Vă jê̆ 1 giĕng ‘nâu, dôm jĭt ‘nu kăn ƀô̆, linh, dân quân păng khul jang đei măt đơ̆ng hrôih tơ̆ pơsat linh lôch tang ăn teh đak Mỹ Thắng. Mĭnh ‘nu mĭnh tơdrong jang: grŭp vei sơđơ̆ng, grŭp sir chă, grŭp jang pơgang, pơvih pơvăn... Đĭ đăng hue lăng tơ̆ 1 trong ‘nŏh khŏm jang đang tơdrong sir iŏk kơting linh mă ‘lơ̆ng. Trung tá Phạm Hữu Lộc, Phŏ kơdră jang chinh trĭ kơ Anih chĕp kơ̆l pơgơ̆r khul linh xăh Phù Mỹ Đông ăn tơbăt, đơ̆ng rŏng kơ sir chă, kơting đei Khul K52 iŏk, chơ vih tơ̆ grŭp jang pơgang vă hơlen năng, vei lăng mă ‘lơ̆ng adrol kơ pơjao ăn Anih chĕp kơ̆l pơgơ̆r khul linh xăh: "Hăm tơdrong jang 500 măng năr, anih jang hlôi tơlĕch đơ̆ng ‘năr 25/6 truh dang ei. Anih jang adrin pơtruh tôm tơmam ăn rim grŭp bơ̆ jang hlôi đei Khul chĕp kơ̆l Đảng, Anih vei lăng kon pơlei xăh pơjing, bơ̆ jang rim năr vă pơm thoi yơ gơ̆h bơ̆jang trŏ năr hơgăt."

Tơ̆ dôm pơsat đei sir hơtŏk, 1 pơsŭn đei pơm vă pĕng găn ƀiơ̆ tŏ tôch dêh ƀât tŏk bŏk pơyan he. Đei lơ sơnăm bơ̆ jang sir chă kơting linh lôch tang ăn teh đak, rim tơdrong jang đơ̆ng đe kăn ƀô̆, si kuan Khul K52 đei jang tôch ‘lơ̆ng. Thiếu tá Trần Hoàng Nam, jang lơ̆m Khul K52, Anih chĕp kơ̆l pơgơ̆r khul linh dêh char Gia Lai tơroi, rim pơsat đei teh pha ra băl, kơna tơdrong sir chă đei tơdrong pơmat tat pha ra băl ‘năi: "Kiơ̆ đơ̆ng bơ̆ jang tơdrong jang ăn ƀôh, dôm pơsat tơ̆ dôm tơring đei tơdrong pha ra băl. Mĭnh kơsô̆ pơsat teh rơmuăn, sir akŏm tôch pơmat, pơtih gia nhen Phù Mỹ Đông ‘nŏh teh chuơh kơna ‘nhŏng oh bơ̆ jang, đei teh hlŭn, hơlih. Mĭnh kơsô̆ pơsat nai ‘nŏh mưh sir đei đak kŭm ƀơm ưh ‘lơ̆ng truh sir akŏm kơting linh ‘năi."

Tơdrong jang hơnơ̆ng đei pơgơ̆r tơ̆ hơla 'năr tŏ. Bơngai âu lap ‘nŏh bơngai to jang dơ̆ng. Đak pơuh pơang hơ ‘yuih ƀĕnh ao tơ̆ kơdŭ rŏng mă lei ưh đei bu hăt hot. Kơƀay iĕ, hơiơch kuơh teh, kreh tưk rim tơmam, plơ̆ bơ̆n kơting tôch hơlen. Roi pơmat tat, dôm bơngai jang lơ̆m Khul K52 Gia Lai roi adrin hlŏh dơ̆ng: "Kŭm đei pơsat yoa ƀŭ đunh bơih, kơting linh kŭm bŭk, hach đĭ. Hăm dôm pơsat thoi noh, Khul K52 pơgơ̆r pơih xă anih tơchă. Ƀât lăp, ƀât hơtâp pơsat yoa đunh bơih kŭm đei ‘long tơrĭ, ưh ƀơm pơsat. ‘Nhŏng oh adrin sir pơih xă, chă hơlen, ưh đei lon yă kiơ."

Dôm anih sir chă xă truh dôm jĭt met ‘nŏh jĭ anih dôm bơngai jang ki thuơ̆t bơ̆ jang iŏk set hơlen ADN kiơ̆ tơdrong hơgăt. Rim kơmẫu kơting đei chih tơroi, phĭn rup, chih kơsô̆, tăh lơ̆m tơpu păng ‘măn răk tôm tĕch vă pơyoa ăn tơdrong jang hơlen năng đơ̆ng rŏng kơnh. Ƀak si Dương Công Hoàng, bơngai vei lăng Khul iŏk kơmẫu kơting ăn tơbăt: "Đơ̆ng rŏng kơ iŏk kơmẫu đang, kơting oei đei dơ̆ng gô pơjao ăn anih chih kơsô̆ vă ƀŭ hơmet lơ̆m pơsat dơ̆ng. Oei khul jang ‘nŏh iŏk vei kơmẫu mă ‘lơ̆ng kiơ̆ tơdrong hơgăt, gô đơ̆ng rŏng kơnh pơjao ăn khul sơng iŏk nai dơ̆ng, vă chơ năm set hơlen, chih hơdăh hơnăn ăn đe sư."

Pơsat linh lôch tang ăn teh đak Mỹ Thắng dang ei đei 445 tŏ pơsat linh, lơ̆m noh oei đei 118 pơsat tam mă băt hơnăn. Tơdrong iŏk kơting vă set hơlen ADN tơ̆ âu ‘nao jing 1 lơ̆m dôm anih jang blŭng a đơ̆ng Tơdrong jang 500 măng năr mă dêh char Gia Lai oei tơlĕch jang tơ̆ lơ pơsat linh lôch tang ăn teh đak lơ̆m dêh char. Jăl trong tơ̆ hơnăp oei tôch pơmat tat yoa rim tơdrong đơ̆ng tơblăh sơ̆ đĭ vă hiơt hiong, pă ƀôh kơnăl bơih. Mă lei rim kơting linh đei vei lăng tôch 'lơ̆ng năr 'nâu oei hơnhăk ba đon hơmĕng kơ 1 năr yơ 'nŏh kơnh, bơngai linh sơnăm sơ̆ gơ̆h đei krao trŏ hơnăn kơdih păng đei vih hơdai hăm unh hnam dơ̆ng./.