Jơnŭm vei lăng kon pơlei dêh char Đăk Lăk hlôi tơlĕch Tơchơ̆t kơsô̆ 19 gah tơgŭm hăm hŏk tro păng hnam trưng hŏk oei hơdoi teh đak rong 'me tơ̆ dôm xah sơlam teh. Kiơ̆ Tơchơ̆t tơlĕch, hŏk tro hŏk oei ah kơ-'năr đei tơgŭm 110.000 hlj ăn 1 'nu oh lơ̆m 1 khei jên xa 'năr dơ̆ng, hŏk tro hŏk oei hơdoi hloi đei tơgŭm ăn 300.000 hlj ăn minh 'nu hŏk tro lơ̆m 1 khei.

Hŏk tro hơtaih đơ̆ng hnam oei đei tơgŭm jên vih vơ̆t. Hăm hŏk tro jăl kơđeh, jên tơgŭm noh 120.000 hlj rim khei mưh trong hơtaih đơ̆ng hnam đơ̆ng 4 km truh hơla 15 km, jên tơgŭm noh 240.000 hlj, mưh trong hơtaih đơ̆ng 15 km tŏk tơ̆ kơpal. Hŏk tro jăl THCS đei tơgŭm nhen thoi ăi mưh trong hơtaih đơ̆ng 7 km truh hơla 15 km păng đơ̆ng 15 km tŏk tơ̆ kơpal. Khei năr tơgŭm ưh đei hloh 9 khei lơ̆m sơnăm hŏk.

Sơnăm hŏk ou, hŏk tro, sinh viên lơ̆m tơring teh kơ dêh char Đăk Lăk đei jên mong teh đak tơgŭm 55% jên đŏng bảo hiểm y tê̆, hơtŏ hăm 751.410 hlj ăn minh 'nu lơ̆m minh sơnăm. Đăk Lăk adoi asong pơhlom 41 tih hlj răt hla bar hŏk vă rim hnam trưng asong ăn hŏk tro mơng.

Atŭm hăm tơgŭm kơtă, Đăk Lăk akŏm ming man hnam trưng, mă hăt noh tơ̆ dôm tơring oei ƀơm tơnap tap. Sơnăm hŏk 2026-2027, Đăk Lăk đei 3 hnam trưng hŏk oei hơdoi teh đak rong 'me tơ̆ xah sơlam păng 1 hnam trưng hŏk oei hơdoi tơ̆ xah sơlam Ea Rốk đei tơmơ̆t yua. Dôm tơdrong đei asong ming man, vă pơm trong hiôk ăn tơdrong hŏk pơhrăm ăn pơhlom 3.100 hŏk tro tơring sơlam teh.

Yă Lê Thị Thanh Xuân, Kơdră chĕp pơgơ̆r Hơnih vei lăng Hnam trương pơtho pơhrăm Đăk Lăk tơbăt, hơnih ou hơnơ̆ng akŏm hơvơn kon jên tơmơ̆t jang đơ̆ng Tơdrong jang tơm kơ Teh đak ăn pơtho pơhrăm vă tơmơ̆t jang, pơm pơkeh hơnih pơtho pơhrăm, tơmam drăm ăn hnam trương.  “Ƀơ̆t măt, athei rim tơring proh hơmet kon jên pơtho pơhrăm. ‘Moi kiơ̆ kon jên ou, hơnih jei pơrô̆ athei rim hnam trương iŏk yoa ‘lơ̆ng hơ iă kon jên vă tơmơ̆t jang ming hơmet hnam trương păng kmăi kmŏk. Đơ̆ng noh, sơđơ̆ng ăn tơdrong pơthopăng hŏk pơhrăm sơnăm hŏk ‘nao, roi năr roi pơtho hŏk pơhrăm ‘lơ̆ng păng trŏ lăp hăm trong tơlĕch ăn lơ̆m chăl hrei ou.”