭnh hnam trương đei ming man lơ̆m hơgăt teh să 5ha, hơvơn hŏk tro mơ̆t hŏk pơhrăm đơ̆ng 700 truh 1.600 ‘nu hŏk tro, trŏ lăp hăm dôm tơdrong đei lơ̆m tơring. Rim tơdrong vă jang đei tơlĕch jang kiơ̆ trong hnam trương teh đak rong ‘me Jăl kơđeh-jăl ƀar, tơklep hăm proh hơmet dơ̆ng hnam trương lăm hŏk, pơm dă ƀiơ̆ đei hnam trương hơdrô̆ hơdrăn, pơjing đei rim hnam trương akŏm lơ. Yă Y Ngọc, Kơ iĕng Kơdră chĕp pơgơ̆r Hơnih vei lăng kon pơlei dêh char Quảng Ngãi tơbăt, tơdrong tơ iung pơjing rim hnam trương hŏk ou gô tơgop pơm hơtŏk ‘lơ̆ng pơtho pơhrăm tơ̆ tơring sơlam teh đak tơ̆ groi teh:“Mưh keh đang păng tơmơ̆t iŏk yoa, Hnam trương teh đak rong ‘me Jăl kơđeh-Jăl ƀar tơring Bờ Y păng rim tơring jei vang iung jang ming man lơ̆m năr ou hlôi jing mĭnh lơ̆m dôm hnam trương pơtho pơhrăm ‘lơ̆ng hơ iă hloh, hơnih rong đei tơdrong hơpơi ‘meh vă, tơgop lơ̆m pơtho pơjing khul bơ̆ jang ăn atŏk tơ iung kơ tơring păng dêh char bơ̆n”.