Kơ iĕng Kơdră chĕp pơgơr Kuô̆k hô̆i, Nguyễn Thị Thanh tơbăt: ‘măng pôk rơih Kơdră tang măt Kuô̆k hô̆i jăl XVI păng kơdră tang măt Jơnŭm vei lăng kon pơlei rim kâp jăl jang 2026-2031 hlôi đei pơgơ̆r ‘lơ̆ng hơ iă, tơpăt, trŏ ƀlep khôi luơ̆t, sơđơ̆ng, pơkom păng hlôi keh kong ‘lơ̆ng liĕm, tơpă jĭ Năr lêh teh đak, năr lêh tih kơ pơđĭ lơ̆m kon pơlei. ‘Nou jĭ tơdrong jang chinh trĭ git kăl hăm trong hơmet ăn tĕnh koăng, hơlen tôch brĕ hăm hơnăp jang kơtang, tơdrong vang kơrŭn mĭnh jơhngơ̆m đon đơ̆ng pơđĭ khul jang chinh trĭ đơ̆ng Trung ương truh tơ̆ tơring.“Pơtôch ‘lơ̆ng liĕm kơ ‘măng pôk rơih jĭ tơƀôh hơdăh ăn tơdrong pran kơtang đơ̆ng tơdrong tơgoăt pôm nơ̆r ƀơ̆r đon kơjăp lơ̆m hơdrĕch hơdrung, găh trong chĕp pơgơ̆r gơh hơgei kơ Đảng păng jang ‘lơ̆ng đơ̆ng pơđĭ khul chinh trĭ; adoi ‘moi kiơ̆ đơ̆ng ou jei sơkơ̆t hơdăh jơhngơ̆m đon lui yom kơjăp đơ̆ng Kon pơlei hăm Đảng, Teh đak”.

Găh pơtôch ‘măng pôk rơih kơdră tang măt Kuô̆k hôi, lơ̆m teh đak đei pôk tơmơ̆t tôm 500 ‘nu bơngai tang măt đơ̆ng 863 ‘nu bơngai pơjei. Lơ̆m ou, 214 ‘nu bơngai tang măt kơ yuơ Trung ương pơtruh ăn đei mơ̆t pơm kơdră tang măt, jơnei lơ. Trong proh hơmet khul tang măt hơnơ̆ng đei tơplih hơ iă kiơ̆ trong pơm tơjur bơngai tang măt iŏk jang lơ tơdrong, atŏk lơ khul kơdră chĕp pơgơ̆r. Măt bơngai tang măt Kuô̆k hô̆i đei iung jang mĭnh tơdrong jang găh ou đei lơ hloh đơ̆ng sơ̆ truh dang ei, jơnei 40%. Mă kăl, Kuô̆k hôi jăl XVI hăm lơ trong ‘nao lơ̆m proh hơmet khul tang măt: ‘măng mă blŭng đei bơngai tang măt kơ hơdrung Ơ Đu đei mơ̆t pơm kơdră tang măt; măt bơngai drŏ kăn pơm kơdră tang măt jơnei 30%, hơnơ̆ng vei kơjăp lơm măt bơngai lơ. ‘Nou jĭ ‘măng mă blŭng măt bơngai tang măt kơ yuơ Trung ương pơtruh ăn tơ̆ tơring đei mơt pơm kơdră tang măt nhen lĕ vă tôm bơngai. Ƀok Lê Ngọc Chung, bơngai tăh hla phương Phước Thắng (Bà Rịa - Vũng Tàu so), pơlei tơm HCM hiôk chơt kơ yuơ rim bơngai tang măt Kuô̆k hôi đei pôk tơmơt ‘măng mă ou jĭ tôch trŏ lăp ... đei lơ bơngai mơ̆t pơm dơ̆ng, bơ̆ jang chinh trĭ, tơdrong jang hơgei, lơ bơngai tang măt ‘noh bơngai kon kông. “Jĭ mĭnh ‘nu bơngai tang măt ba ƀôh lơ lou, lơ̆m hơnăn rim bơngai tang măt Kuô̆k hô̆i ‘nao tơbăt hơdăh đei tôm khul bơngai, truh hloi lơ̆m tơdrong jang chinh trĭ, ‘noh khul joh hơri, khul mơdro sa, khul ƀô̆ đô̆i kŏng ang. ‘nou jĭ mĭnh tơdrong tôch hơ iă, tơƀôh hơdăh tôm tong lơ̆m khul pơm kơdră tang măt Kuô̆k hô̆i. Păng mă kăl, hăm hơnăp jang jĭ dôm bơngai tăh hla tơ̆ hơnăp mĭnh tơdrong hơ iă hle kơ teh đak, ba hơpơi ‘meh vă dôm bơngai tang măt ‘nao đei pôk tơmơ̆t iung jang mă tơnăp, phăl hơlăng, gơh hơgei. Tơgăl jĭ bơngai tang măt tơpă kơ kon pơlei vă tơgop lơm rim trong jang, hơnhăk teh đak yak pran kơjăp iăp kơtang lơ̆m chăl hle”.

Hơlen găh tơdrong ‘lơ̆ng, proh hơmet bơngai tang măt đei pôk tơmơ̆t pơm kơdră tang măt Kuô̆k hô̆i jăl 16, yă Tạ Thị Yên, Kơ iĕng Kơdră chĕp pơgơ̆r Hơnih bơ̆ jang vei lăng bơngai tang măt, Kơ iĕng Kơdră bơ̆ jang lơ̆m Jơnŭm pôk rơih teh đak pơma hơdăh: “Tơdrong ‘lơ̆ng jang gơh kơ bơngai tang măt đei pôk tơmơ̆t hơnơ̆ng tŏk kơtang. Proh hơmet khul kơdră tang măt ‘noh hlôi sơđơ̆ng tơdrong tang măt kơ rim khul păng jei đei hơyak kăl tŏk lơ bơngai tang măt hŏk jrŭ adoi nhen tơdrong trŏ lăp găh bơngai tang măt ‘noh bơngai drŏ kăn, đơ̆ng noh bơngai tang măt sơnăm mơlôh bơngai kon kông”.

Jơnŭm pôk rơih teh đak hơlen, ‘măng pôk rơih hlôi jơnei keh kong, sơđơ̆ng hơtŏ hơnơ̆ng, tơpăt, trŏ ƀlep khôi luơ̆t păng sơđơ̆ng ‘lơ̆ng. Tơdrong chĕp pơgơ̆r, pơrô̆ jang kơtang đơ̆ng Đảng ‘noh jĭ kăl hloh lơ̆m sơđơ̆ng keh kong pôk rơih. Adoi lăng kơjăp pơtho ming tơdrong jang, atok kơtang dăr lăng, lăng hơlen, tơtom xek tơlang dôm tơdrong tơhlăk tơhlin lơ̆m pơgơ̆r jang kiơ̆. Ƀok Nguyễn Hữu Đông, Kơdră chĕp pơgơ̆r Hơnih bơ̆ jang vei lăng bơngai tang măt, kơdră jang lơ̆m Jơnŭm pôk rơih teh đak sơkơ̆t hơdăh:“Pơtôch pôk rơih tôm 500 ‘nu bơngai tangmăt Kuô̆k hô̆i, 2.552 ‘nu bơngai tang măt Jơnŭm, vei lăng kon pơlei rim kâp păng hloh 72.437 bơngai tang măt Jơnŭm vei lăng kon pơlei tơring, hlôi sơkơ̆t hơdăh bơ̆ jang hơlen khul jang đei hơmet tôch kơ ‘lơ̆ng, tơpăt, ƀlep khôi luơ̆t. Măt bơngai tăh hla lơ, măt bơngai tah hla năm tăh hla lơ hloh đơ̆ng sơ̆ truh dang ei hlôi tơƀôh hơdăh jơhngơ̆m đon hlôh vao chinh trĭ, hơnăp jang kơ kon pơlei tôch kơtang; bơ̆ jang chĕp pơgơ̆r, pơrô̆ jang kiơ̆ đơ̆ng rim hơnih đảng, kơdră tơring rim kâp đei tơlĕch iung jang kơtang; bơ̆ jang tơroi tơbăt, pơrô̆ pơrôp đei pơgơ̆r jơ̆p jang, jơnei ‘lơ̆ng”.

Hăm tơdrong jơnei keh kong kơ ‘măng pôk rơih, hơnơ̆ng sơkơ̆t hơdăh jơhngơ̆m đon lui yom păng drơ̆ng mĭnh nơ̆r kơtang đơ̆ng kon pơlei hăm Đảng, teh đak, pơjing hơyak pran kơjăp iăp kơtang ăn Kuô̆k hô̆i jăl XVI bơ̆ jang ‘lơ̆ng hơnăp jang lơ̆m chăl ‘nao.