Kiơ̆ Anih vei lăng ming man dêh char Đắk Lắk, anih pơgơ̆r tơdrong jang, 100 tŏ hnam hŏk hôp tơpôl hơdai hăm anih tang găn đak lơ̆p tơ̆ dôm pơlei pơla lơ̆m dêh char đei tơlĕch jang hrơ̆ch đơ̆ng 'năr 27/6, tơ̆ 27 pơlei pơla găh dôm xăh, phường, hăm akŏm jên jang vă jê̆ 171 ti hlak jên. Mĭnh pôm hnam đei man lơ̆m teh xă dang 220 m², akŏm đĭ đăng teh xă hlŏh 440 m², đei 2 tơ̆ng, man kơjăp hăm ƀê tŏng pơsey, kơjăp 'lơ̆ng păng hơnă tang găn đak lơ̆p.

Mưh tơmơ̆t iŏk yua, minh pôm hnam kĕ pơm lăp hăm 'mĕh vă yông tơklăh, oei sa akŏm ăn kơ dang 200 'nu bơngai mưh đei ƀôh 'mi kial đak tih  pơrăm. Truh dang ei, 98 tŏ hnam đĭ man kơjăp 'lơ̆ng bơih; dôm tơdrong jang uơ oei dơ̆ng nhen man tơ năr, pơm hơnă, chô̆ kơƀŏng unh điên… tŏk bŏk đei hăt hot hơmet pơ 'lơ̆ng, pơgơ̆r iŏk yua. 2 tŏ hnam uơ oei dơ̆ng kŭm tŏk bŏk đei hơtŏk hrĕnh, adrin jang đang kiơ̆ trong tơlĕch jang.

Ƀok Hà Lương Đức, Phŏ Bí thư chĕp kơ̆l Đảng xăh Hòa Mỹ, dêh char Đắk Lắk, ăn tơbăt tơring đei Anih vei lăng kon pơlei dêh char tơlĕch jên man 9 tŏ hnam hŏk hôp tơpôl hơdai hăm pơm anih vei ver kơ đak lơ̆p. Truh dang ei, dôm tŏ hnam âu hlôi man đei hlŏh 98% tơdrong jang, oei hơmet ăn tơdrong hơlen năng vă tơtom pơyoa ăn kon pơlei mưh pơyan ‘mi kial truh.

“Dôm anih man vă veh ver kơ đak lơ̆p kiơ̆ trong jang hơdai athei jang đang adrol kơ ‘năr 15/9. Kiơ̆ tơdrong ‘nŏh, Anih vei lăng kon pơlei xăh oei jang hơdoi hăm tơ ‘ngla tơmât jên jang, dôm anih jang ming man oei hăt hơtŏk hrĕnh tơdrong jang vă jang kĕh dôm tơdrong jang oei đei dơ̆ng tơ̆ rim anih kiơ̆ năr hơgăt atŭm, pơm thoi noh vă jăh tơmât yoa vă kon pơlei gơ̆h tang găn hăm sar bar, tŏ ‘mi kial kơnê̆.”

Tơdrong tơmơ̆t jên jang man dôm hnam hŏk hôp tơpôl hơdai hăm tang găn ‘mi tih đak lơ̆p vă pơm hơdăh ‘lơ̆ng trong jang đơ̆ng Đảng, Teh đak lơ̆m tơdrong hơtŏk loi dơ̆ng tơdrong kĕ tang găn ‘mi kial đak lơ̆p pơrăm, vei sơđơ̆ng hơkâu jăn păng mŭk tơmam kon pơlei tơ̆ hơnăp dôm tơdrong đei ƀôh krê hơmơt đơ̆ng tơplih tŏ ‘mi kial. Hơdai hăm, dôm tơdrong jang tơgop hơmet pơ ‘lơ̆ng anih jang kăl, pơm hơnih hŏk hôp tơpôl păng pơyua ăn tơdrong hơrih sa kon pơlei tơ̆ dôm pơlei pơla lơ̆m dêh char Đắk Lắk./.