Khul bơ̆ jang năm lăng hloi trong iung jang iŏk dôm tơmam vă hơlen, găh kmăi kmŏk, bơ̆ jang vei lăng năng tông tơmam păng chih răk hô sơ. Adoi, mơ̆ng Hơnih chĕp pơgơ̆r 515 dêh char Gia Lai atŭm hăm khul bơ̆ jang tơroi tơbăt tơlĕch jang, dôm tơdrong rơvơn păng tơnap tap lơ̆m jang kiơ̆. Pơsat teh đak Đức Cơ hrei ou ‘noh hơnih ƀŭ kơ rơbou ƀô̆ đô̆i lôch dŏng teh đak, lơ̆m ou găh lơ pơsat tim mă băt hơnăn. Tơdrong akŏm hơlen kơting vă khăm hơlen ADN đei lăng jĭ trong jang kăl hloh vă pơvih pơvăn ăn băt hơdăh hơnăn rim ƀô̆ đô̆i lôch dŏng teh đak. Hloh đơ̆ng dăr lăng, Thiếu tướng Lương Đình Chung hôn bơnê hơnăp jang tơnăp đơ̆ng rim khul vang iung jang, hơmet pơ ‘lơ̆ng tơnap tap găh tŏ ‘mi kial, groi teh vă sơđơ̆ng ăn iung jang trŏ lăp. Ƀok jei athei khul kơdră Đảng, kơdră chĕp pơgơ̆r kơ tơring, rim khul ƀô̆ đô̆i păng khul bơ̆ jang atŏk kơtang iung jang hơdoi dăr lăng, hơlen hơdăh kơtơ̆ng ang đơ̆ng lơ yưh liu, adoi atŏk kơtang iung jang pơrô̆ tơbăt, sơng iŏk kơtơ̆ng ang đơ̆ng rim ƀô̆ đô̆i so păng kon pơlei vă pơvih pơvăn ăn bơ̆ jang hơlen hơdăh hơnăn rim kơting ƀô̆ đô̆i lôch dŏng teh đak.