Pơma pơtôch hop akŏm mă 56 kơ Anih chĕp kơ̆l pơgơ̆r Quốc hội, hop akŏm mă hơtuch kơ Quốc hội jăl 15, Kơdră Quốc hội Trần Thanh Mẫn pơma hơdăh, lơ̆m jăl jang âu ki, Anih chĕp kơ̆l pơgơ̆r Quốc hội hơnơ̆ng mât 1 ƀơ̆r đon, adrin tôch ai, jang tôch tơnăp, vang jang hơdoi kơjăp hăm Khul kơdră teh đak, dôm anih jang kơpal tơlĕch lơ tơdrong jang tih, gĭt kăl, lơ̆m noh đei lơ tơdrong jang đơ̆ng sơ̆ tam mă đei, jang tôch pơmat, vang tơgop ăn tơdrong jơnei atŭm kơ Quốc hội jăl XV păng tơdrong jang tŏk atŭm kơ teh đak.

Kơdră Quốc hội Trần Thanh Mẫn pơma hơdăh, truh dang ei, tơdrong hơmet ăn Hop akŏm mă 1, Quốc hội jăl XVI đĭ vă đang ‘lơ̆ng bơih, đei hơmet tôch hơlen ‘moi kiơ̆ dôm trong jang tih đơ̆ng Đảng, lăp hăm yăn âu păng trŏ tơdrong hơgăt đơ̆ng luơ̆t. Kơdră Quốc hội Trần Thanh Mẫn tơtă, mă đơ̆ng jăl jang XV vă tôch bơih, mă lei hơnăp jang đơ̆ng Anih chĕp kơ̆l pơgơ̆r Quốc hội, dôm anih jang kơ Quốc hội oei tôch lơ, đơ̆ng dang ei klĕp truh Quốc hội pôk rơih đei Kơdră jang lơ̆m Anih chĕp kơ̆l pơgơ̆r Quốc hội păng hơmet pơ ‘lơ̆ng rim anih jang kơ Quốc hội jăl XVI, jang ‘lơ̆ng tơdrong pơjao hơnăp jang kơplăh 2 jăl jang.