Lơ sơnăm kơ ou, ngê̆ nhơ̆n Phạm Văn Rôm tơ̆ xah Ba Vinh, dêh char Quảng Ngãi hăt hot pơtho gah tôn Chĭng Ba ăn đe sơnăm mơlôh bơngai H'rê. Ƀok ăn tơbăt, ou jĭ tơmam tôn reh kăp gĭt hloh kơ bơngai H'rê, akŏm ƀenh đon lui, jing 'long pơtŏ ăn tơdrong pơdrŏng păng hơnih dơ̆ng kăp gĭt kơ tơ-'ngla bơngai lơ̆m pơlei pơla:  “Mă mônh noh vei răk tơƀăk mong joh ayŏ kơ bơngai H'rê po kơdih. Mă ƀar, joh ayŏ Chĭng Ba đei đơ̆ng sơ̆ ki bơih, noh Chĭng Ba kơ bơngai H'rê 'noh kăp gĭt tơpă, bơ̆n athei vei kơjăp joh ayŏ kăp gĭt kơ kon pơlei H'rê”.  

Tơdrong tôn pơdah Chĭng Ba kơ bơngai H'rê hlôi đei sơkơ̆t jing Mŭk drăm joh ayŏ kơ teh đak. Yă Trần Thị Thanh Thúy, Phŏ Kơdră Hơnih jang vei lăng kon pơlei xah Ba Vinh ăn tơbăt, tơring pơtơm tơdrong vei răk tơƀăk mong mŭk drăm ou vă jang tơmang pơhiơ̆. Truh dang ei, xah hlôi keh đang akŏm đei 4 khŭl joh ayŏ kơdŏ suang tơ̆ 4 thôn păng tŏk bŏk chih akŏm tơdrong vei răk tơƀăk mong kơjă kăp gĭt kơ Chĭng Ba atŭm hăm dôm tơdrong hơsuang kră sơ̆ kơ đe drăkăn H'rê. Xah hlôi pơih lơ lăm pơtho gah tôn Chĭng Ba păng tanh brai vai khăn, vă vei răk dôm tơdrong joh ayŏ 'lơ̆ng kră sơ̆ kơ bơngai H'rê, tơgop hơtŏk jang tơmang pơhiơ̆ pơlei pơla, pơm trong jang xa ăn kon pơlei:  “Ou jĭ dôm tơdrong jang đei tơgŭm đơ̆ng Tơchơ̆t jang kơ teh đak păng gô pơtoi đei pơih să păng akŏm jing tơdrong jang đunh đai ăn kon pơlei. Tơring hơpơi 'meh, gô jang hơdoi hăm tôm tơdrong tơlĕch jang, vă pơjing đei lơ tơmam drăm 'lơ̆ng đơ̆ng kơdih po kon pơlei pơm tơlĕch, kiơ̆ đơ̆ng lăm pơtho pơhrăm thoi ou”

Đơ̆ng tơdrong tơchơ̆t jang kơ teh đak, lơ joh ayŏ so kăp gĭt kơ kon pơlei  Cor adoi đei vei răk tơƀăk mong. Tơ̆ dôm xah groi kông dêh char Quảng Ngãi, dôm tơdrong joh ayŏ nhen tôn chĭng chêng, hơsuang Cà đáo, pơtăm gơ̆ng atŭm hăm lơ khôi juăt so đei hơmet, pơtho ăn đe sơnăm mơlôh. Lơ sơnăm kơ ou, Ngê̆ nhơ̆n Nhân dân Hồ Ngọc An tơ̆ xah groi kông Trà Bồng hăt hot hăm tơdrong pơtho joh ayŏ Cor lơ̆m hnam trưng hŏk. Ƀok chơt hơ-iă ah mă roi năr roi đei lơ buoăl mơlôh lăp kơ joh ayŏ kon kông:  “Chơt hơ-iă tơpă ah mă jang đei tơdrong 'lơ̆ng ăn kon kông po kơdih, vei răk joh ayŏ. Kơdih inh jĭ bơngai kơtă pơtho ăn đe hŏk tro tơ̆ hnam trưng teh đak rong 'me Trà Bồng 'noh inh ƀôh hơ-iă tơpă mơ̆n. Rim 'măng akŏm khôi juăt so Ngả Rạ kơ hnam trưng, đe sư adoi pơgơ̆r kiơ̆ dôm khôi juăt so kơ bơngai Cor”.

Sơkơ̆t hơdah joh ayŏ jĭ tơdrong tơm vă hơtŏk tơmang pơhiơ̆ kơjăp sơđơ̆ng, rim tơring groi kông dêh char Quảng Ngãi tơguăt vei răk mŭk drăm joh ayŏ hăm hơtŏk tơmang pơhiơ̆ pơlei pơla, brư̆ brư̆ pơjing trong jang xa ăn kon pơlei. Ƀok Đỗ Khắc Phi, Phŏ Kơdră Hơnih jang vei lăng kon pơlei xah Trà Bồng sơkơ̆t hơdah:  “Đơ̆ng jên asong kơ Tơdrong jang 6 lơ̆m Tơchơ̆t jang kơ teh đak gah hơtŏk mŭk drăm tơpôl tơ̆ tơring kon pơlei kon kông, Hơnih jang vei lăng kon pơlei xah hlôi akŏm tơgŭm asong jang, adoi nhen tơlĕch jang 'lơ̆ng tơdrong vei răk tơƀăk mong mŭk drăm joh ayŏ lơ̆m tơring. Hơdah noh pơtho gah mŭk drăm joh ayŏ; răt kơmăi kơmŏk kăl păng asong ming man hơnih akŏm joh ayŏ ăn rim thôn. Khei năr truh, nhôn pơtoi akŏm đơ̆ng dôm tơdrong tơlĕch jang, vă hơtŏk mŭk drăm tơpôl tơring kon pơlei kon kông păng groi kông”.