Đơ̆ng pơgê hrôih, tơdrong bơ̆ jang tơ̆ Pơsat linh Đức Cơ đei pơgơ̆r tôch hơiă. Dôm khul jang đơ̆ng khul linh, khul jang pơgang păng khul kơdră tơring jang hơdoi tôch ‘lơ̆ng đơ̆ng sir chă, iŏk kơmẫu, chih hơmet, tơmât lơ̆m kơmăy sô̆ truh man hơmet pơ ‘lơ̆ng dơ̆ng pơsat. Rim tơdrong jang đei bơ̆ jang tôch hơlen vă gơ̆h iŏk đei kơting pơm ‘lơ̆ng ăn tơdrong set hơlen ADN. Hăm hlŏh 1.500 tŏ pơsat tam mă băt hơnăn, Pơsat linh Đức Cơ jĭ anih đei tơdrong jang lơ hlŏh kơ dêh char Gia Lai.

Ƀak si Nguyễn Thị Thu Hà, Hnam pơgang xăh Đức Cơ tơroi, hăm lơ kăn ƀô̆ jang pơgang, ‘nâu jĭ ‘măng mă blŭng bơ̆ jang tơdrong jang tôch gĭt kăl âu: "’Măng mă blŭng iŏk kơmẫu kơting blŭng a kŭm tơtơ̆ mơ̆n mă lei đơ̆ng rŏng kơ ‘nŏh kŭm ƀôh ưh đei tơdrong păng bơ̆ jang roi juăt. Tơ̆ âu jang ƀât lăp tŏ, ƀât lăp ‘mi, đe ‘nhŏng oh oei adrin bơ̆ jang đĕch. Anih chĕp kơ̆l pơgơ̆r khul linh xă kŭm pơjing tơdrong ‘lơ̆ng đei bơ̆n pơsŭn kuăl tăng vă ‘nhŏng oh bơ̆ jang."

Ưh lăp khul jang pơgang đĕch, lơ linh dân quân tơ̆ tơring kŭm ‘măng mă blŭng vang bơ̆ jang tơdrong jang gĭt kăl âu. Đơ̆ng pơsat linh Đức Cơ găh Pơmât truh dôm pơsat linh găh Hơlĕch dêh char Gia Lai, đe linh oei mơlôh tơtă đei 1 đon tơchĕng ngăl, ‘nŏh jĭ adrin jang đĭ jơhngâm vă tơgop chă dơ̆ng hơnăn păng chông ba đe linh lôch tang ăn teh đak vih hăm unh hnam đơ̆ng rŏng dôm jĭt sơnăm.

‘Nhŏng Đặng Hoàng Bửu, Bơngai vei lăng Khul Dân quân xăh Bình Hiệp pơma: "Tơdrong jang ‘nâu oh tam mă biơh jang lai yơ, mă đơ̆ng ‘năr tôch tŏ ră mă lei ‘nhŏng oh oei adrin vă đe mih jăh vih dơ̆ng hăm unh hnam. Mưh sir hơtŏk đe mih, kiơ̆ khei ‘năr lơ kơting ưh pă đei ‘lơ̆ng bơih, nhôn ƀôh čhưu jơhngâm ‘mêm mơnat tơpă. Rim bơngai roi adrin hlŏh dơ̆ng vă chă đei roi lơ tơmam pơyoa ăn tơdrong set hơlen ADN."

Hăm ‘nhŏng Ngô Đại Phát, dân quân xăh Bình Hiệp, tơdrong jang ‘nâu oei jing jơnăr vă jơhnơr đơ̆ng rŏng đei rơneh, arih truh ‘lŏ lơ̆m chăl rơngei hiôk hian tơƀôh jơhngâm đon ‘mêm bơnê hăm dôm tơdrong jang tôch hơdăh. Dôm năr bơ̆ jang hơla ‘năr tŏ hlơ hlĕng tôch dêh, đĭ đăng bơngai lơ̆m khul pơlung băl adrin vei lăng jơhngâm pran vă gơ̆h bơ̆ jang đang tơdrong jang đei pơjao: "Nhôn jĭ jơhnơr mơlôh, đei rơneh lơ̆m chăl rơngei, ƀôh tôch hơiă mưh iŏk jang tơdrong jang vă tơgŭm ăn đe mih chă dơ̆ng kơtum kơtŏng ‘nhŏng oh. Nhôn hơnơ̆ng hơmet jơhngâm, adrin jang tôch ai vă gơ̆h jang đang 'lơ̆ng hlŏh."

Đơ̆ng rŏng 1 khei 'năr pơtâp pơhrăm ưh đunh, lơ bơngai jang điều dưỡng lăp juăt hăm tơdrong khăm, hơmet jĭ rim năr dang ei jing bơngai jang lơ̆m Khul chă iŏk kơting vă set hơlen ADN tơ̆ pơsat linh lôch tang ăn teh đak. 'Nhŏng Nguyễn Trái Đắng, jang tơ̆ Hnam pơgang phường Quy Nhơn, vang chă iŏk kơmẫu kơting tơ̆ Pơsat linh Mỹ Thắng, xăh Phù Mỹ Đông, ăn tơbăt, đơ̆ng rŏng dôm jĭt sơnăm, lơ kơting linh đĭ bŭk ôm đĭ bơih, đei pơsat kơting linh đĭ ôm nhen thoi teh hmă bơih. Yoa thoi noh, tơdrong rơih iŏk kơmẫu kơting đei bơ̆ jang tôch hơlen vă gơ̆h hơlen đei ADN: "Tơdăh đei sŏk ‘nŏh set hơlen trŏ hlŏh, tơdăh ưh ‘nŏh chă iŏk bơ̆n kơting jơ̆ng, kơting blu; hơnĕnh ‘nŏh iŏk tơm hơnĕnh, mă ưh ‘nŏh jơ̆ng hơnĕnh mă tôm. Dôm kơloăi kơting âu ưh đei ‘nŏh chă kơting nai dơ̆ng. Iŏk đei kơting ‘lơ̆ng ‘nŏh tôch hơiă vă tơƀôh jơhngâm đon ‘mêm bơnê kơ đe linh lôch tang ăn teh đak vă teh đak bơ̆n gơ̆h đei tơdrong rơngei hiôk hian nhen hrei ‘nâu."

Tơdrong jang 500 măng năr iŏk kơmẫu ADN vă chih hơdăh hơnăn linh lôch tang ăn teh đak tŏk bŏk đei pơgơ̆r jang hrơ̆ch ‘lơ̆ng tơ̆ dôm pơsat linh tơ̆ dêh char Gia Lai. Tơ̆ hơla ‘năr tŏ hlơ hlĕng tôch dêh dăh mă dôm ‘măng ‘mi tih đunh, kơhrĕng ‘nu kăn ƀô̆, linh, bơngai jang pơgang păng khul linh tơ̆ tơring oei hơngŏr hơngônh adrin jang ƀât rim pơsat linh. Đại tá Phạm Văn Đạt, Phó Chính ủy Anih chĕp kơ̆l pơgơ̆r khul linh dêh char Gia Lai ăn tơbăt, nơ̆r athei jang ưh lăp jang đang trŏ năr đĕch mă oei athei jang mă ‘lơ̆ng, mă trŏ hlŏh, đon pơhnŏng mă hơtuch ‘nŏh hơnhăk dơ̆ng hơnăn ăn đe linh lôch tang ăn teh đak: "Mă đơ̆ng 'nâu jĭ tơdrong jang tam mă biơh jang đơ̆ng sơ̆, tơdrong jang tôch 'nao, tôch pha păng tôch mơmat mă lei kăn ƀô̆, linh, bơngai jang đơ̆ng dôm khul linh bơ̆jang chă iŏk kơmẫu kơting linh lôch tang ăn teh đak tơ̆ dôm pơsat linh hơtŏk đon jang tơnăp, bơ̆ jang tôch ai păng jang trŏ năr hơgăt. Anih jang nhôn kŭm hơnơ̆ng jet gia, pơlung đe linh bơ̆jang tơ̆ dôm pơsat vă tơtom pơlung 'nhŏng oh lơ̆m khei 'năr bơ̆ jang.”

"Tơdrong jang 500 măng năr" tơƀôh hơdăh đon pơhnŏng đơ̆ng Đảng, Teh đak, khul linh păng rim anih jang chinh trĭ mưh bơ̆ jang hơnăp jang tôch gĭt kăl hăm dôm bơngai hlôi plang sơnăm mơlôh păng tơdrong arih ăn teh đak. Rim kơmẫu ADN đei iŏk năr ‘nâu sư hơnhăk dơ̆ng đon hơmĕng vă 1 unh hnam gơ̆h pơm pơhơi ƀiơ̆ tơdrong gô chang pơdui đunh dôm jĭt sơnăm; rim hơnăn đei băt dơ̆ng 'nŏh 1 'nu kon teh đak đei vih dơ̆ng hăm unh hnam, pơlei pơla.

Hăm Gia Lai, tơring teh sơ̆ jĭ kơdrăm tơblăh tôch krưp krenh, tơring đei dôm jĭt rơbâu pơsat linh lôch tang ăn teh đak tam mă băt hơnăn, rim anih jang kơpal, khul linh păng khul kơdră tơring oei adrin bơ̆ jang rim năr, rim jơ vă gơ̆h jang đang tơdrong jang gĭt kăl âu. ‘Nŏh ưh lăp nơ̆r athei đơ̆ng "Tơdrong jang 500 măng năr" đĕch, mă oei jing tơdrong jang vă tơtrơp dơ̆ng tơdrong juăt ‘lơ̆ng “Nhă đak ƀlŏk kơtu", jĭ nơ̆r bơnê kiơ̆ đơ̆ng tơdrong jang đơ̆ng jơhnơr hrei ‘nâu hăm dôm bơngai hlôi hŭt hơkâu, lôch tang ăn tơdrong rơngei, hiôk hian kơ teh đak./.