Mă hơdăh ‘năr 29/7, 15 ‘nu kăn ƀô̆, linh găh Anih chĕp kơ̆l pơgơ̆r khul linh xăh Đăk Pék, pơgơ̆r tơchă tơ̆ 1 anih ‘nŏh plei Đăk Xanh păng thôn 16/5. Tơdrong tơchă đei bơ̆ jang hmă, hăm dôm tơmam nhen ‘nhik, kơƀênh păng tơmam yoa nai. Ƀât oei sir chă,khul jang kơpal chă ƀôh 1 kơ̆l linh lôch tang ăn teh đak, oei đei ao chai lôm văn hơkâu tơ̆ ‘ngoăih, hơdai hăm chơ khŏ, tơmam khul linh păng kơting oei ‘lơ̆ng mơ̆n.

Khul bơ̆ jang pơgơ̆r kôch iŏk kơting kiơ̆ tơdrong hơgăt, chơ vih tơ̆ Hnam pơgang Đăk Glei vă pơyoa ăn tơdrong set hơlen păng bơ̆ jang dôm hơyak đơ̆ng rŏng dơ̆ng. Dang ei, Khul K53, Anih chĕp kơ̆l pơgơ̆r khul linh dêh char Quảng Ngãi oei hơnơ̆ng pơgơ̆r tơchă tơ̆ dôm anih đei jâu đei linh lôch tang ăn  teh đak tơ̆ xăh Đăk Pék.