Hrei ‘nâu, dêh char Đắk Lắk đei hlŏh 1.060 ‘nu bơngai đei bưng ai tih, đei kon pơlei lui yom bơ̆ jang rơgei, oei xa ‘lơ̆ng, găh 49 hơdrĕch hơdrung arih xa hơdai tơ̆ tơring. Đe sư jĭ dôm bơngai tôch tơnăp, hlôh vao kơjăp dôm tơdrong juăt đơ̆ng sơ̆, kŭm nhen đon hơpơi ‘mĕh đơ̆ng mih ma duch nă hrei ‘nâu, jĭ bơngai đei kon pơlei pơla gơnang; jĭ gơng tơƀưh tôch hơđơ̆ng ăn kon pơlei hăm khul kơdră pơgơ̆r, adrin jang xa, atŏk tơiung mŭk drăm, tơpôl, vei kơjăp tơdrong sơđơ̆ng, tơjră plơ̆ rim tơdrong hơlĕnh pơdăr ‘mĕh phă ngơ̆r pơlei pơla đơ̆ng khul hơyăt, vang tơgop vei kơjăp tơdrong sơđơ̆ng chinh trĭ tơ̆ tơring.

Tơ̆ jơ tơƀâp, dôm bơngai tang măt roi tơbăt rim tơdrong kăl lơ̆m tơdrong krao hơvơn kon pơlei, sek tơlang, pơjing tơring tơrang ‘nao, krao hơvơn druh dăm năm pơm linh. Ƀok Y Tum Ayun, bơngai đei kon pơlei lui yom tơ̆ plei Ea Tuk, xăh Cư Pơng, akhan, tơdrong drơ̆ng pôm nơ̆r lơ̆m kon pơlei jĭ tơdrong tôch gĭt kăl vă pơjing pơlei pơla phĭ tơtŏ dơnŏ ‘lơ̆ng, hiôk chơt. Yoa thoi noh, rim bơngai athei adrin mât 1 ƀơ̆r đon, vang pơjing pơlei pơla: “Hơnơ̆ng kŭm hăm Đảng, khul kơdră tơring pơjing pơlei pơla jang atŏk tơiung mŭk drăm, vei kơjăp tơdrong sơđơ̆ng chinh trĭ, sơđơ̆ng lơ̆m tơpôl tơ̆ tơring, roi tơbăt, pơtho tơƀôh ăn mih ma duch nă dôm tơdrong ‘nao, lăp ‘lơ̆ng, pơlung kon pơlei adrin jang xa, rong ‘me kon sâu hŏk pơhrăm, adrin sut pơđĭ pơngot, tơjur tơnuh hin”.

Bơngai tang măt chă pơma nuh, roi tơƀôh ăn băl trong bơ̆ jang vă hơtŏk đon kơchăng, tơjră hăm rim tơdrong hơlĕnh pơdăr chă trong phă ngơ̆r pơlei pơla đơ̆ng khul hơyăt, pơm hơtŏk tơdrong pơvei kơjăp ‘lơ̆ng đinh linh hăm kon pơlei.

Pơma tơ̆ jơ tơƀâp, Đại tá Niê Ta, Yŏng Anih chĕp kơ̆l pơgơ̆r khul linh dêh char Đắk Lắk bơnê dôm tơdrong tơgop tih tên, kăp gĭt đơ̆ng đe kră pơlei, ƀok pơgơ̆r pơlei, bơngai đei bưng ai tih, đei kon pơlei lui yom hăm tơdrong jang kơ khul linh, vei kơjăp ‘lơ̆ng ăn teh đak tơ̆ tơring. Atŭm hăm ‘nŏh athei dôm bơngai đei kon pơlei lui yom hơnơ̆ng jang kiơ̆ mă ‘lơ̆ng rim khôi luơ̆t hăm tơdrong juăt, krao hơvơn kon pơlei gơ̆h hơgei, đei yoa ‘lơ̆ng.

Đại tá Niê Ta pơma: “Băt hơdăh trong jang, tơdrong tơgŭm đơ̆ng Đảng, khôi luơ̆t teh đak, tơmât hơdai ‘lơ̆ng khôi luơ̆t hăm tơdrong juăt so vă roi tơƀôh, krao hơvơn kon pơlei arih xa păng bơ̆ jang kiơ̆ khôi luơ̆t tơm. Roi tơbăt, pơtho tơƀôh ăn kon pơlei hơdrĕch hơdrung kơdih lê̆ mơ̆ng, lê̆ lui dôm nơ̆r pơma hơlĕnh pơdăr, ưh kơ trŏ đơ̆ng hơyăt vă phă pơrăm tơdrong sơđơ̆ng teh đak, phă ngơ̆r tơdrong pơm tơm kơ teh đak”.

Ƀlep ƀât ‘măng mă  âu, Anih chĕp kơ̆l pơgơ̆r khul linh dêh char Đắk Lắk hơpăh ƀăng khen ăn 30 ‘nu bơngai jang tơnăp ‘lơ̆ng hlŏh lơ̆m tơdrong vei lăng teh đak, vang tơgŭm pơvih ăn khul linh tơ̆ tơring lơ̆m sơnăm 2025, vang tơgop ‘lơ̆ng ăn tơdrong jang đĭ đăng kon pơlei vang vei lăng teh đak./.