Khei năr pơm jang đơ̆ng 2026 - 2027. Lơ̆m kơsô̆ hloh 215 tih hlj đei asong, đei pơhlom 184 tih hlj đơ̆ng Trung ương, hloh 31 tih hlj mong kơ dêh char Đăk Lăk. Hơnih jang vei lăng kon pơlei dêh char Đăk Lăk asong ăn Hnam trưng hŏk teh đak rong 'me rim jăl xah Ia Lốp 68 tih hlj; Hnam trưng hŏk teh đak rong 'me rim jăl xah Ia R’vê đei asong atăm 59 tih hlj; Hnam trưng hŏk teh đak rong 'me rim jăl xah Buôn Đôn đei asong atăm 89 tih hlj. Jên asong ou 'măn ming man 'nao hnam pơm jang, hơnih akŏm đŏk hal bar, hnam oei ăn bơngai pơtho păng dôm tơdrong kăl 'măn pơtho pơhrăm ăn dôm hnam trưng.

Jăl sơnăm 2025 – 2027, dêh char Đăk Lăk pơtơm man 3 Hnam trưng hŏk teh đak rong 'me rim jăl tơ̆ tơring sơlam đei: Ia Lốp, Ia R’vê păng Buôn Đôn, hăm kơsô̆ jên asong jang jăl 1 hloh 390 tih hlj. Rim hnam trưng athei keh đang păng tơmơ̆t yua kơtă lơ̆m sơnăm hŏk 2026 – 2027. Sơnăm hŏk 'nao 2026 – 2027, rim hnam trưng hŏk teh đak rong 'me rim jăl tơ̆ tơring sơlam kơ dêh char Đăk Lăk gô sơng đei pơhlom 3.100 hŏk tro đơ̆ng lăm 1 truh lăm 9.