Lơ̆m mĭnh chăl chĕp pơgơ̆r gơh hơgei, mơ̆ng kon pơlei ưh khan lăp hơnăp jang, mă oei jing tơdrong kăl hloh vă pơchoh trong bơ̆jang ƀlep păng pơgơ̆r jang kiơ̆ jơnei. Kơ yuơ rim nơ̆r chă apĭnh athei đơ̆ng bơngai tăh hla ưh khan lăp tơbăt mĭnh tơdrong hơdăh, mă lei oei hơnhăk ba ƀĕnh ƀang dôm tơdrong tơbăt ăn găh tơnap tap mŭk drăm-tơpôl, dôm tơdrong tim mă ƀlep lơ̆m jang kiơ̆, đei ‘măng dôm tơdrong ưh hơ iă gô đei dơ̆ng tơdăh ưh kơ jăh tom ƀôh păng xek tơlang tơtom.

Lơ̆m khei ‘năr teh đak bơ̆n tŏk ƀŏk atŏk kơtang tơ iung pơjing Teh đak pháp quyền xã hội chủ nghĩa păng tơplih kơsô̆ teh đak, hơnăp jang kơ bơ̆jang pơvih pơvăn ăn kon pơlei ưh khan lăp pơdơ̆h ƀơ̆t sơng iok kơthơ tơkêng, tơbăt ăn dôm nơ̆r tơgop dăh mă chih akom dôm nơ̆r tơroi tơbăt đơ̆ng kon pơlei, bơngai tăh hla. Bơngai chĕp kơ̆l Kuô̆k hô̆i lơ ‘măng pơma hơdăh athei kăl tơplih kơtang trong jang iung jang băt hơdăh tơdrong, ƀôh hrôih dôm tơdrong đơ̆ng yan ou păng pơchoh trong hơmet pơ ‘lơng tơ̆ hơnăp rim tơdrong ưh kơ trŏ lăp akom lơ jing đei tơdrong lơ̆m tơpôl.

Vă jang ‘lơ̆ng hăm nơ̆r pơkoel ou, Kơdră chĕp pơgơ̆r Kuô̆k hô̆i Trần Thanh Mẫn athei: bơ̆jang pơvih pơvăn ăn kon pơlei kăl đei tơplih ‘nao tôm tong găh đon tơchĕng păng trong bơ̆jang, băt hrôih dôm tơdrong hơpơi ‘meh vă đơ̆ng Kon pơlei; adoi jing hơnih tơbăt hơdrol trong bơ̆jang păng ‘long pơtŏ jang ‘lơ̆ng lơ̆m chĕp pơgơ̆r vei lăng teh đak.“Bơ̆jang pơvih pơvăn ăn kon pơlei mă kơtang hloh, ưh kơ gơh pơdơ̆h ƀơ̆t tơdrong sơng tơƀơ̆p kon pơlei, xek tơlang hla bơar tơkêng, pơtruh nơ̆r athei. Mă ĭnh athei bơ̆ jang pơvih pơvăn ăn kon pơlei jĭ hơnih băt hơdăh hrôih tơdrong hơpơi ‘meh vă đơ̆ng kon pơlei, jing hơnih tơbăt hơdrol trong bơ̆jang, jĭ ‘long pơtŏ bơ̆jang ‘lơ̆ng chĕp pơgơ̆r teh đak. Ĭnh athei, ưh kơ lê̆ jang pơvih pơvăn ăn kon pơlei yak đơ̆ng rŏng dôm tơdrong tơtok đơ̆ng kon pơlei. Bơ̆n kăl chă kơleng, băt hơdăh tơdrong păng iung pơma hơdrol. Mă ƀar ‘noh, tơl nơ̆r apĭnh athei đơ̆ng bơngai tăh hla kăl mă tơpăt rơhao hloh dơ̆ng. Tơl tơpăt rơhao ‘noh kăl hôn bơnê, mă lei ‘long pơtŏ tuch luch ưh khan kiơ̆ tơl hơdăh hăm chih lơ̆m hla bơar, mă lei tơdrong mă ‘noh hăm gơh hơmet pơ ‘lơ̆ng ưh, kon pơlei hăm ƀôh hiôk jơhngơ̆m, lăp đon ưh”.

Tơdrong yan ou khei năr ou ki đei ƀôh, lơ trong bơ̆jang, tơgŭm djru đơ̆ng teh đak mưh yak mơ̆t lơ̆m tơdrong hơrih hlôi đei dơ̆ng dôm tơdrong ƀơm truh ou to ‘ngoăih kơ tơdra hơdrol. Ưh kơ tŏ sĕt tơdrong tim mă trŏ ƀlep lăp đei ƀôh mưh hlôi ƀôh hla bơar năm tơkêng dăh mă hlôi đei jing tơdrong tơtok tôch kơtang lơ̆m kon pơlei pơla. Lơ̆m mă noh, tơdăh dôm nơ̆r tơbăt ăn đơ̆ng tơring đei sơng iŏk tơtom, hơlen tôm tong, ưh kơ jor gô đei hơmet ming đơ̆ng hrôih, lơ tơdrong kĕ veh ver đei jing tơdrong ưh kơ lăp kơtang, pơm dă ƀiơ̆ pơm kơnê̆ truh tơpôl păng pơhoach jơ ‘năr bơ̆ jang lơ.

‘Meh vă tơdra hơdrol ƀlep, kăl chă mơ̆ng mă tôm tong. ‘Meh vă trong bơ̆jang teh đak yak mơ̆t ‘lơ̆ng lơ̆m tơdrong hơrih, kăl pơma dơnuh rơhao tơpăt hăm kon pơlei đơ̆ng jơ ‘năr pơjing păng pơgơ̆r jang kiơ̆ hloi.

‘Nou jei jing trong kăl hloh vă sơđơ̆ng đei iŏk yoa ‘lơ̆ng hơ iă ƀar păh Teh đak, kon pơlei păng hơnih mơdro sa, adoi hơmet pơ ‘lơ̆ng tơdrong lăp đon lơ̆m tơpôl.

Tơdăh hơdrol ou ki, tơdrong iŏk jơnei bơ̆jang pơvih pơvăn ăn kon pơlei hmă hmă đei hơlen kiơ̆ sơng iok đei lơ kơthơ tơkêng đơ̆ng kon pơlei, nơ̆r tơblang hơdăh hăm hla bơar dăh mă tơdrong sek tơlang keh đang dôm yơ, ‘noh hrei ou ‘long pơtŏ jang ‘lơ̆ng hlôi đei pơm hơtŏk loi dơ̆ng: tơdrong xek tơlang keh đang ‘lơ̆ng păng tơdrong lăp đon đơ̆ng kon pơlei. Tơdrong ou jei hlôi đei ƀok Hoàng Anh Công, Kơ iĕng Kơdră chĕp pơgơ̆r Hơnih bơ̆jang Pơvih pơvăn ăn kon pơlei păng Dăr lăng kơ Kuô̆k hô̆i pơma hơdăh: "Trong pơkăp kăl hloh kơ bơ̆jang pơvih pơvăn ăn kon pơlei ‘noh jĭ tơdrong lăp đon đơ̆ng kon pơlei. Mă đơ̆ng jang lơ liơ, bơ̆n kăl hơnhăk đei tơdrong đei iok yoa sa hơpăh ‘lơ̆ng hơ iă ăn kon pơlei, hơnhăk đei tơdrong ‘lơ̆ng hơ iă ăn teh đak. Păng mưh kon pơlei lăp đon lei tơdrong lăp đon đơ̆ng kon pơlei ‘noh jĭ trong pơkăp jang ‘lơ̆ng kăl hloh mă bơ̆n lăng truh."

Mưh nơ̆r pơma đơ̆ng kon pơlei đei mơ̆ng kiơ̆ păng dôm nơ̆r chă apĭnh athei đei xek tơlang tơtom, jơhngơm đon lui yom đơ̆ng Kon pơlei hăm Đảng, Teh đak păng rim hơnih bơ̆ jang pơvih pơvăn ăn kon pơlei gô đei hơmet pơ ‘lơ̆ng kơtang. Nơ̆r athei đơ̆ng Kơdră chĕp pơgơ̆r Kuô̆k hô̆i tơƀôh hơdăh: tơplih ‘nao bơ̆jang pơvih pơvăn ăn kon pơlei jĭ tơplih ‘nao trong chĕp pơgơ̆r teh đak kiơ̆ trong iŏk kon pơlei, hơnih mơdro sa pơm tơdrong tơm.