Ăn tơgop nơ̆r găh Tơdrong vă pơjing Khôi luơ̆t hơmet ming, tơmơt dơ̆ng mĭnh ƀar apăng kơ Khôi luơ̆t Tơgŭm tơbăt khôi luơ̆t, trong tơchơ̆t đei lang să dôm khul đei tơgum tơbăt khôi luơ̆t đei lơ nơ̆r tơgop đơ̆ng kơdră tang măt Kuô̆k hô̆i. Kiơ̆ đơ̆ng rim kơdră tang măt, tơdrong tơchơ̆t ou ưh khan lăp đei ƀơm truh ‘lơ̆ng hơ iă lơ̆m tơdrong vă kơ băt khôi luơ̆t mă oei tơƀôh hơdăh tơdrong atŏk tơ iung mŭk drăm tơpôl kơ teh đak. Lăp đon hăm tơmơ̆t dơ̆ng khul đei tơgŭm tơbăt ăn đĕch khôi luơ̆t, mă lei bơngai tang măt Lý Anh Thư, khul An Giang tơlĕch nơ̆r pơma:“ Tơdrong tơchơ̆t trong jang chă pơtho ăn đĕch khôi luơ̆t hlôi tơƀôh hơdăh tơdrong đei ƀơm truh hăm kon jên jang teh đak; tim mă hơlen hơdăh tôm tong rim khul ‘meh vă mă lei ưh kơ lơ̆m vă chă pơtho tơbăt tơgŭm ăn đĕch. Kơ yuơ lơ loh, ĭnh athei hơnih bơ̆ jang chih tơlech chă tơchĕng hơlen tơmơ̆t dơ̆n tơdrong tơchơ̆t tơjur kon jên hơpăh lơm tơdrong hơvơh tơgŭm tơbăt khôi luơ̆t ‘ngoăih kơ trong tơchơ̆t chă pơtho tơbăt ăn đĕch dang ei hlôi đei pơjing kiơ̆ trong: Pơih să khul đei tơgum tơbăt khôi luơ̆t hăm kon jên hơpăh ăn trŏ lăp. ‘Ngoăih dôm bơngai jang sa đei iŏk yoa tŏ sĕt đei tơgŭm tơbăt ăn đĕch, bơngai năm jang tơ̆ tơring anai dăh mă bơngai kon kông, đe sư jei ‘meh vă đei tơdrong tơgŭm tŏ sĕt găh kon jên hơpăh vă  đei băt khôi luơ̆t hơtŏ hơnơ̆ng”.

Pơma hơdăh, trong tơlech tuch luch kơ trong jang tơgum djru ‘noh iŏk đei jơnei vei lăng tơdrong đei iŏk yoa ăn dôm bơngai đei tơgum tơbăt khôi luơ̆t, bơngai tang măt Cao Thị Xuân, khul Thanh Hóa akhan, kăl tơplih đơ̆ng sơđơ̆ng đei pơvih pơvăn jing sơđơ̆ng ‘lơ̆ng kơ pơvih pơvăn: “Đei ƀôh lơ̆m tơring nhôn, kon pơlei ưh khan lăp ‘meh vă đei tơgum tơbăt ăn, mă oei kăl đei tơgŭm tơbăt truh tôch, vei lăng tơdrong tơpă trŏ ƀlep. Tơdăh ưh, tơdrong lui yom lơ̆m khôi luơ̆t pă gan kơtang. Kơ yuơ lơ loh, ĭnh athei tơdrong vă pơjing Khôi luơ̆t kăl lăng ba kơjăp hloh dơ̆ng truh tơdrong hơmet pơ ‘lơ̆ng khôi luơ̆t rim trong pơkăp găh ‘lơ̆ng pơvih pơvăn tơgŭm tơbăt khôi luơ̆t. Adoi chă tơchĕng hơlen trong jang lăng hơlen tơpăt, tơklep hăm hơnăp jang hơdăh kơ bơngai jang tơgum tơbăt ăn khôi luơ̆t, đơ̆ng noh sơđơ̆ng ƀlep tơdrong tơpăt, veh ver jang koă kơ lê̆”.

Găh trong anai, bơngai tang măt Nguyễn Thị Yến Nhi, khul Vĩnh Long athei, hơnih pơm tơlĕch chă tơcheng hơlen, khôi luơ̆t tơlĕch pơjing khul jang hơdoi rim hơnih bơ̆ jang jang tơgum tơbăt khôi luơ̆t lơ̆m tơdrong pơgơ̆r sek tơlang:“Lơ̆m rim hơnih jang tư phap đei iung jang kơdih kơtang, tơdrong tơchơ̆t iung jang hơdoi ƀar păh rim hơnih bơ̆ jang ou lăp pơdơh lơ̆m trong Tơdrong tơchơ̆t jang hơdoi kơna tơlĕch jang kiơ̆ jei tim gan ‘lơ̆ng, tơdrong pơkoel rim hơnih jang hơdoi iung jang tim gan ‘lơ̆ng. Lơ̆m mă noh pơkoel hơmet pơ ‘lơ̆ng tư pháp sơđơ̆ng tơdrong pơm tơm kon bơngai,pơm tơm kơdih kơ kon pơlei đei tơlĕch ăn tôch kơtang. Kơ yuơ lơ loh tơdrong tơmơ̆t trong ou lơ̆m Khôi luơ̆t Tơgŭm tơbăt khôi luơ̆t ‘noh jĭ kăl hloh vă gơh pơjing đei trong jang khôi luơ̆t pran kơtang, sơđơ̆ng trŏ lăp ƀar păh rim hơnih bơ̆ jang păng sơđơ̆ng đunh đai tai sơnăm lơ̆m tơdrong jang kiơ̆ tơdrong pơm tơm kơ kon bơngai”.

Hăm tơdrong vă pơjing Khôi luơ̆t Hộ tịch (hơmet ming) mĭnh ƀar nơ̆r tơgop athei rim hơnih bơ̆ jang dăr lăng, hơlen hơdăh păng tơmơ̆t hloi hla bơar pơkăp hlôi đei tơchơ̆t lơ̆m Khôi luơ̆t Hộ tịch tŏk bok hơmet ming păng Khôi luơ̆t Kăn kươk sơnăm 2023. Bơngai tang măt Tô Ái Vang, khul Cần Thơ pơma tơbăt hơdăh nơ̆r tơgop:“Găh tơdrong kih thuơ̆t păng yưh lĭu kăl hơgrop 100% keh kong ‘lơ̆ng hơ iă păng iŏk yoa hơnăn kơdih vă plôih lăng dôm tơdrong hộ tịch lơ̆m VNeID. Găh tơdrong chă pơm hla bơar, pơjing đei mĭnh trong gơh plôih lăng hộ tịch lơ̆m VNeID, iŏk yoa VNeID tơplih ăn pơm hla bơar ou to”.

Pơngơ̆t hăm tơchơ̆t tơ̆ Chăl 2 apăng 7, lăng kiơ̆ tơdrong yan ou, Kơdră chĕp pơgơ̆r Hơnih vei lăng kon pơlei tơring gơh pơjao ăn kơdră anai kĭ rim hla bơar hộ tịch, ‘ngoăih pơm hla bơar rơneh, hla bơar tơbăt lôch răm, hla bơar drơ̆ng nơ̆r iŏk ŭnh om, Bơngai tang măt Nguyễn Trường Giang, khul Lâm Đồng athei lăng hơlen dơ̆ng rim tơdrong tơchơ̆t ou:“Mĭnh ‘nu bơngai lôch kăl đei hla bơar tơbăt găh lôch vă pơm hla bơar pơdong groong ƀŭ. Dang ei pă ăn Kơdră chĕp pơgơ̆r Hơnih vei lăng kon pơlei tơring gơh pơjao ăn kơdră anai, lơ̆m mă ƀok ou năm tơ̆ Hà Nội vang hop akŏm Kuô̆k hô̆i pơtih gia, kơtĕch kơ khei, lei ưh kơ băt kon pơlei vă pơm lơ liơ ‘noh kơnh? Pơm hla bơar rơneh ‘noh gô gơh. Hla bơar drơ̆ng asong iŏk ŭnh om đe jei ‘meh vă đei hloi vă pơgơ̆r ou to. Kơna ĭnh athei kăl hơmet pơ ‘lơ̆ng trong ou vă pơjing đei rơvơn ăn kon pơlei”.