Vă jê̆ 70 sơnăm, jơhngâm pran pă đei jăng bơih, mă lei ƀok Bùi Văn Tạc, tơ̆ plei Mrông Yố, xăh Ia Phí, dêh char Gia Lai oei ưh kơ hiơt kơ ‘nhŏng sư ‘nŏh jĭ linh lôch tang ăn teh đak Bùi Văn Tửu, lôch tang sơnăm 1954 tơ̆ kơdră tơblăh găh Tu. Đei kăn ƀô̆ tơring chông năm tơ̆ phường Pleiku vă ƀet iŏk pham pơyoa ăn tơdrong set hơlen ADN, ƀok Bùi Văn Tạc ưh kĕ ôn tơdrong hơiă: “Hơpơi ‘mĕh tih hlŏh dang ei ‘nŏh chă đei hơnăn, chă đei pơsat vă sơng sư vih hăm yă ƀok, hăm hơdrĕch hơdrung. Kơtum kơtŏng ‘nhŏng ŏh tơm lơ̆m hnam dang ei lôch vă đĭ bơih.”

Kŭm đei măt đơ̆ng hrôih tơ̆ anih iŏk kơmẫu ‘nŏh jĭ yă Lê Thị Hòa, tơ̆ xăh Đak Đoa. Unh hnam yă đei 2 ‘nu ‘nhŏng jĭ linh lôch tang ăn teh đak Lê Thắng, lôch tang sơnăm 1972 păng linh lôch tang ăn teh đak Lê Lợi, lôch tang sơnăm 1974, tơ̆ kơdrăn tơblăh Quảng Trị ngăl. Lơ sơnăm âu ki, yă kŭm hăm bơngai lơ̆m hnam năm chă jơ̆p jơ̆p tơring hăm đon hơmĕng chă đei pơsat đe ‘nhŏng, mă lei truh dang ei oei chă tam mă ƀôh ‘mơ̆i. Kơlih thoi noh, tơdrong iŏk kơmẫu ADN ‘măng mă âu nhen tơ̆k tơiung dơ̆ng 1 tơdrong hơmĕng ‘nao ăn unh hnam: “Dang ei unh hnam tôch 'mĕh chă đei 2 'nu 'nhŏng, đei hơnăn, đei pơsat vă unh hnam rim sơnăm truh ngôi, soh hlôt nhang ăn đe 'nhŏng.”

Tơ̆ tơring đak dơsĭ Quy Nhơn, đon hơiă, đon hơmĕng roi dêh tơ̆ muh măt ƀok Nguyễn Văn Phước mưh đei iŏk kơmẫu ADN hăm tơdrong hơpơi ‘mĕh chă đei ‘nhŏng sư ‘nŏh jĭ linh lôch tang ăn teh đak Nguyễn Tỷ, lôch tang sơnăm 1969. Mĕ ƀă lôch hơchăng hrôih, dôm tơdrong ƀơm truh tơ̆ bơngai ‘nhŏng lăp ‘moi kiơ̆ nơ̆r tơroi đơ̆ng kơtum kơtŏng ‘nhŏng oh đĕch. Hlŏh 50 sơnăm âu ki, unh hnam ƀok Phước oei hơnơ̆ng soi kơ linh lôch tang ăn teh đak Nguyễn Tỷ mă lei tam mă 1 ‘măng băt ƀok lôch păng ƀŭ tơ̆ yơ: “Năr ‘nâu đei iŏk kơmẫu ADN kơtum kơtŏng ‘nhŏng oh, inh tôch hơiă. Đunh kơ âu oei hơnơ̆ng soi kơ ‘nhŏng mă lei ưh băt ‘nhŏng tơ̆ yơ kơna tôch sơ ‘ngon. Hơpơi ‘mĕh ‘nhŏng đei sir iŏk kơting ƀŭ hơmet tơ̆ pơsat linh vă inh gơ̆h năm sŏh nhang.”

‘Măng bơ̆ jang chă iŏk kơmẫu ADN kơtum kơtŏng ‘nhŏng oh đe linh lôch tang ăn teh đak tam mă băt hơnăn tơ̆ Gia Lai đei pơgơ̆r tơ̆ 9 anih lơ̆m dêh char. Khul linh công an, kăn ƀô̆ jang pơgang kŭm hăm bơngai jang tơgŭm đei ăn bơ̆ jang hơnơ̆ng chă iŏk rim kơmẫu. Thượng tá Nguyễn Hòa Bình, Phŏ Kơdră Anih kanh sat vei lăng tơdrong sơđơ̆ng tơpôl, Công an dêh char Gia Lai ăn tơbăt, kơtum kơtŏng ‘nhŏng oh linh lôch tang ăn teh đak đei pơtho pơm pơkĕh hla ar, hơlen năng rim nơ̆r chih tơroi, hơlen năng pham vă iŏk kơmẫu păng chih tơmât rim tơdrong mă trŏ hăm ki thuơ̆t: “Pơgơ̆r, pơtho tơƀôh ăn công an xăh chă hơlen năng, chih tơroi rim tơdrong găh linh lôch tang ăn teh đak tam mă băt hơnăn kŭm nhen kơ tum kơtŏng ‘nhŏng oh vă iŏk kơmẫu ADN, dôm khul linh ưh pơngơ̆t kơmăng dăh mă kơ ‘năr năm truh rim hnam vă roi tơbăt ăn kon pơlei vang jang.”

Truh dang ei, Gia Lai hlôi jang đang tơdrong hơlen năng, chih hơdăh păng tơroi tôm tơdrong găh đe linh lôch tang ăn teh đak, kơtum kơtŏng ‘nhŏng oh đe linh lôch tang ăn teh đak tơmât lơ̆m kơmăy chih răk kơ teh đak găh tơdrong arih xa kơ kon pơlei. Lơ̆m dêh char hlôi chih tơroi hlŏh 32 rơbâu ‘nu linh lôch tang ăn teh đak; lơ̆m noh đei hlŏh 8 rơbâu ‘nu linh lôch tang ăn teh đak tam mă băt hơnăn. Atŭm hăm ‘nŏh chih iŏk đei dang 4.200 ‘nu kơtum kơtŏng ‘nhŏng oh linh đei iŏk kơmẫu ADN.

Yă Nguyễn Thị Thanh Lịch, Phŏ Kơdră vei lăng kon pơlei dêh char Gia Lai, ăn tơbăt: “Tơlĕch tơdrong jang 500 măng năr, ‘ngoăih kơ iŏk kơmẫu ADN vă gơih ăn đe set hơlen, nhôn kŭm oei tơchă, chih jô̆ đĭ đăng kơtum kơtŏng ‘nhŏng oh đe linh lôch tang ăn teh đak, dôm bơngai tam mă chă ƀôh kơting vă pơm hla ar, chih răk rim kơsô̆ hrơ̆ch ‘lơ̆ng, tơgŭm set hơlen ADN đe linh lôch tang ăn teh đak. ‘Nâu kŭm jing jơnăr vă rim jơhnơr mơlôh tơƀôh jơhngâm đon ‘mêm bơnê tơdrong tơgop đơ̆ng đe linh lôch tang yoa tơdrong rơngei, hiôk hian kơ teh đak, vă jăh chơ hơnhăk đe linh lôch tang ăn teh đak vih hăm unh hnam, kơtum kơtŏng ‘nhŏng oh.”

Đei lơ unh hnam hlôi gô chang hlŏh 50 sơnăm vă băt bơngai lơ̆m hnam đe sư oei tơ̆ yơ. Trong yak ‘nŏh rŏ năng oei đei lơ jơnăr, mă lei rim kơmẫu ADN đei iŏk akŏm năr ‘nâu gô đei dơ̆ng 1 tơdrong ‘lơ̆ng vă dôm tơdrong tơroi oei tam mă băt tôm gơ̆h chih tơroi ming dơ̆ng. Păng ‘nŏh kŭm jing tơdrong mă dôm khul kơdră chĕp kơ̆l, dôm anih jang kơpal kŭm hăm tơpôl hơnơ̆ng bơ̆jang tơƀôh jơhngâm đon ‘mêm kơeng hăm dôm bơngai hlôi lôch tang yoa teh đak, vă roi đunh roi đei lơ linh lôch tang ăn teh đak đei chă đei dơ̆ng hơnăn kơdih păng vih dơ̆ng hăm hnam tơnŏ./.