Dang ei anih âu oei vei lăng 350 ‘nu bơngai kăl đei tơgŭm ‘nŏh jĭ bơngai kră, bơngai jo jăn, bơngai vơnh, hơioh đei tơdrong arih pơmat tat dêh hlŏh păng bơngai mơmat tat nai hai. Anih oei hơmet dôm lăm pơtâp pơhrăm lăp hăm rim bơngai, nhen lăm pơtâp hơkâu jăn, sân đă ƀŏng lŏng, sân teh sŏk iĕr…, atŭm hăm ‘nŏh pơm ‘lơ̆ng dôm tơdrong tơgŭm lơ̆m tơpôl, jang pơgang, pơtho pơhrăm, ngôi pơchơt.

Jet gia pơma nuh, pơlung dôm bơngai oei đei vei rong tơ̆ âu, ƀok Nguyễn Văn Nên pôk pơ ư tơdrong adrin đơ̆ng khul kăn ƀô̆, bơngai jang lơ̆m tơdrong vei lăng năng tông, rong ‘me dôm bơngai kăl đei tơpôl tơgŭm ăn. Ƀok oei chih iŏk dôm nơ̆r apinh đơ̆ng anih jang, athei kơdră chĕp kơ̆l dêh char tơrek truh, sek tơlang kiơ̆ hơnăp jang kơdih, vă pơm hơtŏk tơdrong ‘lơ̆ng ăn tơdrong jang tơ̆ anih âu, tơgop roi ‘lơ̆ng ăn tơdrong vei lăng năng tông truh tơdrong arih xa găh tơmam drăm, jơhngâm đon ăn dôm bơngai oei bơ̆ jang tơ̆ anih âu.