Kiơ̆ kơ Anih tơm pơgơ̆r khŭl linh plei tơm HCM, lơ̆m 'năr 13/9, dôm khul linh hơnơ̆ng pơih xă tơdrong chă kôch akŏm tơ̆ hơbong kơsô̆ 2, Hơnih A, Cham ngôi pơhiơ̆ Lê Thị Riêng. Hloh 300 m³ teh đei hơmet, hăm 3 tŏ kơmăy vŏk, 1 tong gre ben păng 2 gre tih 3,5 tấn đei hơvơn pơyoa ăn sir kôch, chơ chuĕn teh.

Lơ̆m 11 kơting linh lôch tang ăn teh đak đei chă ƀôh, akŏm lơ̆m năr, đei 7 kơting đei tơmam hơdai. Jô̆ truh 'năr 13/9, khŭl linh tơchă hlôi chă ƀôh, kôch akŏm 627 kơting linh lôch tang ăn teh đak, lơ̆m noh 294 kơting đei tơmam. Khŭl jang hơnơ̆ng pơih să tơchă tơ̆ Hơnih A, akŏm lơ̆m hơbong kơsô̆ 2 păng dôm hơnih đei jâu ƀơm truh.