Lơ̆m mir pơgar să 1ha tơ̆ Ea Na (Đắk Lắk), ƀô̆ đô̆i rơka Trần Quốc Đài atŭm hăm hơkăn mơduk mơdăk lơ̆m pơyan phĕ sầu riêng. Bơngai choh jang sa pơnam ‘noh oei chĕp ba lơ̆m hơkou kơdih lơ kơcheh ƀrơ̆m phao đơ̆ng rong tơblăh vang. Ƀok Đài mơ̆t pơm ƀô̆ đô̆i sơnăm 1976, iung tơblăh tơ̆ kơdrăn tơblăh Campuchia. Lơ̆m mĭnh ‘măng iung tơblăh khul lĭnh Khmer Đỏ, ƀok răm ƀrơ̆m phao ayăt prăh ƀơm tơ̆ rŏng, ti păng jơ̆ng. Đơ̆ng rŏng ming hơmet, ƀok hơnơ̆ng iung tơblăh dĭng truh keh kong tơdrong jang đơ̆ng noh lĕch đơ̆ng pơm ƀô̆ đô̆i sơnăm 1981. Brŏk vih hơrih sa hăm pơlei pơla, ƀok hơdrin pơtăm chehphe, tiu đơ̆ng noh pơtăm hloi sâu riêng. Truh dang ei, mir pơgar 1ha hlôi hơnhăk đei iok yoa truh 900 triu hlak jên lơ̆m mĭnh sơnăm. Hăm ƀok Trần Quốc Đài, tơdrong jĭ jăn hlôi pơm ăn tơdrong jang sa mơmat tat hloh hăm đe nai, mă lei ưh khan kơ yuơ lơ loh kơna mă pơdơ̆h. “Mă jang tơdrong yă kiơ jei lap ngăl, bơngai pran jăng grăng akou jang mir jei gleh hrat bơih, mă lei bơ̆n jĭ bơngai jĭ rơka gô mơmat tat hloh dơ̆ng. Kơna mưh jang ‘noh ba tơng kơdih, jang 6 jơ ‘noh pơdơ̆h, pơtêng hăm đe nai ‘noh jang 8 jơ. Ba pơhrăm dar deh kơna roi năr roi joăt.”

Ưh hơtăih hăm mir pơgar ƀok Trần Quốc Đài ‘noh mir pơgar chehphe pơtăm hrou hăm sâu riêng bluh vơ̆ jing ‘lơ̆ng kơ ƀô̆ đô̆i jĭ jăn Hà Văn Quảng. Đơ̆ng rŏng dôm sơnăm bơ̆ jang tơdrong jang apŭng plĕnh teh tơ̆ kơdrăn tơblăh Campuchia, ƀok mơ̆t tơ̆ Đắk Lắk oei kiơ̆ trong jang kinh tế mới. Đơ̆ng bơngai ƀô̆ đô̆i, ƀok hơnơ̆ng iung jang dơ̆ng lơ̆m khul Kŏng ang, ƀô̆ đô̆i tơring đơ̆ng noh iok jang kơchư̆k Bí thư Đảng tơring Ea Bông hơdrol kơ pơdơ̆h bơ̆ jang. Lĕch đơ̆ng bơ̆ jang teh đak, bơngai ƀô̆ đô̆i so brŏk vih hăm mir pơgar. Lơ̆m hơgăt teh 1ha chehphe pơtăm hrou sâu riêng ŭnh hnam ƀok jang sa iok đei sơđơ̆ng đơ̆ng 600-700 triu hlak jên lơ̆m mĭnh sơnăm.

Hăm kon pơlei lơ̆m tơring, tơdrong hơ iă hloh hăm ƀok Quảng không ưh khan lăp mir pơgar jang sa đei iŏk yoa kơjăp, mă oei jơhngơ̆m đon yŭk trong hơlou kơ ƀô̆ đô̆i so. Mưh tơring pơih să trong nơnăm pơlei pơla, ƀok hlôi plang ăn hloi vă jê̆ 100 m² teh. Băt trong jang sa, ƀok pơtho ăn hloi bôl boăl ƀô̆ đô̆i so păng kon pơlei kih thuơ̆t vei lăng chehphe, sâu riêng vă bu bu jei jang sa iok yoa kơjăp. Ƀok Hà Văn Quảng tơroi: “Lăp đơ̆ng rŏng pơdơ̆h bơ̆ jang teh đak ‘noh ba hơnơ̆ng vang vei lăng năng tông mir pơgar ŭnh hnam. Hăm mĭnh ‘nu bơngai ƀô̆ đô̆i, jang kiơ̆ jơhngơ̆m đon ‘lơ̆ng Ƀô̆ đô̆i Ƀok Hô, ba hơnơ̆ng pơm jŭk yuk trong hơlou vă kon pơlei kiơ̆ yok rok jơ̆ng jang kiơ̆.”

Đơ̆ng rŏng hơgrop tơring, Khul ƀô̆ đô̆i so tơring Ea Na (dêh char Đắk Lắk) đei 861 ‘nu, lơ̆m ou đei 39 ‘nu ‘noh ƀô̆ đô̆i rơka, ƀô̆ đô̆i jĭ jăn. Lơ bơngai mă đơ̆ng sơnăm đĭ kră, jơhngơ̆m pă gan pran jăng mă lei oei hơnơ̆ng vang jang rim tơdrong jang lơ̆m tơring. Ƀok Trần Quốc Đài hăm ƀok Hà Văn Quảng jĭ ƀar ‘nu bơngai ƀôh hơdăh đei khul rơih vă lang să trong jang choh jang sa. Ƀok Phương Toại Nguyện, Kơ iĕng Kơdră Khul ƀô̆ đô̆i so tơring Ea Na tơbăt, ƀok Đài hăm ƀok Quảng jei hơnơ̆ng chă pơtho tơbăt ăn rim bơngai lơ̆m khul găh kih thuơ̆t vei lăng năng tông chehphe, sâu riêng, tiu; tơgŭm djru dôm ŭnh hnam tơnap tap hơdrin jang sa pơjing đei tơdrong hơrih sa sơđơ̆ng.“Hop akŏm joăt joe rim khei, rim jăl, nhôn jei hơnơ̆ng pơjing tơdrong jang năm tơmang lăng rim mir pơgar jang sa iŏk yoa kơjăp. Nhôn hlôi tơƀôh tơbăt, pơrô̆ pơrôp, lang să trong jang sa ou truh hăm rim bơngai lơ̆m khul tim gan băt găh kih thuơ̆t vei lăng năng tông chehphe, sâu riêng, tiu hăm trong ăn rim bơngai lơ̆m khul năm lăng hloi mir pơgar măr sư...”

Tơblăh vang đĭ tơ̆ rŏng, dôm rơka tơ̆ hơkou jăn oei doh, mă lei jơhngơ̆m đon hơdrin kơ bơngai ƀô̆ đô̆i ưh kơ lai yơ pơdơ̆h ƀơ̆t năr lĕch đơ̆ng pơm ƀô̆ đô̆i. Đơ̆ng kơdrăn tơblăh sơ̆ truh dôm mir pơgar chehphe, sâu riêng hrei ou, đe sư oei hơngŭr plang ăn hăm jơhngơ̆m jang, hăm jơhngơ̆m đon pơm juk yŭk trong hơlou păng tơnăp hăm kon pơlei pơla. ‘Nou jĭ tơdrong tơklep, phăl hơlăng kơ jơhngơ̆m đon Ƀô̆ đô̆i Ƀok Hô lơ̆m chăl rơngei hiôk hian: Ưh khan lăp băt iung tơblăh mưh Teh đak krao tơchă, mă oei hơngŭr tơnăp kơjăp ‘lơ̆ng tơ iung pơjing pơlei pơla mưh teh đak đei rơngei hiôk hian.