Truh dang ei, rim hơnih jang tơm păng rim tơring hlôi keh đang hla bar pơkăp asong jê̆ 13 rơbou tih hlj mong đơ̆ng trung ương sơnăm 2025 vă pơm jang ăn sơnăm 2026; mă lei, kơsô̆ jên hlôi asong 'nao đei pơhlom 540 tih hlj. Sơkơ̆t pơtôch hop akŏm, Phŏ Thủ tướng ră hơdah tơdrong kăp gĭt kơ dôm tơdrong jang pơjing tơring tơrang 'nao, tơjur hin dơnuh kơjăp sơđơ̆ng păng hơtŏk tơ-iung tơring kon pơlei kon kông, groi kông, mă kăl noh hăm tơring tơnap tap, tơring hơtaih yaih.

Phŏ Thủ tướng pơgơ̆r hăm rim hơnih jang tơm, rim tơring athei hơtŏk sơnong jang, tơdrong jang, vei sơđơ̆ng ăn kon pơlei dah hrôih đei xa yua tơchơ̆t tơgŭm, ưh đei gô chang, gơnơm; atŭm hăm noh tenh kuăng keh đang tơdrong pơgơ̆r jang, hơnih juăt jang păng hơnih tơgŭm hơtŏk jang đei jơnei lơ̆m pơm jang.