Kiơ̆ đơ̆ng rim kơdră tang măt, vă iŏk đei tŏk mŭk drăm hloh 10% lơ̆m sơnăm đơ̆ng 7,84 % hrei ou, Hơnih vei lăng kon pơlei dêh char Đắk Lắk kăl tơ iung pơjing trong jang hơdăh, sơkơ̆t hơdăh rim tơdrong vă jang kăl, kon jên jang gô tơlĕch ăn păng rim trong jang pơjing tŏk kơtang. Ƀok Lê Văn Cường, Kơdră chĕp pơgơ̆r Hơnih vei lăng Oei sa joh ayŏ-Tơpôl kơ Jơnŭm vei lăng kon pơlei dêh char Đắk Lắk athei:"Ĭnh athei Hơnih vei lăng kon pơlei dêh char kăl tơƀôh mă hơdăh ‘noh 6 khei hơtuch sơnăm gô đei hơnih ming man ayơ, tơdrong vă jang ayơ, tơlĕch kon jên tơmơ̆t jang ayơ vă sơđơ̆ng đei tŏk mŭk drăm jô̆ hơtŏ lơ̆m sơnăm đơ̆ng 10,02% năm tơ̆ lơ."

Hơlen hơdăh dôm tơdrong tơhlăk tơhlĭn tŏk mŭk drăm, rim kơdră tang măt Jơnŭm vei lăng kon pơlei dêh char Đắk Lắk akhan, pơđĭ hloi lơ̆m tơdrong groi teh, bơ̆ jang pơm hla bơar, jei đei lơ tơdrong kăl vă hơmet pơ ‘lơ̆ng. Yă Bùi Thị Hà Giang, Bí thư Đảng ủy, Kơdră chĕp pơgơ̆r Jơnŭm vei lăng kon pơlei tơring Ea Drăng, dêh char Đắk Lắk tơƀôh hơdăh dôm tơdrong tơ̆ tơring:"Tơdrong trŏ lăp kơ kon pơlei păng hơnih mơdro sa lơ̆m iung jang pơm hla bơar ‘noh tim mă ‘lơ̆ng. Mă ƀar ‘noh bơ̆ jang teh đak vei lăng groi teh, ƀơk ăn hla bơar pơm tơ-‘ngla teh adoi nhen rim trong jang iŏk yoa teh đơ̆ng teh choh jang sa, mir đak lar tŏk bŏk tơƀơ̆p tôch kơ lơ tơdrong tơhlăk tơhlĭn mă bơ̆n gô tơnap mă iung jang ‘noh atŏk tơ iung mŭk drăm kơ tơring nhôn pơma hơdrô̆, kơ dêh char pơma atŭm."

‘Măng hop akŏm kơ Jơnŭm vei lăng kon pơlei dêh char Đắk Lắk đei pơgơ̆r lăp đơ̆ng rŏng dêh char tơbăt hơdăh Trong pơprŏ jang păng pơgơ̆r jơnei Hop akŏm pơtrŭt tơmơ̆t jên jang. 25 tơdrong vă jang, akŏp kon jên tơmơ̆t jang hloh 40.200 ti hlak jên hlôi đei ƀơk ăn hla bơar gơh tơmơ̆t jên jang. Rim tơdrong jang hăm kon jên tơmơ̆t jang đơ̆ng teh đak tŏk bok tơlĕch jang tơ̆ Đắk Lắk jei đei hơnih jang tôch kơ tih. Mă lei, kiơ̆ đơ̆ng bơngai tang măt Huỳnh Gia Hoàng, Kơ iĕng kơdră chĕp pơgơ̆r Hơnih bơ̆ jang Jên hu dêh char Đắk Lắk, vă tơgop ‘lơ̆ng hơ iă ăn tŏk mŭk drăm, pơđĭ lơ̆m khul chinh trĭ kăl iung jang kơtang hloh dơ̆ng, hơmet pơ ‘lơ̆ng dôm tơdrong tơhlăk tơhlĭn găh iŏk tơvih teh ăn ming man păng tơlĕch kon jên tơmơ̆t jang."Vă tơlĕch jang kon jên teh đak tơmơ̆t jang, kăl hơlen hơdăh ‘nou jĭ tơdrong jang pơđĭ lơ̆m khul chinh trĭ. Mă kăl ‘noh akŏm lơ̆m trong iŏk tơvih teh vă ming man. Tim mă đei sơnăm ayơ kon jên jang teh đak tơmơ̆t jang đei lơ nhen hrei ou. Kơ yuơ lơ loh, khul kơdră chĕp pơgơ̆r đảng, khul kơdră chĕp pơgơ̆r tơring, mă kăl ‘noh khul kơdră chĕp pơgơ̆r tơ̆ kâp tơring, phương, kăl hơlen hơdăh ‘nou jĭ tơdrong jang tơm kăl hloh vă iung jang lơ̆m jăl jang ou”.

Rim kơdră tang măt drơ̆ng mĭnh nơ̆r akhan Đắk Lắk tŏk bŏk đei lơ tơdrong rơvơn atŏk tơ iung mưh cham char atŏk tơ iung đei pơih să, pơprŏ jang đei tơbăt hơdăh păng tơdrong lăng tông đơ̆ng rim bơngai tơmơ̆t jên jang roi năr roi lơ. Mă lei, tơdrong rơvơn lăp gơh jing jơhngơ̆m pran ăn tŏk mŭk drăm mưh rim tơdrong tơhlăk tơhlĭn găh teh đak tơmơ̆t jên jang, groi teh, pơprŏ jang, tơdrong jang pơm hla bơar păng trong tơlĕch jang kiơ̆ đei hơmet pơ ‘lơ̆ng tơtom lơ̆m dôm khei hơtuch sơnăm.