Đắk Lắk hrei ou đei 81 tơring kon pơlei kon kông păng groi kông, hăm hloh 828.000  ‘nu măt bơngai kon kông. Lăp đơ̆ng rŏng Khôi luơ̆t Groi teh sơnăm 2024 đei tơlĕch jang kiơ̆, tơring hlôi tơgum djru teh oei ăn 238 ŭnh hnam, tơgŭm teh choh jang sa dăh mă tơplih tơdrong jang ăn hloh 1.300 ŭnh hnam. Tơdrong jang pơtho pơhrăm, jang pơgang tơring kon kông hơnơ̆ng đei vei kơjăp, 100% hnam pơgang tơring, vă jê̆ 97% hnam pơgang đei ƀak si, hăm jơnei 9 ‘nu ƀak si lơ̆m mơjĭt rơbou ‘nu kon pơlei.

Mă lei, tơring oei tơjră muh măt hăm lơ tơdrong tơnap tap. Groi teh vă proh hơmet ăn kon pơlei kon kông roi năr roi pă gan đei, tơdrong hơmet pơ ‘lơ̆ng teh đơ̆ng rim mir đak lar choh jang sa oei tơhlăk tơhlin hăm rim tơdrong tơchơ̆t. Lơ hnam trương teh đak rong ‘me oei ưh kơ măh hmam tep, hnam song sa, hơnih pơhrăm; tơdrong tơlĕch kon jên jang Tơdrong jang tơm Teh đak oei hiơ hiơ̆ lơ̆m mă 3 hnam trương teh đak rong ‘me tơring sơlam teh đak oei ưh kơ măh hloh 194 ti hlak jên vă keh đang. Găh tơdrong jang pơgang, lơ tơring hơtăih yăih oei ưh kơ măh ƀak si, kmăi kmŏk păng bơ̆jang kih thuơ̆t.

Đơ̆ng tơdrong đei ƀôh ou, tơring hlôi apinh athei Kuô̆k hô̆i păng Hơnih bơ̆ jang Kuô̆k hô̆i hrôih hơmet ming, pơm pơkeh rim tơdrong tơchơ̆t găh pơjing hơnih teh tơgŭm djru ăn kon pơlei kon kông; pơtho tơbăt hơdăh tơdrong jang kiơ̆ Apăng 16 Khôi luơ̆t Groi teh 2024. Adoi athei Khul kơdră chĕp pơgơ̆r Teh đak păng rim Hơnih tơm, hơnih jang proh hơmet khul jang ăn Tơdrong jang tơm Teh đak jăl jang 2026-2030; ăn dơ̆ng kon jên tơmơ̆t jang ming man hnam trương hŏk pơhrăm, hnam pơgang păng trong tơgŭm djru krao mơ̆t jang hăm ƀok thây kô, ƀak si năm bơ̆jang đunh đai tai sơnăm tơ̆ tơring tơnap tap.

Ƀok Nguyễn Thiên Văn, Kơ iĕng Kodră Hơnih vei lăng kon pơlei dêh char Đắk Lắk akhan, kăl hrôih dăr lăng hơlen, pơjao teh đơ̆ng rim kŏng ty choh jang sa, mir đak lar jang sa ưh kơlĕch ăn kơ tơring vă asong teh oei, teh choh jang sa ăn kon pơlei kon kông.“Lơ̆m dêh char đei 19 kŏng ty găh Hơnih tơm vei lăng, đei hơgăt teh să hloh 20.000ha, mă lei lơ̆m minh sơnăm lăp thuê̆ ăn teh đak dang 20-25 ti hlak jên. Lơ̆m mă noh tơdrong ‘meh vă đei teh oei, teh choh jang sa ăn kon pơlei kon kông tŏk bŏk tôch kăl lăng truh. Kơna bơ̆ jang dăr lăng, lăng hơlen ‘noh mă mĭnh pơjao ăn tơring vei lăng, mă ƀar ‘noh dôm tơdrong ou Hơnih tơm kăl iung jang hloi, đei nơ̆r pơma păng pơjao dơ̆ng ăn tơring vă kơ nhôn iung jang dôm tơdrong jang tơgŭm djru teh ăn kon pơlei kon kông”

Tơ̆ jơ bơ̆ jang, yă Thị Hoa Ry, Kơ iĕng Kơdră chep pơgơ̆r Jơnŭm vei lăng Kon kông kơ Kuô̆k hô̆i tơgoăt iŏk nơ̆r tơgop athei đơ̆ng tơring. Yă jei hôn bơnê kơtang tơdrong jang tơgŭm djru kon pơlei kon kông kơ Đắk Lắk. Yă athei dêh char hơnơ̆ng dăr lăng ƀlep dôm bơngai kăl đei iŏk yoa sa hơpăh, atŏk kơtang iung jang hơdoi ƀar păh rim hơnih bơ̆ jang, atŏk kơtang tơroi tơbăt tơdrong bơ̆ jang tơgŭm djru đơ̆ng teh đak păng lăng kơjăp tơmơ̆t jên răt kmăi kmŏk ăn hơnih jang pơgang tơring.“Dăr lăng hơlen đei ƀơm truh dôm tơdrong đei adoi nhen trong pơkăp klăh asong dôm tơdrong tơgŭm djru ăn tơdrong pơtho pơhrăm păng jang pơgang vă tơlĕch jang kiơ̆ lơ̆m khei năr kơnh.  Băt ră Đắk Lắk jei đei song iŏk đei lơ tơdrong tơgŭm djru đei ƀơm truh rim tơdrong jang tơm teh  đak găh kon pơlei kon kông, tơdrong jang pơgang. Hăm tơdrong bơ̆ jang tơ̆ hnam pơgang tơring ‘noh lăng kơjăp dăr lăng dơ̆ng kmăi kmŏk vei lăng năng tông jơhngơ̆m pran jăng ăn kon pơlei, mưh bơ̆n iung jang vei lăng năng tông jơhngơ̆m pran jăng grăng akou ăn đĭ đăng kon pơlei ‘noh hrei ou lơ tơring tim mă trŏ lăp tơpă mơ̆n”.