Năm truh tơ̆ hơnih oei 'nao đơ̆ng hrôih, ƀok Nay Ơn, oei tơ̆ pơlei Nông Siu, xah Ia Dreh, chơt hơ-iă ah mă rơih đei hơnih teh 'nao. Ƀok ăn tơbăt, lơ sơnăm kơ ou, unh hnam hơrih lơ̆m hơnih teh hơnơ̆ng kơ ƀơm đak lơ̆p jrŭ ah pơyan 'mi kial. 'Măng mă ou, ƀok jĭ minh lơ̆m 20 unh hnam kon pơlei tơ̆ pơlei Ia Klon, Gom Gốp, Bhă Nga păng Blăk đei asong ăn hơnih oei 'nao hơdrol đĭ đăng, Hơnih oei 'nao Ia Dreh să truh 5,77 ha, đei jên asong jang 127 tih hlj, dang ei keh đang hnam oei, dui unh hơyuh đei pơhlom 75% păng tơdrong ƀŭ jrăng asong rơvak teh hlôi keh đang, Ƀok Nay Ơn ăn tơbăt:  “Anih oei so ưh đei sơđơ̆ng, hơnơ̆ng kơ ƀơm đak lơ̆p jrŭ, hiơ̆r dêh. Dang ei teh đak tơgŭm ăn rim unh hnam truh oei tơ̆ anih sơđơ̆ng hloh. Inh chơt hơ-iă dêh, păng tôch hmach bơnê kơ teh đak”

Ưh hơdrô̆ tơ̆ Ia Dreh, 953 unh hnam kon pơlei lơ̆m tơring tŏ 'mi kial pơrăm tơ̆ dôm xah Ia Tul, Ia Hiao, Ia Rsai, xah Uar, Đăk Song păng Ia Ly adoi gô đei asong ăn hơnih oei 'nao sơđơ̆ng, brư̆ brư̆ pơm sơđơ̆ng jơhngơ̆m kon pơlei lơ̆m rim khei 'mi kial đak hơbông.  

Gia Lai jĭ pơlei pơla kơ Ƀok dơnơm Quang Trung. "Tơdrong jang Quang Trung" đei dêh char Gia Lai pơtơm đơ̆ng dang ei truh năr 15/12/2026, hăm tơchơ̆t 'nhăk tôm kon pơlei lĕch đơ̆ng dôm tơring teh hơlih, đak lơ̆p jrŭ lơ̆m khei 'mi kial đak hơbông. Jơ̆p dêh char iung jang đei 16 tơdrong jang, asong hơnih oei sơđơ̆ng ăn kon pơlei tơ̆ tơring đak hơbông. Lơ̆m noh, tơring gah Pơmơ̆t dêh char đei 7 tơdrong jang pơjing hơnih oei 'nao hăm kơsô̆ jên asong jang hloh 875 tih hlj. Rim hơnih oei 'nao đei pơm trong nơnăm 'lơ̆ng, đei unh hơyuh, đing pơchoh đak djah, unh tơ̆k hơdah, hnam trưng hŏk, hnam hŏk hôp tơpôl păng dôm tơdrong kăl yua nai, pơm trong ăn kon pơlei sơđơ̆ng tơdrong hơrih đunh đai.

Vă vei sơđơ̆ng tơdrong jang, Hơnih jang vei lăng kon pơlei dêh char Gia Lai tơchơ̆t keh đang ming man tôm tơdrong hơdrol kơ năr 31/8, pơjao 100% hnam oei hơdrol kơ năr 30/11 păng keh đang tơdrong 'nhăk kon pơlei truh oei hơdrol kơ năr 15/12.

Hăm dôm unh hnam ưh kĕ đei jên pơm hnam, tơring gô hơvơn bơngai jang, tơmam drăm, jên jang vă man hnam kiơ̆ pơkăp "tơkhuă pơjao truh tơpang ti", tơgŭm ăn kon pơlei đei hnam oei đơ̆ng rŏng kơ tơdrong ming man kăl keh đang. Ƀok Dương Mah Tiệp, Phŏ Kơdră Hơnih jang vei lăng kon pơlei dêh char Gia Lai pơtruh nơ̆r pơgơ̆r:  “Jơnŭm vei lăng tơdrong ming man kơ dêh char păng rim anih iŏk ming man, akŏm lơ kơmăi kơmŏk, tơmam drăm vă đah keh đang păng sơđơ̆ng 'lơ̆ng thoi nhen tơchơ̆t tơlĕch. Anih vei lăng kon pơlei xah jang 'lơ̆ng tơdrong tơroi tơbăt noh đei kon pơlei drơ̆ng lăp, tơtom sek tơlang dôm tơdrong tơnap tap lơ̆m tơdrong pơgơ̆r jang păng pơjao teh athei jang mă trŏ tơchơ̆t. Atŭm hăm 'noh, akŏm dôm tơdrong vang jang vă tơgŭm ăn kon pơlei pơm hnam oei, mă kăl noh hăm unh hnam hin dơnuh, unh hnam đei tơdrong hơrih tơnap tap, unh hnam ưh đei jên vă pơm hnam”