Năr ‘nâu (20/4), Quốc hội jăl XVI pơtơm ‘Măng mă 2 ‘Măng hop akŏm mă mônh. Khŭl kơdră teh đak gô tơroi tơdrong pơjing pơlei tơm Đồng Nai găh Trung ương. ‘Măng mă 2 ‘măng hop akŏm mă mônh, Quốc hội jăl XVI pơgơ̆r đơ̆ng năr ‘nâu (20/4) truh đĭ ‘năr 23/4. Quốc hội gô ăn tơgop nơ̆r lơ tơdrong gĭt kăl păng pơgơ̆r yơ̆r ti pơdrơ̆ng kiơ̆ dôm luơ̆t hlôi đei bơngai tang măt Quốc hội tơgop nơ̆r tơ̆ ‘măng mă 1. Kiơ̆ tơdrong jang, pơgê ‘nâu, Kơdră Anih tơm vei lăng găh Joh ayŏ, Tơplŏng kơdâu păng Tơmang lăng, kiơ̆ athei đơ̆ng Thủ tướng teh đak, tơroi hla ar găh tơdrong tơchơ̆t đơ̆ng Quốc hội găh 1,2 trong jang, tơdrong tơgŭm ‘lơ̆ng hơtŏk tơiung joh ayŏ Việt Nam.

Kŭm lơ̆m pơgê ‘nâu, dôm bơngai tang măt pơma dơnuh tơ̆ Grŭp găh hla ar chih ming Tơdrong đơ̆ng Quốc hội găh 1,2 trong jang, tơdrong tơgŭm ‘lơ̆ng hơtŏk tơiung joh ayŏ Việt Nam; Hla ar chih ming tơdrong tơchơ̆t đơ̆ng Quốc hội găh bơ̆jang kiơ̆ pơlong tơchơ̆t luơ̆t sư teh đak; Hla ar chih ming tơdrong Tơchơ̆t đơ̆ng Quốc hội găh tơdrong pơjing pơlei tơm Đồng Nai găh Trung ương.