Kiơ̆ kơ noh, Hơnih jang Pơrô̆ pơrôp kon pơlei păng Hơlen nơ̆r pơtruh hăm Jơnŭm pơgơ̆r teh đak pơgơ̆r tenh kuăng tơdrong hơlen, pơm hơdah điểm pơlong môn Toán ưh đei trŏ tơ̆ Tuyên Quang; hơtŏk tơdrong jang tơjră hăm pơm tơlĕch tĕch răt tơmam drăm yah, pơgang yah; hơtŏk kơtang tang găn păng tơjră hăm pơlŏ lĕch đe; sek tơlang tơdrong pơm glăi lơ̆m chih tơlĕch hla bar ou to; akŏm hơlen, thu iŏk mŭk drăm lơ̆m dôm tơdrong pơhlŭ pơjĭp mă đei kiơ̆ trong "Hơp đŏng pơdơh pơdei"; atŭm hăm noh vei sơđơ̆ng tơdrong tang găn păng pĭt unh xa, vih vơ̆t kiơ̆ trong đak păng sek tơlang mă keh dôm tơdrong tơkêng lơ bơngai, đunh khei năr.

Adoi lơ̆m 'măng hop akŏm, Hơnih jang Kuô̆k hô̆i tơgop nơ̆r gah dôm Luơ̆t chih hơmet ming minh ƀar tơdrong kơ Luơ̆t Hơnih mong jên teh đak Việt Nam; Luơ̆t Tang găn păng tơjră pơ-'lơ̆ng jên; Luơ̆t Tơroi pơtho gah khôi luơ̆t (hơmet tơplih); Luơ̆t tơlang rơngei 'lơ̆ng tơ̆ tơring (hơmet tơplih) păng minh ƀar tơdrong kăp gĭt nai.