Dôm năr blŭng khei 7, tơ̆ dôm hơnih ming man hnam oei tơgŭm ăn ŭnh hnam đei iŏk yoa ăn teh đak tơ̆ dêh char Quảng Ngãi, jơva re kmăi lŭk chuơh xi măng, mut pơ̆ng, jơva kmăt ot tret ‘long gơ gring. Kang ƀô̆, ƀô̆ đô̆i kŏng ang rim khul Ƀô̆ đô̆i, Kŏng ang atŭm hăm đoàn viên hơdruh tơdăm păng kon pơlei jei tơgop năr jang, atŏk kơtang iung jang ming man rim pơbŭng hnam ‘mêm mơnat keh đang hơdrol năr 20/7.

Đơ̆ng rŏng vă jê̆ 15 sơnăm iŏk ŭnh om păng hơrih sa lơm pơbŭng hnam hrăt hrot, hyăh hyok, mŏ Lê Thị Kiều, oei lơ̆m thôn Xuân Trung, tơring Trà Bồng jei hlôi đei pơbŭng hnam kơjăp ‘lơ̆ng. Mŏ Kiều ‘noh kon hơ ‘lơ̆p kơ ƀô̆ đô̆i rơka đei ƀơm răm đơ̆ng ƀrơ̆m phao pơgang pơm ăn, kơdih mŏ jei bơngai đei ƀơm kơnê̆ đơ̆ng ƀrơ̆m phao pơgang, lơ sơnăm ou ki tơdrong hơrih sa kơ ŭnh hnam mŏ jĭ tôch mơmat tat hrat hrĭn. Kon jên tơgum djru rim khei kơ mŏ jei lăp măh ăn răt sa kơ ‘năr, găh tơdrong ming man hnam oei nhen lĕ pă hơnhŏ tơchĕng truh.

Khei năr ou ki, ŭnh hnam mŏ Lê Thị Kiều đei teh đak tơgŭm ăn 60 triu hlak jên đơ̆ng tơdrong jang xut xa hnam pơgia, hnam hnăt hnot ‘măn ăn ŭnh hnam đei iŏk yoa ăn teh đak. Atŭm hăm kon jên ŭnh hnam chă mong răk lơ̆m lơ sơnăm, klo hơkăn mŏ Kiều hlôi đei ming man pơbŭng hnam ‘nao. "Pơbŭng hnam ‘nao kơ ŭnh hnam hlôi ming man đang bơih mălei tim mă chă pơlăp ‘măng ‘mŏk, hơdrông hnam gŏ jei tim mă pơm. Ŭnh hnam nhôn tŏk bok hơdrin tơchă jên vă pơm dơ̆ng hnam găh rŏng păng hnam gŏ. Pơbŭng hnam ‘nou jĭ lăp mĕ kon nhi oei, hơdrin vă hrôih pơm đei hnam gŏ vă đei hơnih pai sa vă kon hơ ‘lơ̆p sơđơ̆ng jơhngơ̆m hŏk pơhrăm. Dang ei đei hnam ‘nao ou hơ iă dêh. 

Pơbŭng hnam kơ ƀok Hồ Văn Ngoạt oei lơ̆m thôn Trà Hiệp, tơring Thanh Bồng jei tŏk bŏk iung jang tĕnh koăng vă jăh keh đang. Ƀok Ngoạt jĭ kon hơ ‘lơ̆p kơ bơngai vang iung tơblăh đei ƀơm răm đơ̆ng ƀrơ̆m phao pơgang pơm ăn. Lơ sơnăm ou ki ŭnh hnam ƀok hơrih sa lơ̆m pơbŭng hnam đĭ hư răm, rim ‘măng ‘mi kial jơhngơ̆m đon tơtăm tôch kơ dêh. Đei Teh đak tơgŭm ăn 60 triu hlak jên, ƀok Hồ Văn Ngoạt tŏk iŏk dơ̆ng 200.000 triu vă ming man hnam kơjăp ‘lơ̆ng ƀiơ̆:"Ki hei pơbŭng hnam nhôn hư răm, hnăt hnot. Dang ei đei Teh đak tơgŭm ăn 60 triu hlak jên, ŭnh hnam jei tơmơ̆t dơ̆ng kon jên vă pơm hnam, đei hơnih hơrih sa sơđơ̆ng. Tôch bơnê kơ Teh đak hlôi tơgŭm djru. Đei hnam ‘lơ̆ng kơjăp lơ lou, ŭnh hnam ba chhôk hơ iă dêh".

Tơ̆ tơring Thanh Bồng đei 4 ŭnh hnam đei iŏk yoa ăn teh đak đei tơgŭm djru xut xa hnam pơgia, hnam hnăt hnot. Iung jang ming man đơ̆ng khei 5/2026, truh dang ei 4 pơbŭng hnam hlôi jang đang 70% tơdrong ming man. Vă tơtom keh đang hơdrol năr 20/7 kiơ̆ nơ̆r pơrô̆ đơ̆ng dêh char Quảng Ngãi, tơring ou pơjing rim khul tơgŭm djru, hơvơn rim khul Kŏng ang, Ƀô̆ đô̆i, Mặt trận, rim khul păng kon pơlei vang yuih hnam, chơ tơmam drăm ming man, sir jơ̆ng, vang tơgŭm ming man. Dôm năr jang tơgŭm ăn đĕch hlôi tơgŭm ăn rim ŭnh hnam dă ƀiơ̆ tơhoach kơtang kon jên hơvơh đe jang ming man.

Ƀok Hồ Thanh Trường, Kơ iĕng Kơdră chĕp pơgơr Hơnih vei lăng kon pơlei tơring Thanh Bồng, dêh char Quảng Ngãi tơbăt, đĭ đăng rim ŭnh hnam đei tơgŭm djru jei găh lơ̆m dôm ŭnh hnam tơnap tap ngăl. Tơring jei chă pơrô̆ rim ŭnh hnam tơgĕch iŏk kon jên iŏk đei đơ̆ng jang pơtăm ‘long keo, rong kon tơrong vă tơgop lơ̆m kon jên pơm hnam; adoi krao hơvơn kang ƀô̆, rim bơngai đei jơhngơ̆m đon ‘lơ̆ng păng iŏk yoa Kon jên mong kơ yuơ Bơngai dơnuh tơgŭm ăn dơ̆ng, tơgŭm ăn rim ŭnh hnam đei rơvơn tơ iung pơjing dôm pơbŭng hnam kơjăp ‘lơ̆ng. " Hơnih vei lăng kon pơlei tơring Thanh Bồng pơjao ăn rim khul Kŏng ang, Ƀô̆ đô̆i iung jang hơdoi măt Măt trận, rim hơnih jang păng khul jang tơ pơlei pơla, mă kăl rim ŭnh hnam koeng ƀôt vang chă tơgŭm djru nhen yuih hnam, chơ pơdŭ tơmam drăm ming man, chuơ̆h, tơmo, xi măng, sir jơ̆ng hnam ... vă iung jang ming man hnam tĕnh koăng kiơ̆ trong pơrô̆ jang đơ̆ng dêh char, ming man keh đang hơdrol năr 20/7/2026."

Khei 3/2026, Thủ tướng Teh đak drơ̆ng mĭnh nơ̆r trong jang tơguưm djru xut xa hnam pơgia, hnam hnăt hnot ăn kon hơ ‘lơ̆p dôm bơngang vang iung tơblăh đei ƀơm răm đơ̆ng ƀrơ̆m pơgang pơrăm hăm kon jên jang đơ̆ng Hơnih mong jên kơ yuơ bơngai dơnuh Trung ương. Lăp đơ̆ng rŏng ‘noh, Hơnih vei lăng kon pơlei dêh charQuảng Ngãi pơjing trong Pơprŏ jang, athei rim tơring tĕnh koăng dăr lăng, tơlĕch jang hăm iung jang kơtang ming man keh đang hơdrol năr 20/7/2026.

Dêh char Quảng Ngãi đei 157 'nu jĭ kon hơ-ioh kơ bơngai vang tơblah vang sơ̆ ƀơm pơgang hoă hŏk tơ̆ 51 xah, phương, tơring tơm kăl chă tơgŭm ăn hnam oei. Hơnih tơm vei lăng Khul ƀô̆ đô̆i dêh char Quảng Ngãi hlôi pơjing đei 74 khŭl hăm 727 kang ƀô̆, linh kơtă vang jang tơgŭm ăn kon pơlei ming man hnam oei. Hơnih jang Ming man adoi tơlĕch um rup dôm kơluăi hnam oei 'lơ̆ng, păng trŏ ƀlep hăm tơdrong hơrih tơ̆ tơring. Ưh hơdrô̆ tơgŭm hnam oei, lơ tơring tơ̆ dêh char Quảng Ngãi oei jang hơdoi lơ tơchơ̆t tơgŭm pơyua nai nhen tơgŭm hơdrĕch 'long pơtăm kon yŏng, pơm trong ƀônh ăn kon pơlei tŏk iŏk jên jang đơ̆ng dôm tơchơ̆t jang kơ teh đak vă hơtŏk pơm trong jang xa, brư̆ brư̆ sơđơ̆ng tơdrong hơrih xa.