Kiơ̆ Hơnih jang Pơtho Pơhrăm dêh char Khánh Hòa, dang ei lơ̆m dêh char đei hloh 64.000 hŏk tro kon kông, lơ̆m noh jăl kơđeh đei hloh 28.000 oh. Gah tơring Pơbah kơ dêh char (tơring Ninh Thuận so), đei hloh 60% hŏk tro jăl kơđeh noh bơngai kon kông.

Yă Lê Thái Trường Thi, Phŏ Kơdră Hơnih jang Pơtho Pơhrăm dêh char Khánh Hòa ăn tơbăt, hơdrol ki yuơ jên mong oei tŏ sĕt, dêh char Ninh Thuận so hơdrô̆ pơtơm jang đei minh ƀar tơchơ̆t tơgŭm phe ăn hŏk tro oei ah ‘năr dơ̆ng păng jên hŏk ăn hŏk tro kon kông, lơ̆m kơplah lơ tơchơ̆t tơgŭm nai tam mă jang keh đang. Đơ̆ng rŏng tơmơ̆t hơdai 2 dêh char đơ̆ng năr 1/7/2025, tơdrong tơlĕch jang kiơ̆ dôm tơchơ̆t tơgŭm tam mă jang tom. Yă Lê Thái Trường Thi, tơroi: “Tơdrong pơm kiơ̆ Tơchơ̆t drơ̆ng nơ̆r atŭm oei đei lơ tơdrong tơrĕk truh jên jang, tơchơ̆t jang. Kơlih tơrĕk truh pơtho hŏk pơgê kơsơ̆ lơ̆m minh năr, bơngai pơtho, hơnih pơtho, tơdrong pai xa... lơ tơdrong đei tơrĕk truh sŏng xa ‘năr dơ̆ng ăn đe mon. Oei lơ tơnap tap dêh. Tơring Ninh Thuận so, đei lơ tơring tam mă gơh pơtho hloi pơgê kơsơ̆ lơ̆m minh năr”.

Đơ̆ng rŏng kơ VOV chih tơroi gah tơdrong mă hŏk tro tơring gah Pơbah Khánh Hòa tam mă đei xa yua tơchơ̆t tơgŭm sŏng xa ah ‘năr dơ̆ng, Hơnih jang vei lăng kon pơlei dêh char Khánh Hòa ăn tơbăt hlôi pơjao ăn Hơnih jang Pơtho Pơhrăm chă hơlen chih akŏm tôm tơchơ̆t tơgŭm pơtho pơhrăm kơ 2 tơring hơdrol ki, đơ̆ng noh tơgŭm chih akŏm dôm tơchơ̆t ‘nao pơtruh ăn Hô̆i đŏng kon pơlei dêh char. Tơdrong chih akŏm lơ̆m dôm tơchơ̆t tơgŭm đe hŏk tro tơring tơnap tap nhen jên hŏk ăn hŏk tro kon kông, tơgŭm jên hŏk, asong đak toh tơ̆ hnam trưng, atŭm hăm dôm tơchơ̆t tơgŭm oei ah kơ-‘năr păng hơtŏk ‘lơ̆ng tơdrong hŏk pơhrăm ăn hŏk tro tơring kon kông. Tơdrong chih akŏm dôm tơchơ̆t ‘nao vă pơm kơđeh ƀiơ̆ tơdrong ưh hơtŏ lơ̆m xa yua tơchơ̆t tơgŭm đơ̆ng dôm tơring, vei sơđơ̆ng ăn hŏk tro lơ̆m jơ̆p dêh char Khánh Hòa đơ̆ng rŏng tơmơ̆t hơdai gơh đei hŏk pơhrăm păng vei lăng tơdrong grăng pran ăn jơhngơ̆m jăn gơh ‘lơ̆ng tơnăp hloh.

Ƀok Nguyễn Thanh Hà, Phŏ Kơdră Hơnih jang vei lăng kon pơlei dêh char Khánh Hòa ăn tơbăt, dôm tơchơ̆t kơchĕng gô đei Hô̆i đŏng kon pơlei dêh char Khánh Hòa pơma đam ah ‘măng hop akŏm truh, đơ̆ng rŏng kơ noh tơlĕch jang lơ̆m jơ̆p dêh char, mă kăl akŏm ăn tơring kon kông păng tơring oei ƀơm lơ tơnap tap: “Tơdrong tơgŭm jên xa ‘năr dơ̆ng ăn hŏk tro kon kông đei pơyua tơnăp. Tơgŭm ăn đe oh hŏk pơhrăm sơđơ̆ng, tơgŭm ăn đe oh năm hŏk, tơgŭm dôm unh hnam oei tơnap tap. Kiơ̆ đơ̆ng noh tơgŭm ăn đe oh gơh grăng pran, hơtŏk ‘lơ̆ng tôm tơdrong, jơhngơ̆m jăn pran ‘lơ̆ng vă pơtoi kơ tơdrong hŏk hơpơi ‘meh kơ po”.