Tơ̆ dêh char Đắk Lắk, Khul kơdră tang măt Kuô̆k hô̆i dêh char iung jang hơdoi hăm Kong ang dêh char pơgơ̆r hop akom iok nơ̆r tơgop hăm tơdrong vă pơjing Khôi luơ̆t Hình sự (hơmet ming), Khôi luơ̆t Hơnih bơ̆ jang dăr lăng hơlen tơdrong yoch hình sự (hơmet ming) păng trong vă pơjing Tơdrong tơchơ̆t găh trong bơ̆ jang kăl xek tơlang tơdrong pơm glăi khôi luơ̆t đei ƀơm truh mŭk drăm teh đak, muk drăm kon pơlei, ư̆ng yŭng khoa hŏk-kmăi kmŏk, tơplih ‘nao tơchăr păng tơplih kơsô̆.

Rim kơdră tang măt drơ̆ng mĭnh nơ̆r tơdrong kăl vă pơjing đei rim khôi luơ̆t, tơdrong tơchơ̆t vă trŏ lăp hăm dôm tơdrong yan ou. Lơ nơ̆r tơgop tơdrong pơjao gơh jang dăr lăng, lăng hơlen rim tơdrong tơchơ̆t găh tơdrong phak, ưh kơ phak dăh mă pơdơ̆h ‘mơ̆i pơlăp chiu pŭ hinh sư̆, adoi athei tơmơ̆t dơ̆ng mĭnh ƀar tơdrong pơm glăi ‘nao.

Tơgop nơ̆r hăm trong vă pơjing Khôi luơ̆t Hình sự (hơmet ming), tang măt ăn Hơnih jang Tư pháp dêh char Đắk Lắk akhan, tơdrong iŏk yoa rim nơ̆r pơma "pơm glăi dang ăi", "pơm glăi kơtang hloh", "pơm glăi dă ƀiơ̆" lơ̆m jăl 6, Apăng 4 tim mă trŏ lăp hăm pơkăp khôi luơ̆t."Yoch ‘noh jĭ nơ̆r pơma tơbăt ăn tơdrong pơm yoch, ưh khan vă tơbăt hơdăh găh tơdrong pơm glăi kơtang găh pơm yoch dăh mă tơchơ̆t yoch kơtang dang yơ. Kơyuơ lơ loh, kăl tơchĕng mă hơlen ưh kơ gơh iŏk yoa dôm nơ̆r ou vă sơđơ̆ng ăn trŏ lăp kơ trong vă pơjing."

Hăm trong vă pơjing Khôi luơ̆t Hơnih bơ̆jang dăr lăng hơlen hình sự (hơmet ming), lơ nơ̆r tơgop tơƀôh hơdăh dôm tơdrong tơhlăk tơhlĭn lơ̆m bơ̆ jang dăr lăng tơ̆ tơring, mă kăl mưh tơlĕch jang kiơ̆ trong jang hơnih bơ̆ jang dăr lăng ƀar kâp. Thượng tá Đặng Quang Hưng, Kơdră chĕp pơgơ̆r Kŏng ang phương Ea Kao, drơ̆ng lăp hăm tơdrong pơjing khôi luơ̆t mă tôm tong, mă hơdăh tơdrong jang, gơh jang kơ Bơngai bơ̆ jang dăr lăng ‘noh Kơdră dăh mă Kơ iĕng Kơdră chĕp pơgơ̆r Kŏng ang kâp tơring, adoi athei hơnơ̆ng pơm pơkeh tơdrong tơchơ̆t vă sơđơ̆ng ăn tơdrong trŏ lăp." Kăl tơchơ̆t hơdăh găh pơjao jang, hơnăp jang kơ rim bơngai păng trong jang hơmet pơ ‘lơ̆ng mưh đei tơdrong đei tơplih găh bơngai jang; adoi sơkơ̆t hơdăh găh hơnăp gơh jang kơ bơngai đei pơjao jang adoi nhen rim pang pơjao ăn. Tơdrong ưh kơ đei tôm trong pơkăp sơkơ̆t hơdăh bơngai chĕp kơl, hơnăp jang păng dôm trong jang ou to gô pơm ăn mơ ‘nhuêng mơ ‘nhoang, tơhlăk tơhlĭn lơ̆m jang kiơ̆ nơ̆r pơrô̆ jang păng iung jang rim tơdrong jang hơlen xek tơlang tơdrong yoch”.

Khul kơdră tang măt Kuô̆k hô̆I dêh char Đắk Lắk drơ̆ng akhan lơ nơ̆r tơgop tôch tơpăt ‘lơ̆ng, ƀlep dôm tơdrong yan ou. Dôm nơ̆r tơgop gô đei chih akŏm, pơtruh ăn Kuô̆k hô̆i lăng hơlen lơ̆m rim tơdrong jang pơm pơkeh rim tơdrong vă pơjing khôi luơ̆t, tơdrong tơchơ̆t tơ̆ ‘măng hop akŏm.

 Atŭm hăm Đắk Lắk, Kong ang dêh char Lâm Đồng jei iung jang hơdoi hăm Khul kơdră tang măt Kuô̆k hô̆i dêh char pơgơ̆r hop akŏm tơroi tơbăt, tơbăt ăn kơtơ̆ng ang păng iŏk nơ̆r tơgop hăm rim tơdrong vă pơjing khôi luơ̆t, tơdrong tơchơ̆t kơ yuơ Hơnih tơm Kong ang pơm tơm chih tơlĕch. Hop akŏm đei pơgơ̆r kơtă atŭm hăm trư̆k tuyên truh Kong ang rim tơring, phương, tơring kăl lơ̆m dêh char.

Rim kơdră tang măt akom tơgop nơ̆r hăm tơdrong vă pơjing Khôi luơ̆t Hình sự (hơmet ming), Khôi luơ̆t Hơnih bơ̆ jang dăr lăng hơlen tơdrong yoch hình sự (hơmet ming) păng trong vă pơjing Tơdrong tơchơ̆t găh trong bơ̆ jang kăl xek tơlang tơdrong pơm glăi khôi luơ̆t đei ƀơm truh mŭk drăm teh đak, muk drăm kon pơlei, ư̆ng yŭng khoa hŏk-kmăi kmŏk, tơplih ‘nao tơchăr păng tơplih kơsô̆. Lơ nơ̆r tơgop akhan, tơdrong hơmet ming, tơmơ̆t dơ̆ng rim tơdrong tơchơ̆t khôi luơ̆t jing tơdrong kăl hloh lơ̆m khei ‘năr tơplih kơsô̆, proh hơmet khul bơ̆ jang păng jang kiơ̆ trong bơ̆ jang tơring ƀar kâp, đơ̆ng noh pơjing đei trong bơ̆ jang ‘lơ̆ng, trŏ lăp hăm tơdrong ‘meh vă đei sơđơ̆ng dơ̆ng kơjăp păng atŏk tơ iung mŭk dram-tơpôl.

Dôm nơr tơgop tơpăt ‘lơ̆ng, trŏ lăp hăm yan ou hlôi đei Khul kơdră tang măt Kuô̆k hô̆i rim dêh char chih akŏm, pơtruh ăn Kuô̆k hô̆i păng rim hơnih pơm tơlĕch vă hơnơ̆ng chă tơchĕng hơlen, pơm pơkeh rim trong vă pơjing khôi luơ̆t hơdrol pơtruh ăn Kuô̆k hô̆i lăng hơlen. Kiơ̆ đơ̆ng noh, hơnơ̆ng sơkơ̆t, tơƀôh hơdăh hơnăp jang đơ̆ng Khul kơdră tang măt Kuô̆k hô̆i lơ̆m tơdrong chă mơ̆ng, tơgoăt iŏk nơ̆r tơgop đơ̆ng bơngai tah hla păng ba dôm tơdrong hơpơi ‘meh yan ou Tây Nguyên truh hăm hơnih hop akom tih.