Lơ̆m jơ ‘năr tŏ hlơ hlĕng tơring sơlam teh đak, jơ ‘năr iung jang ming man Hnam trương teh đak rong ‘me Ia R'vê, tơring Ia R'vê đei pơgơ̆r kơtang. 45 ‘nu kang ƀô̆, ƀô̆ đô̆i đei Hơnih Ƀô̆ đô̆i dêh char Đắk Lắk atŏk kơtang pơjing lơ khul, iung jang hơdoi hăm kŏng nhân sơđơ̆ng rim tơdrong jang đơ̆ng man, băh, man drơ̆h truh ming man dur. Rim hơnih ming man đei iung jang kơtang kiơ̆ khul vă ming man keh đang hrôih. Thượng úy Nguyễn Bá Công, vang iung jang ming man Hnam trương teh đak rong ‘me Ia R’vê, tơbăt.“ ‘Nhŏng oh bơ̆n klăh pơjing ƀar khul, mĭnh khul man dur, băh dur, man drơ̆h; mĭnh khul ‘noh tuh man jơ̆ng, man hơdrơ̆ng dur păng man dur. ‘Nhŏng oh klăh asong jang ƀar hơyuh: khul jang hơdrol đơ̆ng 6 jơ pơgê truh 10 jơ 30 pơnĭt ‘noh pơdơ̆h sŏng sa ‘năr dơ̆ng; hơyuh mă 2 iŏk đơ̆ng 1jơ 30 pơnĭt kơsơ̆ truh 4 jơ 30 pơnĭt.”

Hnam trương teh đak rong ‘me Ia R'vê đei akŏp kon jên tơmơ̆t jang 185 ti hlak jên, ‘noh đei lăm hŏk, hnam tep, hnam mong kơsơ̆p hla bơar, hnam pơhrăm lơ tơdrong, hơnih bơ̆ jang păng rim hơnih jang kmăi kmŏk; adoi ming hơmet pơ ‘lơ̆ng mĭnh ƀar hơnih jang kăl kơ Hnam trương jăl ƀar Nguyễn Thị Định. Ƀok Nguyễn Quang Khánh, kơdră chĕp pơgơ̆r mĭnh khul jang ming man tơbăt, rim tơ-‘ngla tơmơ̆t jên jang tŏk bŏk akŏm pơm pơkeh vă tơtom hơlen, pơjao ƀlep trong tơlĕch ăn.“Pêng kŏng ty ming man lơ̆m hơnih đei 5 tong gre kôch teh, mưh đei tơdrong jang ‘noh krao năm jang hloi. Gre chơ ‘noh đei hloh 20 tong. Đei gre ben, gre hơtŏk, gre lu ou to vă iung jang ming man ‘noh đei hloi. Găh kŏng nhân, păh Kŏng ty nhôn dang 30 ‘nu kŏng nhân păng kih sư; ƀar kŏng ty uơ oei păng khul ƀô̆ đô̆i ‘noh đei dang 80 truh 90 ‘nu bơngai. Đĭ đăng tŏk bŏk kơrŭn jơhngơ̆m iung jang ming man.”

Tơnap tap hloh lơ̆m pêng tơdrong vă jang ‘noh Hnam trương teh đak rong ‘me Ia Lốp kơ yuơ hơnih ming man hơtăih hơdrin kơdrơ̆m tơring, tơdrong chă chơ pơdŭ tơmam ming man păng iung jang ming man tơnap tap. Vă tơgŭm hơnih tơmơ̆t jên jang păng bơngai iŏk jang ming man, dêh char Đắk Lắk hlôi krao hơvơn hloh 60 ‘nu kang ƀô̆, ƀô̆ đô̆i vang iung jang ming man, tơgop iung jang ming man keh đanh tĕnh koăng.

Kiơ̆ đơ̆ng hơnih bơ̆ jang dăr lăng hơlen, dang ei hơnih ming man hơvơn đei vă jê̆ 40 tong kmăi kmŏk, gre atŭm hăm hloh 140 ‘nu kih sư, kong nhân bơ̆ jang hơnơ̆ng. Ƀok Nguyễn Thế Quang, hơnih jang pơchoh trong dăr lăng hơnih ming man tơbăt, lơ hnam hlôi man đang păng tŏk bŏk ming man pơkeh, pơlăp tơlei kơƀŏng ŭnh hơyuh, đing đak păng ‘măng hnam.“Đei ƀô̆ đô̆i vang tơgŭm kơna hơnih ming man đei iung jang keh đang tĕnh koăng. Dôm khul iŏk jang lăng ƀôh ƀô̆ đô̆i jang tơnăp kơna đe sư jei kơrŭn jơhngơ̆m jang kiơ̆, tơdăh ưh lei keh đang hiơ hiơ̆, jang ưh kơ đang trong tơlĕch ăn. Rim hơnih tơmơ̆t jên jang tŏk bŏk iung jang kơtang vă pơjao mĭnh hnam jăl kơđeh hơdrol năr 31/7, iŏk tơdrong ou vă pơm hơtŏk jơhngơ̆m đon ranh iung jang kơtang ming man rim rĕng hnam hŏk anai hŏk kiơ̆, jang kiơ̆.”

Kiơ̆ trong tơlech ăn jăl jang 2025-2027, Đắk Lắk ming man 4 hnam trương teh đak rong ‘me lơ̆m tơring sơlam teh đak. Hơdrô̆ pêng hnam trương Ia R'vê, Ia Lốp păng Buôn Đôn kăl keh đang vă tơmơ̆t iŏk yoa lơ̆m sơnăm hŏk 2026-2027 hloi.

Tơ̆ dêh char Đắk Lắk, mă đơ̆ng đei ƀơm ưh kơ ‘lơ̆ng đơ̆ng tŏ ‘mi kial, kơjă tơmam drăm ming man păng tơdrong ưh kơ măh bơngai jang, rim bơngai tơmơ̆t jên jang oei vei kơjăp lơ khul iung jang ming man, hơvơn lơ bơngai, kmăi kmŏk păng iung jang hơdoi hăm khul ƀô̆ đô̆i vă sơđơ̆ng ming man keh đang kơjăp ‘lơ̆ng. Ƀok Võ Văn Lợi, Kơ iĕng Kơdră chĕp pơgơ̆r Hơnih bơ̆ jang Vei lăng tơdrong tơmơ̆t jên jang ming man pơyoa ăn kon pơlei păng hơnih jang kmăi kmŏk dêh char Đắk Lắk, tơbăt, truh dang ei, rim hơnih ming man hlôi jang keh đang hloh 80% tơdrong jang; lơ hơnih ming man vă ming man keh đang, pơlăp tơlei ŭnh hơyuh, đing đak ou to.“Hơnih hlôi tơlĕch trong pơprŏ jang 70 măng năr, ăn kang ƀô̆, kih sư jur năm vang năm jang, oei sa hơdoi vă hơmet pơ ‘lơ̆ng tơdrong tơnap tap, tơhlăk tơhlĭn păng pơrô̆ rim hơnih ming man hơdrin iung jang kơtang kiơ̆ nơ̆r pơrô̆ jang đơ̆ng Hơnih tơm Chinh trĭ, adoi nhen Hơnih Đảng dêh char, Jơnŭm vei lăng kon pơlei, Hơnih vei lăng kon pơlei dêh char. Hơpơi ‘meh vă lơ lou, ‘năr rŏ tŏ hơlăng vă rim hnam trương gô ming man keh đang ƀlep jơ ‘năr pơkăp, sơng hơvơn hŏk tro mơ̆t hŏk sơnăm hŏk 2026–2027.”

Hăm tơdrong vang iung jang kơtang đơ̆ng pơđĭ khul chinh trĭ, tơdrong hơdrin đĭ ai đơ̆ng rim hơnih tơmơ̆t jên jang atŭm tơdrong vang tơgŭm djru kơtang đơ̆ng khul ƀô̆ đô̆i, dôm hnam trương tơring sơlam teh đak dêh char Đắk Lắk tŏk bŏk roi năr roi đei keh đang, hơnhăk ba tơdrong hơpơi ‘meh vă đei mĭnh hnam trương hŏk pơhrăm ‘lơ̆ng liĕm, rơvơn hloh ăn hok tro tơring tơnap tap. ‘Măng pơjei hăm jơ ‘năr oei tok bŏk kơrŭn kơtang, vă sơđơ̆ng ăn rim hơnih ming man hnam trương hŏk hrôih keh đang, pơih đei trong rơvơn ‘lơ̆ng hơ iă hloh ăn kôn mon kon hơ ‘lơ̆p kon pơlei oei tơ̆ tơring sơlam kơ Teh đak.