Kơsơ̆ ‘năr 4/8, Kơdră chĕp kơ̆l Jơnŭm pơgơ̆r kon pơlei dêh char Đắk Lắk tơgop nơ̆r ăn dôm trong pơgơ̆r jang, tơdrong tơgŭm hăm dôm hnam trưng tơ̆ tơring sơlam bơ̆ jang đei yoa ‘lơ̆ng, sơđơ̆ng, đunh đai. Dang ei dôm hnam trưng teh đak rong tơ̆ dôm xăh sơlam lơ̆m dêh char ming man vă đang bơih, tơchĕng adrol gô đei tơmât yoa lơ̆m sơnăm hŏk 2026-2027. Mă lei, 1,2 anih, tơmam kơmăy kơmŏk, tơdrong pơtruh thây kô, bơngai jang tơ̆ anih oei xa lơ̆m hnam hŏk, kŭm hăm trong rơih hŏk tro mât hŏk, tơdrong tơgŭm oei hơnơ̆ng hơmet pơ ‘lơ̆ng. Yă Cao Thị Hòa An, Kơdră Jơnŭm pơgơ̆r kon pơlei dêh char pơma hơdăh, tơlĕch jên man hnam trưng teh đak rong tơ̆ tơring sơlam ưh lăp man hnam hŏk đech mă athei pơm ‘lơ̆ng ăn đe hŏk tro tơ̆ tơring pơmat tat gơ̆h đei năm hŏk, hơtŏk tơdrong đei yoa đơ̆ng hnam trưng; Athei Anih vei lăng kon pơlei dêh char pơtho ăn dôm anih jang đei ƀơm truh hơtŏk hrĕnh tơdrong ming man dôm hnam trưng teh đak rong tơ̆ tơring sơlam, jăh chih pơkeh tơdrong tơchơ̆t tơgŭm ăn hŏk tro păng dôm hnam trưng teh đak rong.

‘Năr 4-8, Anih vei lăng kon pơlei dêh char Gia Lai tơlĕch trong jang proh hơmet, pơgơ̆r ming dơ̆ng tơdrong jang hnam trưng mầm non păng phổ thông kơ teh đak vă hơtŏk ‘lơ̆ng đei yua vei lăng, iŏk yua khŭl thây kô pơtho, anih jang tơmam drăm, pơm lăp hăm ‘meh vă hơtŏk tơiung pơtho pơhrăm lơ̆m tơdrong ‘nao. Kiơ̆ trong jang, kơsô̆ hnam trưng mầm non păng phổ thông kơ teh đak kơ dêh char gô tơjur đơ̆ng 1.267 hnam trưng pă 699 hnam trưng (jur 568 hnam trưng). Tơdrong proh hơmet đei bơ̆jang kiơ̆ trong jang, trŏ lăp hăm tơdrong hiôk yan âu rim tơring; lơ̆m noh, tơ̆ 61 xăh, phường tơring hiôk, kơsô̆ tơ jur hnam trưng hŏk iŏk đei hloh 51%, oei 74 xăh, phường uơ oei dơ̆ng iŏk đei hloh 37%. Anih vei lăng pơtho pơhrăm Gia Lai tơbăt, kơplăh proh hơmet gô tơklep hăm vei sơđơ̆ng tơdrong gơ̆h tơm hŏk pơhrăm đơ̆ng hŏk tro, mă loi ‘noh jĭ hŏk tro tơring mơmat tat, tơring kon pơlei kon kông.