Tơdrong jang BLOOM đei Jơnŭm pơgơ̆r teh đak Canada tơgŭm jang kiơ̆ Hơnih jang tơm kơ Dôm tơdrong đei ƀôh lơ̆m kơpal teh Canada, pơtơm jang tơ̆ 2 dêh char Đăk Lăk păng Tuyên Quang đơ̆ng khei 6/2026 truh khei 4/2030. Tơdrong jang ưh đei yua asong jang lơ̆m teh đak; hơnih jang tơgŭm kơtă vei lăng, hơlen tơdrong jang yua jên ou. Tơdrong jang tơlĕch vă 'măn hơtŏk 'lơ̆ng cham char sinh hŏk, atŭm hăm noh hơtŏk tơdrong jang pơtrŏ hăm tŏ 'mi kial tơplih ăn kơ đe drăkăn kon kông păng kon pơlei tơ̆ tơring.

Tơ̆ Đăk Lăk, tơring pơtơm jang tơ̆ Pơgar pơkăp kơ teh đak Chư Yang Sin păng dôm xah Hòa Sơn, Cư Pui păng Yang Mao. Hơkŏp jên tơgŭm ưh đei iŏk tơvih noh hloh 21 tih hlj (hơtŏ hăm 1,1 triu đôlar Canada).

Tơdrong jang vă hơtŏk trong pơm jang ăn pơhlom 1.500 'nu bơngai đei yua kơtă păng 6.000 'nu bơngai đei yua nai. Kiơ̆ kơ dôm tơdrong tơgŭm gah kih thuơ̆t, tơdrong jang gô iŏk yua dôm trong jang gơnơm lơ̆m cham char tơguăt hăm hơtŏ hơnơ̆ng drănglo păng drăkăn, hơtŏk hơgei tơdrong vei lăng, iŏk yua sơđơ̆ng mŭk drăm cham char păng hơtŏk sơnong jang, nơ̆r pơma kơ đe drăkăn kon kông lơ̆m tơdrong jang vei lăng bri.

Pơma ah lêh pơtơm, ƀok Nguyễn Thiên Văn, Phŏ Kơdră Hơnih jang vei lăng kon pơlei dêh char Đăk Lăk akhan, Tơdrong jang BLOOM kăp gĭt hloh lơ̆m khei năr tơring tŏk bŏk oei hơdrim vei lăng pơ-'lơ̆ng cham char sinh hŏk tơguăt hăm hơtŏk pơm jang kơjăp sơđơ̆ng ăn kon pơlei tơ̆ tơring kon kông. Ƀok pơgơ̆r hăm rim hơnih jang, jơnŭm pơgơ̆r tơring păng dôm hơnih jang đei tơrĕk jang atŭm kơjăp hăm hơnih tơgŭm jên vă pơtơm tơdrong jang trŏ khei năr tơchơ̆t tơlĕch, pơm jang đei jơnei: “Hơnih jang vei lăng kon pơlei dêh char Đăk Lăk pơkăp, ling lang lăng truh tơdrong pơgơ̆r jang kơjăp hloh, pơm trong ƀônh hiôk vă rim hơnih jang gơh truh hăm tơring kon pơlei; hơdrin chă tơroi tơbăt vă kon pơlei hlôh vao, drơ̆ng lăp păng kơchăng vang jang kiơ̆ dôm trong tơlĕch jang gơnơm lơ̆m cham char, adoi nhen hơtŏk dôm tơdrong jang xa kơjăp sơđơ̆ng; hơtŏk dôm tơdrong jang 'nao; hơtŏk sơnong jang kơ đe drăkăn lơ̆m dôm tơdrong jang vei lăng 'lơ̆ng cham char sinh hŏk”.