Dêh char Dak Lak dang ei đei dang 450.000 'nu bơ ngai kră, đei 13,5% kơ sô̆ kon pơ lei. Trong jang đei tơ lĕch vă tơ gŭm grŭp đơ̆ng 60 truh hơ la kơ 75 sơ năm đei tơdrong arih sa mơ mat tat, tam mă đei iŏk yua tơ drong tơ gŭm ƀao hiên pơgang nai, hơdai hăm 'noh tơ gop hơtŏk kơsô̆ bơngai đei iŏk yua tơdrong tơ gŭm ƀao hiêm pơgang kơ dêh char.

Ƀok Trần Mạnh Toàn, Kơdră vei lăng Ƀao hiêm tơpôl dêh char Dak Lăk akhan, tơdrong kăl hloh 'noh jĭ Tơdrong tơchơ̆t 'nao gô pơm sơđơ̆ng đei tơdrong arih sa tơpôl hăm bơngai kră:

"Tơdrong krao hơvơn bơngai kră tơ̆ dêh char Đăk Lăk răt kơdih ƀao hiêm pơgang ‘noh tôch kơ mơmat tat. Dôm bơngai đơ̆ng 60 truh 75 sơơnăm mă tam mă đei sa yua tơdrong jang tơgŭm kiơ găh ƀao hiêm pơgang ‘noh jĭ tơdrong ưh kơ ‘lơ̆ng găh vei sơđơ̆ng tơdrong arih sa tơpôl. Tơdrong tơchơ̆t âu gô vei sơđơ̆ng đei tôm ƀao hiêm pơgang ăn bơngai kră”.

Găh jên bơ̆ jang, Dak Lăk hlôi hơmet ăn 38 ti hlak jên vă jang kiơ̆ tơdrong tơchơ̆t lơ̆m 4 khei hơtuch sơnăm 2026. Đơ̆ng sơnăm 2027, jên âu tơchĕng hơdrol đei jô̆ lơ̆m jên bơ̆ jang kơ xăh, phường. Rim anih jang, tơring đei athei hơnơ̆ng chih răk vă băt hơdăh bơngai đei iŏk sa yua, veh ver kơ hơdrom băl hăm dôm tơdrong jang tơgŭm nai.

Bí thư Đảng dêh char Dak Lăk Lương Nguyễn Minh Triết pơma hơdăh, mă đơ̆ng dêh char oei mơmat tat, tơdrong 'măn jên jang ăn tơdrong jang vei sơđơ̆ng tơdrong hơrih sa tơpôl oei kăl kơ đei tơgŭm hơdrol:

“Lơ̆m tơdrong tôch pơmat tat đơ̆ng dêh char mă lei kŭm athei 'măn jên jang mă lơ ăn tơdrong jang vei sơđơ̆ng tơdrong arih sa tơpôl. Pơjao ăn Anih jang tơgŭm tơdrong păng pơjao ăn Khŭl jang kơ Jơnŭm vei lăng kon pơlei dăr hơlen dơ̆ng vă đơ̆ng noh pơdrơ̆ng kiơ̆ ‘măng hop akŏm kơ Jơnŭm vei lăng kon pơlei vă jê̆ truh”.