Hơdrol kơ 'nŏh, đơ̆ng 'năr 19/8, kiơ̆ đơ̆ng chă hơlen lăng, sir chă tơ̆ Anih gru groa Diên Khánh,  rim khul jang chă ƀôh 5 anih đei ƀôh kơting hơdai hăm minh ƀar tơmam nhen kơđŏh ƀrơ̆m phao, kơƀao kơchai yâu… Lơ̆m 1 giĕng, khul jang kơpal hlôi kôch iŏk đei 13 kơting, bơ̆ jang iŏk tơmam pơyoa ăn hơlen lăng ADN.

Kiơ̆ hla ar chih răk tơdrong hơrih păng roi tơbăt chih iŏk đei, tơring hnam pơnă so lơ̆m Anih gru groa Diên Khánh hlôi jing hơnih chĭt kron kang ƀô̆, ƀô̆ đô̆i kăch mang. Lơ bơngai hlôi lôch răm lơ̆m khei 'năr đei ayăt rôp, chĭt kron păng đei ƀŭ hơmet tơ̆ âu. Dang ei rim hơnih jang tŏk bŏk hơnơ̆ng pơih să tơdrong chă akŏm kơting linh lôch tang ăn teh đak.