Tơ̆ rim tơring truh năm gôi, tang măt ăn Kơdră chĕp pơgơ̆r Đảng, Teh đak, Đại tướng Phan Văn Giang hlôi apĭnh jet gia pơma dơnuh gah jơhngơm pran jăng grăng akou, tơdrong hơrih sa kơ rim ŭnh hnam; tơbăt jơhngơ̆m đon ƀlok hơdơ̆r hôn bơnê kơtang hăm dôm tơdrong plang ăn pham lĕch sĕch huŏng đơ̆ng rim ƀô̆ đô̆i rơka, jĭ jăn, ƀô̆ đô̆i lôch dŏng teh đak păng dôm bơngai đei iŏk yoa ăn teh đak lơ̆m tơdrong jang iung tơjră pơm rơngei hơdrĕch hơdrung, vei lăng teh đak. Đại tướng hơpơi ‘meh vă rim ŭnh hnam hơnơ̆ng jang kiơ̆ ‘lơ̆ng tơdrong joăt joe kĕch mang, pơtho ăn jơhnơr mơlôh păng hơdrin vang tơgop tơ iung pơjing pơlei pơla, teh đak.